21 Pə fɛɩ sɩ mɑ nyəmɑ-ɩ ɩ́ wɛɛ hʋʋlɛ tɑɑ. Pɑɑ nɑ mpʋ lɛlɑɑ lɑkɩ yɑɑsi ɩnəɣɩ mʋtʋ ɩcɑʋtɛ mɑɣɑmɑɣɑ nyʋɣʋ tɔɔ.
22 Ɩsɛsɛɛmlɛ tʋ huliɣi wɛnɑʋ tɔɔ kɛ́, ɩ tɑ nyɩ sɩ kʋnyɔŋ kɑ́ kpɑ-ɩ.
23 Wei ɩ kɑləɣənɑ ɩ tɔɣɔntəlɛ kɛ ɩ ɩsɛntɑɑ tɔ, pɑ sɛɛ-ɩ nɑ pə kəlɩ wei ɩ puɣusiɣi tɔ.
24 Wei ɩ ŋmɩɩləɣɩ ɩ cɑɑ yɑɑ ɩ too nɑ ɩ́ tɔŋ sɩ: Pə tɑ kɛ ɩsɑɣɑtʋ tɔ, ɩ́ nɑ ŋmɩɩlʋ yʋlʋkʋlʋ pɑ kʋlʋm kɛ́.
25 Wei ɩ hɔŋ ɩ tɩ tɔ ɩ kɔŋnɑ yoou kɛ́. Amɑ wei ɩ pɛtɑ ɩ təɣɩ Tɑcɑɑ tɔɣɔ pə lɑkənɑ.
26 Wei ɩ lɑkɩ ɩ lɑɣɑtʋ kɛ ɩ tike tɔ ɩ kɛ́ kʋmɛlɛŋ kɛ́. Amɑ wei ɩ lɑkənɑ ləmɑɣɑsɛɛ tɔ ɩ wɑɑlɩ kɛ́ pə tɑkəɣɩ.
