Buk Song 28:4-9

⁴Mekim save long ol dispela man inap long pasin nogut ol i bin mekim. Bekim pe nogut long ol. Inapim olgeta sin bilong ol.

⁵Ol i no save tingting long bikpela wok bilong Bikpela na long ol samting em i bin mekim. Olsem na em bai i bagarapim ol, na pinisim ol olgeta.

⁶Mi litimapim nem bilong Bikpela. Mi krai long em na em i harim mi pinis.

⁷God tasol i save was long mi na banisim mi. Olsem na mi save bilip long em. Bikpela i save helpim mi, olsem na mi amamas moa long em, na mi singim ol song bilong litimapim nem bilong em.

⁸Bikpela i save lukautim ol manmeri bilong em. Em i sambai long king bilong em na helpim em.

⁹God, helpim ol manmeri bilong yu. Mekim gut long dispela lain manmeri yu makim bilong yu yet. Yu ken i stap wasman bilong ol, na lukautim ol gut oltaim oltaim.