Buk Song 34:6-16

⁶Ol rabisman i prea long Bikpela na em i harim prea bilong ol, na i helpim ol long olgeta hevi bilong ol.

⁷Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.

⁸Bikpela i save mekim gutpela pasin long yumi. Yupela yet i mas traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru.

⁹Ol manmeri bilong Bikpela, yupela i mas i stap aninit long em. Ol man i aninit long em ol i no sot long wanpela samting.

¹⁰Ol yangpela laion i save sot long abus na ol i hangre. Tasol ol manmeri i bihainim Bikpela ol i no save sot long ol gutpela samting.

¹¹Ol pikinini, yupela i mas i kam na putim yau gut long tok bilong mi. Mi laik skulim yupela na bai yupela i stap aninit long God oltaim.

¹²Yu laik bai laip bilong yu i kamap gutpela? Na yu laik bai yu stap laip longtaim tru, na yu stap gut na amamas?

¹³Sapos yu laik i stap olsem, orait yu no ken mekim tok nogut, na yu no ken tok giaman.

¹⁴Yu mas givim baksait long pasin nogut, na bihainim gutpela pasin tasol. Yu mas wok long kamap wanbel wantaim ol arapela manmeri na yu mas strong long bihainim dispela pasin.

¹⁵Bikpela i save lukautim ol stretpela manmeri, na em i save harim beten bilong ol.

¹⁶Tasol Bikpela i no save laikim ol manmeri nogut. Na bai em i kilim ol i dai na ol manmeri i no tingim ol gen.