1 Təhɛɛ kʋcɔcɔtʋ hɛɛsəɣɩ pɑ́ɑ́nɑ́ kɛ́, nɑ kʋnyɑsətʋ nɑ́ɑ́ kʋsɩ-yɛ.
2 Ye ləmɑɣɑsɛɛ tʋ yɔɣɔtəɣɩ, yəlɑɑ nyɩɩləɣɩ nyəm kɛ́. Amɑ kʋmɛlɛntʋ tɔm kɛ kʋmɛlɛməŋ nɑ́ yɔɣɔtəɣɩ.
3 Tɑcɑɑ nyənəɣɩ pɑɑ timpiɣi, nɑ ɩ́ nɑɑkɩ kʋpɑmɑ nɑ ɑsɑɣɑɑ.
4 Tɔm leleŋ nyəntʋ hɑɑkɩ weesuɣu kɛ́. Ɩlɛnɑ tɔm ɩsɑɣɑtʋ nɑ́ɑ́ wɑkələɣɩ lɑŋlɛ.
5 Kʋmɛlɛŋ footiɣi kʋ cɑɑ kʋsɛɣɛsətʋ kɛ́. Amɑ wei ɩ lɑkənɑ nyʋɣʋ tɑɑ mɑɣɑsəm tɔ ɩ nɩɩkɩ kɑlənɑʋ kɛ́.
6 Pə tɔɔləɣənɑ yʋlʋpɑŋ kɛ́. Ɩlɛnɑ kɑsəyɑɣɑ ɑsilimɑ nyəŋkɑ nɑ́ɑ́ kɔnɑ mpusi.
7 Ləmɑɣɑsɛɛ nyə́mɑ yɔɣɔtəɣənɑ nyəmtʋ kɛ́. Amɑ kʋmɛlɛməŋ nɑ́ fɛɩ mpʋ.
8 Tɑcɑɑ luɣu fɛɩ ɑsɑɣɑɑ kɔtɑsɩ. Amɑ niŋ nɑɑlɛɣɛ ɩ mʋɣənɑ tɑmpɑnɑ təŋlɑɑ kʋsələmʋtʋ.
9 Tɑcɑɑ luɣu fɛɩ ɑsɑɣɑɑ tɔntɛ. Amɑ ɩ sɔɔlɑ mpɑ pɑ təŋəɣɩ tɑmpɑnɑ tɔ.
10 Wei ɩ cɔləɣɩ mpɑɑʋ tɔ pɑɑ hɔ ɩ ŋkpɑŋʋɣʋ nɑ toŋ. Wei ɩɩ nɩɩkɩ kʋkpɑɑlətʋ tɔ ɩ kɑ́ sɩ.
11 Tɑcɑɑ tɑ kisi nyəm kɛ pʋ́ʋ́ɣʋ́ sɔsɔɔʋ nɑ ɑtɛtəlɛ. Kɑcɑŋfɑnɑ yʋlʋpiyɑ lotunɑɑ nɑ?
12 Kɑlɑmpɑɑnɩ tʋ ɩɩ cɑɑkɩ pɑ́ kɑlənɑ-ɩ. Ɩɩ tɩɩ pukinɑ ləmɑɣɑsɛɛ nyə́mɑ hɔɣɔlʋɣʋ.
13 Lɑŋhʋlʋmlɛ hɛtəɣɩ ɩsɛntɑɑ kɛ́. Ye lɑŋlɛ wɑkəlɑɑ ləmɑɣɑsəlɛ hoowɑɣɑ.
14 Yʋlʋ lɑɣɑtʋ́ pɛɛkəɣɩ nyəm kɛ́. Ɩlɛnɑ kʋmɛlɛŋ lɑŋlɛ nɑ́ɑ́ hɛɛnɑ kʋmɛlɛntʋ tɔm.
15 Yʋlʋ lɑŋlɛ ɩ́ wɑkəlɑɑ, kʋyɛɛŋ tənɑ kɛ́ ɩsɑɣɑŋ kɛ́. Ɩlɛnɑ lɑŋhʋlʋmlɛ tʋ nɑ́ɑ́ wɛ ɑcimɑ tɑm nyənɑ tɑɑ.
16 Pə kəlɑ teu sɩ ń wɛɛnɑ pəcɔ nɑ ń nɩɩkənɑ Tɑcɑɑ. Nɑ mpi n kɑ́ wɛɛnɑ toŋ nɑ pə́ cɔɔsəɣɩ-ŋ tɔ.
17 Pə kəlɑ teu sɩ pɑ́ puɣuli-ŋ hʋnʋm nɑ sɔɔlʋɣʋ. Nɑ mpi pɑɑ toŋɩ-ŋ nɑʋ nɑntʋ nim nyəntʋ nɑ tɑ́ɑ́ hɑŋɑɣɑ tɔ.
18 Pɑ́ɑ́nɑ́ tʋ kʋsəɣɩ yoou kɛ́, nɑ suulu tʋ nɑ́ɑ́ hɛɛsəɣɩ yoou.
19 Sɔwɑ nyɑlɑ felentú mpɑɑʋ tɑɑ kɛ́, nɑ yʋlʋpɑŋ nyəŋkʋ nɑ́ɑ́ hʋlʋmɑɑ.
20 Ləmɑɣɑsɛɛ pəyɑɣɑ hɛɛsəɣɩ kɑ cɑɑ lɑŋlɛ kɛ́. Amɑ yʋlʋ kʋmɛlɛŋ nɑ́ footiɣi ɩ too.
21 Ləmɑɣɑsɛɛ fɛɩ tʋ lɑŋlɛ hɛɛkənɑ ɩ kʋmɛlɛntʋ kɛ́. Ɩlɛnɑ ləmɑɣɑsɛɛ tʋ nɑ́ɑ́ kɑmɑ nyʋɣʋ kɛ tɔntɛ kʋpɑntɛ tɑɑ.
22 Ye n lɑkɩ nyɑ́ lɑɣɑtʋ kɛ nyɑ́ tike n kpisiɣi kɛ́. Amɑ lɑɣɑtʋ tɑsəlɑɑ ɩ́ tɔɔ-ŋ ɩlɛ n wɑɑ.
23 Ye yʋlʋ ɩ́ cɔwɑ tɔm ɩ lɑŋlɛ hʋləməɣɩ kɛ́. Ye ɩ yɔɣɔtɑ-təɣɩ tə wɑɑtʋ pə leleŋ wɛ sɔɣɔntʋ.
24 Nyʋɣʋ tɑɑ mɑɣɑsəm tʋ təŋəɣɩ weesuɣu mpɑɑʋ ŋku kʋ pukinɑ ɩsɔtɑɑ tɔɣɔ. Ɩlɛnɑ ɩ́ fiti ɑtɛtəlɛ kɛ ɑtɛ.
25 Tɑcɑɑ yɔkəɣɩ kɑlɑmpɑɑnɩ tʋ təyɑɣɑ kɛ́. Amɑ ɩ tɑŋəɣɩ ɑlʋ leelu tɛtʋ toosi.
