Apostolo 17:7-25

⁷E Iason i matakari ria na ruma vona. Ria lobo ri putu puru a vinara ne Kaiser, ri taki ta i tahoka tabu tara hariki, a rana e Isu.”

⁸Na tahuna e huriki a tahotanga, e huriki a kakaina tanga ri longoa a ngava iea, ri turutu, ri roro viliha.

⁹Muri e huriki a kakaina tanga ri bole a moni dagi ne Iason turana e huriki ri pesi turana, muri ri taki ria ri gi vano.

¹⁰Na rodo iea kunana e huriki a kabukabu ri rudu e Paulus e Sailas ru lakea o Berea. Na tahuna ru bele vonga ru lakea na roho na vaponga ne huriki a Iuda.

¹¹E huriki a Iuda vonga i uka ma ri tagege manga e huriki a Iuda o Tesalonika. Ri vivi ni longo kamumu a ngavane Paulus. Na parava lobo ri matai kado a ngava na Hinere, ri kasisi kamumua, a ngava e Paulus i taki, i muholi manga a hini i taki, o i uka.

¹²Lakea i kupo ne ria ri luhoi torea e Kristo. E huriki a bakovi a ngatavine dagi na robo e Gris ranga ri luhoi torea.

¹³Pali na tahuna e huriki a Iuda o Tesalonika ri longoa e Paulus i vara na nitana Vure o Berea, ri sike lokovonga, ri piurike e huriki.

¹⁴I mavonga e huriki a kabukabu ri vakaha malaviriria e Paulus, ge pori, ge rike na aga, ge lakea o Atens. Pali e Sailas e Timoti ru made mule vonga o Berea.

¹⁵E huriki a bakovi ranga ri taparakia e Paulus o Atens, ri hamule. Na tahuna ta ri gi hamule, e Paulus i talo rike a ngava, ri gi taki e Sailas e Timoti ru gu valai malaviriri vona.

¹⁶Na tahuna e Paulus i dadava e Sailas e Timoti o Atens, i masia a tanga iea, i kupo a maka nitamina vure, lakea i tahate.

¹⁷Lakea i dili na roho na vaponga i ta turane huriki a Iuda, e huriki a Grik ri togoa a Vure. Na parava vakaroro i lakea na tabeke na nivahabi na nivakona a maki, i ta turane huriki ri bele vonga.

¹⁸E huriki a mari ni tovo na lohokanga ni gale e huriki a Epikuria, e huriki a Stoik, ria ranga ri longoa e Paulus. E huriki ranga ri ta maea, “A bakovi iea i ta tavulavula. I uka ma mi longokilalea a ngavana.” E huriki ranga ri ta maea, “I vakalongo kunana na maka vure ne huriki basi.” Ri ta mavonga, a vuhuna e Paulus i vara na Velenga Kamumu ne Isu, na naro na nimahuri mule na matenga.

¹⁹Muri ri tulia e Paulus, ri lakea ne huriki ri vapopo na lolo e Areopagus, ri takia, “Mi ngaru ni lohoka vona a ngava karaba o vakalongo e huriki vona.

²⁰A ngavamu mi longoa i rika na tuline mia, mi ngaru ni longoa a pelegona ngava, i navai.”

²¹E huriki lobo vonga o Atens turana e huriki basi ri made vonga, i uka ma ri ratea tara leho. Na parava vakaroro ri ngaru ni longo a ngava karaba, ri gi vata vona.

²²E Paulus i pesi rike na matane huriki ri vapopo o Areopagus, i ta maea, “Mua o huriki a bakovi o Atens! A matai a narone mua, mua a bakovi na lotu.

²³Na tahuna a laho halui a tanga dagi ne mua, a matai kamumu a maka maki mu vasileki vona. A masia tara dede ni here vona tara nita i ta maea, ‘A dede iea ne vona a vure i uka ma mi lohoka vona.’ A viri mu vasileki vona, i uka ma mu lohoka vona, ngane ga vakalongo mua vona.

²⁴“A Vure, ra i ratarike a malala turana maki lobo ri tabuli vona, ia a Bakovi Dagi na hunu a malala. I uka ma i made na roho ni hae na limana bakovi.

²⁵I uka ma i bala vona tara maki, si gi rata na limane hita ranga maki, si gi habi vona. Ia kunana i habi a nimahuri, a bangona turana maki lobo ne huriki.