Buk Song 144:10-14

¹⁰Yu save helpim ol king i winim pait, na yu kisim bek mi Devit, wokman bilong yu.

¹¹Kisim bek mi long han bilong ol birua i save mekim nogut tru long mi. Na kisim bek mi long han bilong ol arapela lain. Ol i no save tok tru. Ol i save giaman tasol na mekim tok tru antap.

¹²Mipela i laik bai ol yangpela pikinini man bilong mipela i ken kamap strong olsem ol diwai. Na mipela i laik bai ol pikinini meri i ken kamap gutpela olsem ol gutpela piksa i save bilasim banis bilong bikpela haus bilong king.

¹³Mipela i laik bai ol gaden i ken karim planti kaikai na ol haus kaikai i ken pulap tru. Na bai ol sipsip i ken karim ol pikinini moa moa yet.

¹⁴Na bai ol bulmakau i ken karim planti pikinini na i no gat pikinini i kamap nogut na i no gat wanpela bai i dai. Mipela i no laik bai wanpela man o meri i mas krai long hevi na pen long ol rot bilong mipela.