Buk Song 119:107-129

¹⁰⁷Bikpela, harim. Bikpela pen tru i karamapim mi. Yu mas mekim mi i stap laip olsem yu bin promis.

¹⁰⁸Bikpela, mi prea na givim tenkyu long yu. Yu ken kisim tenkyu bilong mi, na skulim mi gut long tok bilong yu.

¹⁰⁹Oltaim mi redi long lusim laip bilong mi. Tasol mi no lusim tingting long lo bilong yu.

¹¹⁰Ol man nogut i taitim umben bilong holimpas mi. Tasol mi no lusim tok bilong yu.

¹¹¹Mi save holim tok bilong yu oltaim oltaim. Na dispela tok i save mekim bel bilong mi i amamas tru.

¹¹²Mi tok pinis bai mi bihainim olgeta lo bilong yu inap long taim mi dai.

¹¹³Mi no save laikim ol man i giaman long bihainim yu. Tasol mi laikim tumas lo bilong yu.

¹¹⁴Yu tasol yu wasman bilong mi na strongpela banis bilong mi. Mi save bilip long promis bilong yu.

¹¹⁵Yupela manmeri bilong sin, lusim mi. Mi laik bihainim lo bilong God bilong mi.

¹¹⁶Yu promis pinis bai yu strongim mi na mi stap laip, na mi bilipim promis bilong yu. Givim dispela strong long mi, nogut bilip bilong mi i lus nating.

¹¹⁷Holim han bilong mi na bai mi stap gut. Na oltaim bai mi putim gut yau bilong mi long tok bilong yu na bai mi bihainim.

¹¹⁸Yu save givim baksait long olgeta manmeri i lusim lo bilong yu. Giaman bilong ol bai i lus nating.

¹¹⁹Yu save ting ol manmeri nogut i olsem pipia tasol, olsem na mi laikim tumas tok bilong yu.

¹²⁰Mi pret tumas long yu na skin bilong mi i guria. Mi tingim kot bilong yu na mi pret.

¹²¹Mi bin mekim gutpela stretpela pasin. Mi no laik yu lusim mi na bai ol birua i mekim nogut long mi.

¹²²Mi laik yu promis bai yu helpim mi, wokman bilong yu. Yu no ken larim ol bikhetman i givim hevi long mi.

¹²³Mi wet wet long yu i kisim bek mi long han bilong ol man nogut, olsem bipo yu bin promis long mekim. Tasol mi wet yet na mi pilim nogut tru.

¹²⁴Yu ken sori long mi, na lainim mi gut long tok tru bilong yu.

¹²⁵Mi wokman bilong yu, olsem na yu ken givim tingting long mi bai mi ken save long tok bilong yu.

¹²⁶Ol manmeri i save kalapim lo bilong yu. Olsem na yu mekim save long ol.

¹²⁷Mi laikim tumas lo bilong yu. Mi no laikim tumas nambawan gol, tasol mi laikim tumas tok bilong yu.

¹²⁸Olsem na mi save bihainim olgeta tok bilong yu. Mi no laik tru long ol rot i abrusim rot bilong yu.

¹²⁹Tok bilong yu i gutpela tumas. Olsem na mi save bihainim olgeta.