Text copied!
Bibles in Kriol

Brabli Gudwan Song 8:1-8 in Kriol

Help us?

Brabli Gudwan Song 8:1-8 in Holi Baibul

1 If yu bina main braja, en main mami bin lukaftum langa yu, en imbin gibit im ronwan milk langa yu, en if ai bina faindim yu eniweya langa roud, ai bina kiskis yu en nobodi nomo bina tok enijing blanga yunmi na.
2 Ai bina gajim yu en deigimwei yu langa main mami kemp, weya yunmi bina jidan mijamet. En ai bina gibit yu olkain switwan wain blanga meigim yu jidan gudbinji.
3 Pudum yu lefthensaid bingga andanith langa main hed, en pudum yu raidensaid bingga langa mi, en jidan brabli gulijap langa mi.
4 Wal yumob gel brom Jerusalem, yumob garra pramis mi brabli strongbalawei. Yumob garra pramis nomo blanga kadimat minbala wen minbala laigim gija detmatj.
5 Hu dijan kaminap brom deset kantri weya dubala holdimbat miselp bingga? Det gel im sing. Andanith langa det epul tri aibin weikimap yu langa det pleis weya yubin bon.
6 Yu nomo laigim eni gel, oni mi na. Yu nomo holdimbat enibodi langa yu bingga, oni mi. Yunmi laigim gija detmatj. Im brabli strongwan wulijim deth. Det strongbala filing yunmi garram blanga yunmi selp, im jis laik deth. Im kaan gibap. Im barnimap yunmi insaid laik det bigwan faiya. Nobodi kaan deigidawei det strongbala filing blanga yunmi.
7 Woda kaan pudumat det faiya, en det fladwoda kaan neba deigidawei det strongbala filing brom yunmi. Bat if enibodi wandim yu, dei kaan neba baiyim yu garram ola gudbala ting dei garram. Yu kaan neba baiyim det strongbala filing.
8 Melabat garram sista deya, bat im yangwan en im dubala milk stil lilwan. Wanim melabat garra du blanga im wen im pramis garra kaman en wandi merrit langa im?
Brabli Gudwan Song 8 in Holi Baibul