3 Mi redi blanga go silip. Ai nomo werrimon eni klos. Yu wandim mi werrimon klos igin? Aibin washim miselp fut du. Yu wandim mi blanga jidan dardiwan igin?
4 Main olmen bin pudum im bingga langa det dowa, en aibin brabli gudbinji imbin gulijap.
5 Aibin jidan redi blanga larram im kaman insaid. Main bingga bin smel garram det gudsmelwan medisin, en garram det gudsmelwan oil, en aibin holdim det dowa.
6 Aibin opinim det dowa blanga main olmen, bat im nomo bin deya na. Imbin gowei. Aibin lukabat blanga im, bat ai nomo bin faindim im, najing. Aibin jingat blanga im, bat im nomo bin ensim mi, najing.
7 Detlot blijiman langa det taun bin faindim mi. Deibin beldimbat mi. Detlot blijiman hu oldei jandapbat langa det wol langa det taun, deibin pulumat main kout.
8 Yu pramis mi ola gel blanga Jerusalem. If yu faindim main olmen, yu garra dalim im, mi brabli wori miselp, dumaji mi laigim im detmatj, en mi wandim im blanga kambek.
9 Yu brabli purdiwan gel. Wanim yu reken? Yu olmen im mobeda langa najalot? Wanim brabli gudwan langa im? Wotfo melabat garra meigim det pramis langa yu?
10 Main olmen mobeda langa ola najalot men, en im jidan brabli strongbala. Im mobeda langa ola najalot men.
11 Im feis brabli dakbala brom san, en brabli sofwan, en im heya brabli kerliwan en brabli blekwan laik det wakwak.
12 Im dubala ai brabli purdiwan laik detlot waitwan dab, wen dei oldei washim miselp langa lilwan riba.
