1 Waio, eno nage ola mawainu ebao, tama nago homude te po munu me tagaligio. Menio. Te sesemane sogo nago bugagia homu kone palao.
2 Nago te po wali peyu da, te nage bobobage sogo sesabi elama tǫde bididu, tama nage bugagia mu dualalu bidaibao.
3 Nago te gasa bidi godolo ebo kolesaga, me te gasa bidi dali te mu kisa sabo kolesaga ebo me te munu me tagaligio. Nago te kolesaga si wali pelama, tama te nago dogonide au ilibo nai tiwai pedelaibao. Tama nago naga homuba bugagia dąų olama muao.
4 Te nago tama tibaso da, te Godigo nage godolo ebadi, te bidi dabego me nage godolo homu yaibao, tama nago sę te wiegi yai pedelaibao.
5 Nago konealubo po Genuai Bidiba bomonama dąų wao. Nago te homu eyu, te naga digi koneani kolesagago te naga tau sabo usu yaibao homu munu me elamu dao.
6 Te tigidali sę nago ebo, nago bomai homu Genuai Bidiba elama, tama nago te sę yao, tama agai nagebolo te wali pabo doloba pai sunumi ola mawaibao.
7 Te nago homugo tiyu, te nago koneani kolesaga te mu nai da homu elamuo. Menio. Nage te Genuai Bidi wi eyu, aga dologoba pelama, tama dwai kolesagaba tudi ola mao.
8 Nago tama tiyu da, teda nage tego mu tau siyu, te marasingo nage tigi tau sabo tiwai yaibao, tama nage bugagia bidimainu ilaibao, te dili dǫgai hauwa elalubo hasa tiwai bidaibao.
9 Nago te naga gide te polasa ina yani nai te selama, tama te ofa tiwai ilama, te Genuai Bidiba mao, te tama tebogo te agaba genuai nogi mawaibao.
10 Te nago tama tiyu da, te Genuai Bidigo nago gide te nai hauwa umabo walama elalumainu ilaibao. Tama naga nai mubo be te naigo mu pągąnama, tama nago te wain ąį tabiali te moni tank pągąyu, tama te wain ąį meba te olo buluba gelaibao.
11 Waio, te Genuai Bidigo nage dodolainu ebo sogo, nago wado po olama, te haliga dwai me igio. Agai nagede po elaluyu da, nago aga dali sębę igio.
12 Magi baso meni, Genuai Bidigo te agai godolo homu ebo bidi dabe dodolaibao, te aya dabego te aga godolo homu ebo wai dabe dodolobo tiwai gilama ebo dao.
13 Te wiegi yai homu kolesaga koneama sabo bidi, aga te wiegi yai homu pemene mu yaibao.
