APOSTOL 2:1-31

¹Pentikos Panawnah ning a va phah tih taco, zingtu vytei cawh hmingkheh letah hmokheh teitah a pahmo he.

²Sung sungkheh tah thli pui a hrangpaw hrakhei a pyraw cawh avai lang khei za ring ka, a tythlangnah pawhe ing cawh a chih thlang.

³Mataico lui khatah alopaw me khah hmuh he ka, a chaichy patlaw ka, aa cung cacy lekhei a za cawng.

⁴Aa zongmingtei co Thlawpaw Pathai khei chih he ka, Thlawpaw tei a rei sahpaw he hrakhei rei hringpaw tah aa rei aa thlaw.

⁵Ma ningcai cawh raangting letei Khazing a cizawpaw Juda cawngsaw sahlo Jerusalem letah aa ungning cai khah a cang.

⁶Ma pyraw cawh aa thui tihtah cawngsaw rungpui cawh va chuh he ka, zingtu sahlo tei aa cuipaw rei khah aaning leh aa rei cacy khei aa thui tihtah a pacang nápaw hnih bei he.

⁷Aa ningang ngetei ka, “Ma aa rei a thlaw leimeipaw sahlo vytei heh Galili cawngsaw cang bei he maw?

⁸Ma sahlo tei aa reipaw bia heh zekhatah zia tamaw kaaning leh kaa rei cacy tah kaa thui zia?

⁹Kaaning sahlo heh Parthia raang, Media raang, Elam raang le thaikhehpaw sahlo heh Mesopotamia raang letah a ungpaw le Judia raang le Kapadosia raang, Pontas raang le Asia raang,

¹⁰Frizia raang le Pamfilia raang, Izipt raang le Sairin khua kae Libia raang chung sahlo taiteipaw le Rom khua taitei khua a va tlongpaw

¹¹(Juda cawngsaw sahlo le Juda behnah lang a palehpaw Juda mingphing a cang lypaw sahlo) le Krit tuiraw cawngsaw sahlo le Arabia raang taitei a va chuhpaw sahlo ka cang he peh. Ma sahlo tahei Khazing tei hming rungnawpaw a tuapaw aa phychuapaw heh kaaning kaa rei cacy hratah kaa thui thlang dei e!” aa tah.

¹²Aa ningang ka, a rawhnah hnih bei he. Pakheh le pakheh cawh, “Ma heh zemaw a silang a cang?” tatah aa hae he.

¹³Canghrasala thaikhehpaw taco aaning sahlo cawh pasipasa he ka, “Zu aa rui khi,” aa tah he.

¹⁴Macawtaco Piter cawh apostol hluikheh sahlo khakhei a ka daw ka, zawpuipaw cawh o thangpui tah bia ching he ka, “Ka mingphing hui a cangpaw Juda cawngsaw sahlo le Jerusalem letei a ungpaw cawngsaw vytei sahlo, ma kong heh ka ca chingpase tua he a, ka reipaw heh achaw teitah nawthlia tua o.

¹⁵Naa pacangpaw hratah ma cawngsaw sahlo heh zu rui bei he. Atoheh mong suimehlang pakua suipui a cangning kata caw!

¹⁶Khazing khuavang Joel tei a za reihlangpaw khah a cang hri hi,

¹⁷‘Caichangnah letaco, Khazing tah ming vytei cung letah ka Thlawpaw ka luithlang a. Naa sawcapaw sahlo le naa sawcanu sahlo tah bia phy he ka, naa mehny sahlo tah apalynah aa hmuh a, naa mehtaa sahlo tah mang aa sá a.

¹⁸Ma ning leco ka saecanu le ka saecapaw sahlo cung letah zong Ka Thlawpaw cawh luithlang neh ka, aaning sahlo taco bia aa phy a.

¹⁹Cung lang avai letah khuarawha a chuipaw hming chuasá neh ka, a rai lang alui lehei paching pakhanah ka tua a, thisai le me le mekhu ka chuasá a.

²⁰Abuipaw rungnawnah le laisuinah ning a phah hlai taco ning cawh a muisah a, thlawpaw cawh thisai hratah a tua a.

²¹Taico Abuipaw ming a ypaw cawngsaw maikaw cawh pachah a cang he a,’ a tah.

²²Israel cawngsaw sahlo, ma bia he nawthlia tua o, Nazaret Zisu cawh Khazing tah Ama a thongtah naa hrong letah a tuapaw ningang chuipaw, khuarawha a chuipaw le paching pakhanah khatah a za taw caimangpaw a cang tahpaw cawh naaning ceingei heh a hnihpaw na cang he ceh.

²³Khazing tei a pachiapaw le a hnihlang ciapaw hratah ma cawngsaw heh naa kih cung letah peh cang ka, naaning tah mehchawly sahlo bawkhangnah thongtah khraws letah khaipai he ceh ka, naa thaw.

²⁴Canghrasala Khazing taco Ama cawh thihnah taitah patho ka, thihnah tai-ingnah taikhei a thochua, zecawtamaw tatah Ama cawh thihnah tei a tle pakhih khy lypaw a cangnah cawtah.

²⁵Ama a kong letah David tei a reipaw cawh, ‘Ka hme letah Abuipaw cawh ka hmuh paria tei. Kama cawh ka thlawzawng be, zecawtamaw tatah Ama cawh ka cacang lang letah a ung cawtah.

²⁶Macawtaco ka lungthing cawh a thaw chah ka, ka hmokaw zong a lawng ngetei ka, ka pungsaw zong heh hnabeisuinah chitah a hring a,

²⁷Zecawtamaw tatah thlaikho leco pa seisai thlang be ca ceh ka, na Mehpathai cawh a thuh a mang thlangpaw zong sai hrah bei ceh.

²⁸Hringnah langpui sahlo cawh pa hnisah myca ceh ka, na hmekaw letah alawngnah khatah na pa chisah myca a,’ a tah.

²⁹Uny sahlo, kaa mapaw David cawh thi ka, phung he ka, a thlai zong atoning tai ma lehei a ung thlang tahpaw heh raechah teitah ka ca ching he.

³⁰Canghrasala David cawh Khazing khuavang pakheh cang ka, ama a pathlah taitah pakheh cawh ama hratah siangpahrang a cang tae a tatah Khazing tah chia a sah hmotah bia a kang tahpaw khah a hni.

³¹Hmelang cai letei a cang lepaw khah a hmuh hlang cawtah Khri a tho kaw nápaw kong letah a reipaw cawh, ama cawh thlaikho letah seisai cang be, a pung zong thu hrá be a tahpaw a cang.