1Boeipa loh a thui bangla phaep nah, mamih taengah khaw, Israel aka uktaem laitloekkung taengah khaw, mamih manghai taengah khaw, mamih boeilu taengah khaw, Judah pilnam taengah khaw phaepnah te a khueh coeng.
2Jerusalem kah a saii bangla vaan hmuiah phaepnah he a saii noek moenih. Te tah Moses kah olkhueng cabu dongkah a daek tarhing la om coeng.
3Mamih khuikah hlang a ngen loh a ca kah a saa te a caak uh tih, a tloe rhoek loh a canu kah a saa te a caak uh.
4Boeipa amih te mah kaepvai ram boeih taengah ongai-oeng la a khueh. Hlangkah a hnael ham neh, khaepdan pilnam taengah khopong la a khueh. Te lam te a mih a thaek coeng.
5Amih te a suntlak sah tih a thoh voel moenih. Mamih namtu he Pathen Boeipa taenga n'tholh uh tih a ol te n'hnatun uh moenih.
6Mamih kah Pathen Boeipa tah tang coeng. Tedae a mamih so neh a pa rhoek soah khaw tahae khohnin due yah a phen coeng.
7Tekah citcai boeih neh Boeipa loh mamih soah a tlak sak coeng.
8Te lalah khaw mamih khat rhip long he mamih thinko boethae poeknah lamloh longpuei maelh tih Boeipa kah kolonah n'tlap uh moenih.
9Citcai he Boeipa loh oepsoeh la a khueh coeng dongah mamih soah a tlak sak coeng. Mamih loh saii ham n'uen vanbangla a bibi takuem dongah Boeipa ta tiktam yoeyah.
10Te lalah a ol te n'ngai uh pawt tih mamih hmaiah a khueh a oltlueh dongah te m'pongpa uh pawh.
11Babylon manghai Nebukhanezzar kah khosak ham khaw, a capa Belshazzar khosaknah ham khaw thangthui uh. Te daengah ni amih kah diklai tuetang he vaan tuetang bangla a om eh.
12Boeipa loh mamih te thdueng neh mik tuengnah khaw m'paek bitni. Mamih khaw Babylon manghai Nebukhadnezzar kap hoeptlangnah hmui neh, a capa Belshazzar kah hoeptlangnah hmuiah khosa uh sih. A mikhmuh kolonah koila kum a sen thotat uh sih.
13Kaimih ham khaw mamih kah Boeipa Pathen taengah thangthui uh. Mamih kah Pathen Boeipa taengah n'tholh uh coeng. Tahae khohnin duela Boeipa kah thintoek neh kosi he a mael voel moenih.
14Nangmih taengah cayol kan pat a len la tae uh. Khoning neh khotue vaengah khaw Boeipa im tholh phongnah khueh uh.
15Te vaengah he tlam he thui uh. Kaimih kah Boeipa Pathen tah thuem pai oe. Tedae tihnin ah kaimih soah yah ham phen uh coeng. Judah pilnam soah, Jerusalem kah khosa rhoek soah khaw,
16ka manghai rhoek, ukkung rhoe, ka khosoih rhoek, ka tonghma rhoek, neh a pa rhoek soah khaw.
17Boeipa nang hmuhah ka tholh uh coeng.
18A ol ka ngai uh pawt tih ka Pathen Boeipa ol dongah hna ka kaeng uh pai moenih. Kaimih mikhmuh a khueh Boepa kah oltlueh dongah ka pongpa uh moenih.
19Boeipa loh a pa rhoek te Egypt lamloh a khuen parhi, tihnin hil he, Boeipa Pathen kah ol ka ngai uh moenih. Ka altha uh tih a ol te ka hnatun uh pawh.
20Te dongah tahae ah tah citcai neh kosi te ka boep uh. Te tah a pa rhoek te khotui neh suktui a long tah khohmuen paek hamla Egyp lamloh a khuen vaengah, a sal Moses kut dongah Boeipa loh a thui coeng.
21Kaimih taengla han tueih tonghma rhoek ol cungkuem dongkah Pathen Boeipa ol te ka hnatun uh pawh. Kaimih kah halng thinko, mah kongaih bueng te kai vai uh. A tloe kah sungrhai taengah tho ka thueng uh. Te te kaimih kah Pathen Boeipa mikhmuh ah bahoeng thae coeng.
22Tedae Boeipa ol te na hnatun pawt atah Babylon kah sat na bi het mapawt nim?.
23Judah khopuei rhoek teh Jerusalem kaepvai lamkah omngaih ol khaw, kohoe ol khaw, yuhloh ol khaw, vasak ol khaw ka paa sak ni. Khohmuen boeih te khosak tal vetih khopong la om ni,” na ti.
24Tedae na ngol ka hnatun uh pawh, Babylon manghai kah sal aka bi rhung mai la. Te dongah na thui bangla na na khuen coeng. Te te na sal tonghma rhoek ka dongah na thui coeng dae ta. Ka manghai rhoek te a pa rhoek kah a rhuh pataeng a yalhnah hmuen lamloh a poh uh coeng.
25Amih te khothaih kah kholing neh khoying kah buem tui khuiah a voeih uh. Amih te citcai neh, khokha neh, cunghang neh, tlohthae ah ni a duek uh.
26Na im khaw namah ming khuenah ham ni tihnin ah na sak coeng dae Israel imkhui neh Judah imkhuikah halangnah dongah poci coeng.
27Kaimih Pathen Boeipa aw, namah kah sitlohnah boeih, a lenkoek thinpoei lungvatnah boeih neh kaimih he n'saii lah.
28Na sal Moses tue vaengah khaw na thui tih pilnam Israel mikhmuh ah na olkhueng daek ham ol na paek vaengah khaw,
29“Ka ol na hnatun pawt tah pilnu hlang len tloe te khaw namtom lakli ah hlangmi uihli cadeh la om vetih, amih te ka thaek ka yak ni.
30Pilnam rhawn-thah la om uh tih ka ol hnatun mahpawh ti khaw ka ming coeng. Vansawng khohmuen ah tah amah poekah ha mael bitni.
31Te vaengah kai he amih kah Boeipa Pathen la a ming uh bitni. Kai loh amih te olngainah thinko neh, a yaaknah hna ka paek bitni.
32Vangsawn khohmuen ah kai n'koeh saeh lamtah ka ming he khaw poek uh nawn saeh.
33Thinthahnah he halangnah khoboe lamloh mael uh vetih, a napa rhoek kah khosing te a poek uh bitni. Amih te khaw Boeipa hmaiah tholh uh rhoe.
34Amih te a napa rhoek Abraham, Isaak neh Jakob taengah paek hamla ka toemngam nah khohmuen la koep ka khuen vetih, a mih loh a soah a uktaem ni. Amih te ka pueh vetih tla uh voel mahpawh.
35Amih kah Pathen la om ham paipi ka saii vetih amih te ka pilnam la om uh ni. Amih taengah ka paek tangtae khohmuen lamloh ka pilnam Israel te koep ka khoe voel mahpawh.
