Buk Song 147:7-18

⁷Singim ol song bilong litimapim nem bilong Bikpela. Paitim gita na mekim musik long God bilong yumi.

⁸Em i save mekim ol klaut i kamap long skai, na salim ren i kam daun na mekim gras i kamap nabaut long ol maunten.

⁹Em i save givim kaikai long olgeta abus, na taim ol yangpela kotkot i singaut em i save givim kaikai long ol.

¹⁰Bikpela i no save amamas long ol strongpela hos na ol strongpela soldia. Nogat.

¹¹Em i save amamas long ol manmeri i save pret long em, na long ol manmeri i save bilip long em i save sori long ol oltaim.

¹²Yupela ol Jerusalem, litimapim nem bilong Bikpela! Yes, yupela ol Saion, litimapim nem bilong God bilong yupela.

¹³Em i save strongim ol dua bilong banis bilong yu, Jerusalem, na em i save mekim gut tru long ol manmeri bilong yu.

¹⁴Em i save lukautim graun bilong yupela, na mekim gutpela wit tru i kamap long gaden na yupela i kaikai na i pulap.

¹⁵Sapos em i mekim wanpela tok, orait wantu tasol dispela tok i kam daun long graun.

¹⁶Em i save salim planti ais i kam daun na i karamapim graun.

¹⁷Em i save salim planti ren ais inap olsem wesan bilong nambis. Na em i mekim ples i kamap kol tru na i no gat man inap sakim kol.

¹⁸Orait bihain em i tok gen na ais i kamap wara. Em i kirapim win na win i mekim wara i ran.