9 Ǹ pↄ́ sakɛnísi sɛ́ ǹ kú kpɛ́ pìia kũ pↄ́ kũ ò kú a gũnnↄ pínki ǹ ditɛ ma pↄ́ ũ kũ a zĩkɛbↄnↄ, oni gↄ̃ ma pↄ́ ũ.
10 Ǹ nísi pì kú sa'oki pìia kũ a zĩkɛbↄnↄ pínki. Ǹ sa'oki pì ditɛ ma pↄ́ ũ, anigↄ̃ de ma pↄ́ ũ deńla.
11 Ǹ nísi pì kú dàga pìia kũ a dibↄↄo, oni gↄ̃ ma pↄ́ ũ.
12 Ǹ su kũ Harunao kũ a nɛ́nↄ dakarɛki kuta kpɛ́lɛlɛa ǹ ń zú o gwe.
13 Ǹ sa'ori pↄ́kasanↄ da Harunanɛ, ǹ nísi kúa ǹ a ditɛ ma pↄ́ ũ, ani gↄ̃ ma gbàgbari ũ.
14 Ǹ su kũ a nɛ́nↄ dↄ ǹ utagyabanↄ dadańnɛ,
15 ǹ nísi kúkuḿma lákũ n kù ń dea nà, oni ma gbagba. Nísikummanaa pì mɛ́ ani tó ògↄ̃ de ma gbàgbarinↄ ũ ari ń buria.
16 Musa kɛ̀ lákũ Dikiri ònɛ nà pínki.
17 Ń bona Misila wɛ̃̀ plade mↄ káaku gↄrↄ káakua ò kuta pìi dↄ̀.
18 Kũ Musa tɛn kuta pì dↄ, à a zɛbↄnↄ pɛ̀tɛpɛtɛ gĩa, akũ à a lípɛtɛnↄ pɛ̀pɛn à a líkpakpanↄ kpàkpan, akũ à lípɛtɛnↄ pɛ̀tɛpɛtɛ.
19 À biza kùa, akũ à bára kùtɛa lákũ Dikiri ònɛ nà.
20 À sèeda gbɛ̀ anlonↄ sɛ̀ à kà àkpatii pìi gũn, à àkpatii pì sɛ́linↄ dà a zãnↄ gũn, akũ à a nɛ́ kùtɛa.
21 À gɛ̃̀o kpɛ́n, akũ à lábure kpà sèeda àkpatii pìii lákũ Dikiri ònɛ nà.
22 À teburuu dìtɛ dakarɛki kutan lábure pì kpɛ́lɛlɛ kpa gugbãnduru kpa.
23 À burodii kàtɛa Dikirinɛ zɛ́azɛa lákũ à ònɛ nà.
24 À fitiladibↄↄ dìtɛ dakarɛki kutan arɛdↄkↄ̃ana teburuua gɛ̀nↄmidↄki kpa,
25 à fitilanↄ nàna Dikiri arɛ lákũ à ònɛ nà.
26 Akũ à wura turaretitikpataki pìi dìtɛ dakarɛki kutan lábure sarɛ,
27 akũ à turaretiti gbĩ nnanna kpàtaa lákũ Dikiri ònɛ nà.
28 Akũ à lábure kpà kuta pì lɛ́a.
29 À sa'opↄ kũ òdi ká tɛ́n à tɛ́ kũ oki dìtɛ dakarɛki kuta kpɛ́lɛlɛa, akũ à sa'opↄ kũ òdi ká tɛ́n à tɛ́ kũ òa kũ flawaao lákũ Dikiri ònɛ nà.
30 À dàgaa pìi dìtɛ dakarɛki kuta dagura kũ sa'okio, akũ à í kàn.
31 Gwen Musa kũ Harunao kũ a nɛ́gↄ̃gbɛ̃nↄ dì ń ↄnↄ kũ ń gbánↄ pípin.
32 Tó òtɛn gɛ̃ dakarɛki kutan, ke tó òtɛn na sa'okii, òdi ń ↄnↄ kũ ń gbánↄ pípin lákũ Dikiri ò Musanɛ nà.
33 Akũ à karaa kpà à lìka kuta pìii kũ sa'okio, akũ à lábure kpà karaa pì lɛ́a. Lɛn Musa zĩ pìi kɛ̀ à làka lɛ.
