Aposol nup meme 10:13-33

¹³Etketka miaŋgöreŋ qet kun asuhuba keu kewö jii mörök, “Pitö, gi mönö wahöta yuai ki qeba ohoba nenöŋ.”

¹⁴Mewö jii mörökmö, Pitönöŋ jiyök, “O Kembu, mewö qahö kötökŋi! Mi dönqizinŋambuk. Ni nalö kunöŋ yuai aŋgöjörakŋambuk mi kude neal. Ni miaŋgöra imbiloŋloŋ mötzal.”

¹⁵Mewö jiiga qet miaŋön kunbuk asuhuba yaŋgöra jiyök, “Anutunöŋ yuai jim könjörari ahözawi, göŋön miaŋgö qetŋi aŋgöjörakŋambuk mewö qetnöŋga qahö dop kölja.”

¹⁶Yuai mewöŋi mi kunbuk asuhui indimŋi karöbut ahök. Indimŋi karöbut aiga miaŋgöreŋök könde mi kunbuk örögetka Suepnöŋ öŋgöyök.

¹⁷Pitönöŋ imut mi eka miaŋgö könaŋaŋgöra köŋkuŋ aka mötmamgö möt bibihiba tarök. Mewö tariga nalö miaŋgöreŋök Korniliusnöŋ azi melaim eŋgii kaba Saimongö miri jaruba miaŋgöra qeqesi aka miwikŋaiba kaŋgota miri naŋguŋe kinget.

¹⁸Miri naŋguŋe kinda kewö qeta qesiget, “Saimon qetŋi alaŋi Pitö qetzei, yaŋön miri kiaŋgöreŋ malja me qahö?”

¹⁹Pitönöŋ toroqeba imut miaŋgö könaŋaŋgöra möt bibihiba tariga Uŋa Töröŋan kewö jii mörök, “Mötnöŋ, azi karöbutŋan kaba gi jarum gihize.

²⁰Nöŋön azi mi melaim eŋgibiga ki kaze. Miaŋgöra mönö dölki wahöta geba uruyahöt mosöta yembuk anman.”

²¹Mewö jiiga Pitönöŋ azi mieŋgöreŋ geba jiyök, “Mötket, iŋini azi jaruzei, nöŋön mia akzal. Mönö denöwögöra kaze?”

²²Jiiga meleŋget, “Suahö galöm Kornilius mi azi diŋdiŋi akza. Yaŋön Anutu waikŋi memba möpöseiba mali Juda ambazip kambu körek yeŋön göda öŋgöŋgöŋi qem waŋgimakze. Anutugö garata töröŋi kunŋan asuhum waŋgiba kewö jim kutui mörök, ‘Gi mönö kolek ala Pitö köl öröm waŋginöŋga mirige öŋgöba keu uruŋeyök jimawi, mi kezap ala mötman.’”

²³Mewö meleŋgetka öröm eŋgii miri uruŋe öŋgögetka köyan köl eŋgii köisirik tata ahöget. Ahögetka miri giaŋiiga Pitönöŋ wahöta yembuk anök. Jopa taon miaŋgöreŋök ala tosatŋi eŋgömeiga yambuk mohotŋe anget. Mewö.

²⁴Mohotŋe anda sömaŋi mohot ahöba anda mala Sisaria taonöŋ aŋgotket. Aŋgotketka Korniliusnöŋ yeŋgö mamböt aka malök. Mewö mala tinitosolom aka alaurupŋi ölöpŋi mi köl öröm eŋgii miriŋe tokoba tatket.

²⁵Aŋgota Pitönöŋ mire öŋgömamgö aiga Korniliusnöŋ wahöta eta jölöŋi jiba könaŋe geba sipköm waŋgiyök.

²⁶Sipköm waŋgiyökmö, Pitönöŋ böröŋe memba kököbihiiga wahöri kewö jiyök, “Mönö wahötnöŋ, nia kun gölme aziyök akzal.”

²⁷Mewö jii yambuk eraum möta miri uruŋe öŋgöyohotka ambazip gwötpukŋan tokoba tatkeri, mi eŋgehök.

²⁸Eŋgeka kewö jii mötket, “Iŋini Juda ambazip neŋgö könaŋamnini mötze. Juda nini ambazip kianŋi eŋgö mire öŋgöba embuk köisirik tatatkö soŋgo ahöi osizin. Mi osizinmö, Anutunöŋ keuŋi kun kondel niŋgiba kewö jiyök, ‘Göŋön ambazip iŋi waiŋi yeŋgö qetŋini mi aŋgöjörak imbiloŋloŋambuk mewö kude qetman.’

²⁹Miaŋgöra iŋini kolek ala köl öröm niŋgigetka nöŋön qahö qetala kaba kaŋgotzal. Kaŋgota kewö qesizal: Iŋini mönö wuanöŋgöra kolek ala köl öröm niŋgiget? Mi ölöp jiget mötpi.”

³⁰Mewö jiiga Korniliusnöŋ meleŋnök, “Ni mare kunöŋ nalö kewöŋe 3 kilok miaŋgöreŋ mirine tata köuluk nup memba mala kotpi merak sömaŋi 4 akza. Köuluk nup memba malbiga miaŋgöreŋök azi kun sileötaŋi asakmararaŋambuk miaŋön asuhuba wösöne kinök.

³¹“Wösöne kinda kewö jiyök, ‘Kornilius, gi köuluköba malnöŋga keugi Anutugöreŋ öŋgöiga möri ölöwakza. Gi kalemŋi kalemŋi ambazip wanapŋi mendeŋ eŋgimakzani, mi Anutunöŋ möta aŋgön köla göhöra mötmöriba melaim niŋgiiga kazal.

³²Miaŋgöra mönö dölki kolek alnöŋga Jopa taonöŋ aniga azi qetŋi Saimon, qetŋi kun Pitö qetzei, ia waŋgita kame. Yaŋön sömbup sileŋaŋgö nup meme azi Saimon yaŋgö mire köwet jitŋe malja.’

³³“Mewö jiyöhaŋgöra aka nöŋön miaŋgöreŋök kolek albiga göhöreŋ kaget. Göŋön keuni möta kazanaŋgöra uruni ölöwakza. Kembunöŋ keu pakpak jimangö jim kutum gihiyöhi, göŋön mi ölöp jinöŋ mötpin. Nini pakpak dölki miaŋgöra tokoba Anutugö jemesoholŋe ki tatzin.” Mewö.