Boskopuman 2:4-38

⁴Dan ala den sma kon furu nanga a Santa Yeye èn den bigin taki ini tra tongo leki fa a Santa Yeye ben wani fu den taki.

⁵A pisten dati yu ben abi Dyusma ini Yerusalem di ben kmopo na ala sei fu grontapu. Den sma disi ben hori densrefi trutru na a Dyubribi.

⁶Di den yere a babari, wan bigi grupu kon makandra. Den no ben man ferstan fa a kan tak' iniwan fu den ben e yere fa den man ben e taki nanga den ini den eigi tongo.

⁷Den ben ferwondru sote tak' den aksi taki: “Ala den man di e taki drape, a no sma fu Galilea?

⁸Fa a du kon dan tak' wi alamala e yere san den e taki ini wi eigi tongo?

⁹Wi kmopo fu Partia, Media, Elam, Mesopotamia, Yudea, Kapadosia, Pontus nanga Asia.

¹⁰Trawan fu wi na fu Frigia, Pamfilia, Egipte, nanga den distrikti fu Libia ini a birti fu a foto Sirena. Sma de dya fu Roma tu, Dyusma nanga sma di kon teki a Dyubribi.

¹¹Sosrefi sma fu Kreta nanga Arabia de dya tu. Èn un alamala e yere fa den e taki na ini un eigi tongo fu den bigi sani san Gado du.”

¹²Den ben ferwondru sote èn den no ben sabi san den ben mus prakseri. A wan ben e aksi a trawan taki: “San a sani disi wani taki?”

¹³Ma tra sma ben e meki spotu taki: “Na drungu den drungu.”

¹⁴Dan Petrus opo tnapu nanga den tra erfu boskopuman fu Yesus. A opo en sten èn a taigi den taki: “Un Dyusma di kmopo fu ala sei, nanga unu di e libi ini Yerusalem, un yere! Arki bun san mi o taigi unu, bika disi na wan sani san un mus sabi.

¹⁵Den man disi no drungu soleki fa un denki, bika na neigi yuru mamanten un de.

¹⁶Ma san un e si dya, na san a profeiti Yowel ben taki kba. A ben taki:

¹⁷Na so Gado e taki: Na ini den laste dei Mi sa meki Mi Yeye kon tapu ala sma. Den manpikin nanga den umapikin fu unu sa taki leki profeiti. Den yonguwan fu unu Mi o sori sani, èn den owruwan fu unu Mi o gi dren.

¹⁸Ini a ten dati Mi sa meki Mi Yeye kon tapu den man nanga den uma di e wroko gi Mi. Dan den sa taki leki profeiti.

¹⁹Mi o meki wondru de fu si na loktu, èn marki o de fu si na grontapu, soleki brudu, faya nanga furu smoko.

²⁰A son o kon dungru èn a munkenki o kon redi leki brudu fosi a bigi prenspari dei fu Masra doro.

²¹Dan Mi sa ferlusu ala sma di e kari a nen fu Masra.”

²²Petrus taigi den moro fara taki: “Un sma fu Israel, un arki san mi e taki. Na Gado srefi ben seni Yesus fu Nasaret kon. Dati ben de fu si ini den bigi sani, den wondru, nanga den marki di Gado meki A du na un mindri, leki fa un sabi.

²³Ma un tyari a Yesus disi gi sma di no sabi a wèt fu Gado, fu den spikri En kiri na wan kroisi. Bika na Gado srefi ben wani meki a psa so.

²⁴Ma dan Gado puru Yesus ini a pina fu dede, èn A meki A kon na libi baka. Bika dede no ben man hori En.

²⁵David srefi ben taki fu Yesus di a taki: Mi sabi tak' Masra de ala ten nanga Mi. Fu di A e tnapu na Mi sei meki noti o psa nanga Mi.

²⁶Dat' meki Mi e prisiri èn Mi e singi. Te Mi dede srefi, Mi sa abi howpu.

²⁷Bika Yu no o libi Mi na ini dedekondre, èn Yu no o meki a dedeskin fu Yu Santa Wan pori.

²⁸Yu sori Mi pasi fu libi, èn Mi o prisiri fu di Yu de nanga Mi.”

²⁹Petrus taigi den moro fara taki: “Brada, mi kan taigi unu krinkrin tak' wi afo David dede kba èn den beri en. A grebi fu en de dya te nanga a dei fu tide.

³⁰David ben de wan profeiti, èn a ben sabi tak' Gado ben pramisi en nanga wan sweri tak' A o poti wan bakapikin fu en leki kownu na ini en presi.

³¹Bika David ben si na fesi tak' a Mesias bo kon na libi baka di a ben taki tak' Gado no bo libi En na ini dedekondre, èn tak' A no bo meki a dedeskin fu En pori.

³²Gado meki a Yesus disi kon baka na libi èn un alamala na kotoigi fu a sani dati.

³³Dan Gado teki En na heimel èn A gi En a moro hei presi na En let'anu sei. Gado gi En a Santa Yeye di A ben pramisi. Dan Yesus poti a Santa Yeye na wi tapu. Dati na san un e si èn san un e yere now.

³⁴Bika David srefi no ben opo go na heimel, ma a taki: Masra Gado taigi mi Masra taki: Kon sidon na Mi let'anu sei, te leki Mi meki den feyanti fu Yu tron Yu futubangi.

³⁶Fu dat'ede ala sma fu Israel mus sabi krin tak' Gado meki a Yesus disi, di unu spikri na wan kroisi, tron Masra nanga Mesias.”

³⁷Di den sma yere a sani disi, den firi en srefsrefi. Dan den aksi Petrus nanga den tra boskopuman fu Yesus taki: “Brada, san un mus du dan?”

³⁸Petrus piki den taki: “Un mus drai un libi, èn un mus teki dopu ini a nen fu Yesus Kristus, fu un kisi pardon fu un sondu. Dan Gado sa gi unu a Santa Yeye.