6 Yu pudum yu lefthensaid bingga andanith langa main hed, en yu pudum yu raidensaid bingga langa mi, en jidan brabli gulijap langa mi.
7 Wal ola gel brom Jerusalem, yumob garra pramis mi brabli strongbalawei. Yumob garra pramis nomo blanga kadimat minbala wen minbala laigim gija detmatj.
8 Luk tharrei! Main olmen jinginat. Im kaminap oba detlot hil, en im ranran kwikbala langa mi.
9 Main olmen im kaman brabli kwikbala jis laik det yangwan diya. Im deya na jandapjandapbat atsaid langa main kemp. Im lukinatbat det windo blanga mi, en im tok kwaitbalawei langa mi.
10 Kaman na, main olgamen. Ai laigim yu detmatj. Ai wandim yu garra kaman garram mi.
