Aposol 7:16-49

¹⁶Kee teꞌ hah ee maꞌ pa sioniire, ko pe ee po vapeepe vëh ne Abraham to voen taneꞌ voh pa ma koaꞌ pe Hemoꞌ manuh Sekem.

¹⁷E Stivin to vavaato avoeꞌ e non, pareꞌ soe pan, “O poen to tavus vatët en pa ö ne Sosoenën to soe vaman vavoh manih pe Abraham, suk a napan va Israël to se peo rakah ee manih Isip.

¹⁸Ka meh teꞌ tavus en a teꞌ sunön manih Isip, a teꞌ pamëh to hikta nat non e Jeosëp.

¹⁹A teꞌ sunön pamëh to vatomore ke voh a napan pea, pareꞌ hat rakah ke voh non a kën sipuura. Eꞌ to rës rakah voh non a ma koaꞌ sosoneꞌ vahuh varuꞌ po Jiuꞌ, pareꞌ vi tavus këh voh raoe a vöön, pan ee se mët.

²⁰Manih po poen pamëh a mu Jiuꞌ to vahuh en pe Mosës e koaꞌ ep vavih po epep pe Sosoenën. A poa manot to matop ne Mosës pa iuun pee pa kukön sivö.

²¹Ee to me këh ee peꞌ pa iuun pee, pare këh ke ee maꞌ peꞌ. Ke semon Përo ep in e Mosës, pareꞌ me en peꞌ, ko vaꞌpuh poan vamanih pe koaꞌ peꞌ.

²²E Mosës to apuh ko nö en pa siku, ko kon rakah en po nat vih pa ma taateꞌ va Isip, pareꞌ teꞌ non a teꞌ vih me a teꞌ susun.

²³E Mosës to teꞌ non o 40 kirismas, pareꞌ iu nö non pa ep pa kën poaneah, a napan va Israël.

²⁴E Mosës to nö, pareꞌ ep in a to Isip to ipip non a teꞌ va Israël, pareꞌ vaꞌaus en peꞌ, ko ip vamët en pa to Isip.

²⁵E Mosës to koman non pan, a kën poaneah, a napan va Israël se nat e ne pa ö ne Sosoenën se vaꞌaus raoe, ko me tavus këh raoe a nohnoh va Isip pa koren e Mosës, ivëhkëk, ee to hikta nat ne pa tah pamëh.

²⁶O meoh poen ne Mosës to tavus a poa to Israël to vavapus ne, pareꞌ iu ki non raoe, pan ee se koe a vapus. Eꞌ to soe ke raoe pan, ‘Eöm a poa tom kea, eöm vavapus suk nem ataeah?’

²⁷Ivëhkëk, a teꞌ vëh to taneo po vapus to toon ke e Mosës, pareꞌ soe pan, ‘A teꞌ to vateꞌ oah e susun me a teꞌ to kiiki hat ka no möm?

²⁸Eën to iu ip vamët e nom peöꞌ vamanih pa ö nën to ip va in a to Isip nopoen, ha?’

²⁹E Mosës to tënan a soe vëh, pareꞌ rusin en manuh pa muhin va Midian. Eꞌ to vaen en pa vöön pamëh, ko vatvus en pa poa koaꞌ oeteꞌ.

³⁰O 40 kirismas to oah ee, ka ankeroꞌ pe Sosoenën tavus e Mosës koman o tëkrea to susun taneꞌ non pa vu veovöön manih pa moeh upin, sinten a Tope Saënaëꞌ. Ivëhkëk, o tëkrea pamëh to hikta ësës non a vu veovöön

³¹E Mosës to ep in a tah pamëh, ko pah toksean rakah en, pareꞌ huk vatët en pa ep. Ivëhkëk, eꞌ to tënan e Sosoenën to soe pan,

³²‘Eöꞌ e Sosoenën pa kën sipuneöm, e Sosoenën pe Abraham, pe Aësak, me Jekop, ee to vavatet voh ne a ma soe peöꞌ.’ E Mosës to naöp ko rikrik e non, pareꞌ hikta iu kuteꞌ hah non.

³³Ke Sunön soe ke Mosës pan, ‘Pureꞌ a suꞌ pën, o oeh vëh nën to sun nom, eꞌ o oeh peöꞌ, pareꞌ vivihan.

³⁴Eöꞌ to ep vahik eoꞌ pa ma taateꞌ hat no napan va Isip to nonok ne manih pa ma napan peöꞌ. Eöꞌ to tënan a ook pee, ko nö eoꞌ maꞌ pa me tavus raoe. Ivëh, kën se nö maꞌ, köꞌ vanö a oah manuh Isip.’

³⁵E Mosës a teꞌ no a napan va Israël to rës voh. Ee to hi voh poë pan, ‘A teꞌ to vateꞌ voh a oah a teꞌ se matop, ko kiiki non a ma hat pemöm?’ E Mosës a teꞌ ne Sosoenën to vateꞌ voh pa kon hah a ra pa vaꞌaus pa ankeroꞌ vëh, to tavus voh poan manih pa ö no a suraꞌ to ësës voh non.

³⁶E Mosës to nok voh a ma tah vatoksean manih Isip, pareꞌ me tavus këh a möm a muhin va Isip, me eꞌ to vaphan a möm pa Tahiꞌ Ereraꞌ, pareꞌ meeme vah ka no möm pa moeh upin komön o 40 kirismas.

³⁷E Mosës a teꞌ to soe ke voh a napan va Israël pan, ‘E Sosoenën se vanö ka maꞌ neöm a teꞌ vanënën soe vamanih pa ö neꞌ to vanö vavoh maꞌ neoꞌ. Eꞌ a teꞌ koman va po vuteꞌ peöm.’

³⁸E Mosës to vatönun me voh a napan me a kën sipuura manuh pa moeh upin. Eꞌ to teꞌ vaꞌpeh me voh non a kën sipuura. Po poen ne Mosës to peah pa tope, ka ankeroꞌ heꞌ voh e Mosës a soe va po toꞌtoꞌ, kuru vëh na to teꞌ me no.

³⁹Ivëhkëk, a kën sipuura to rës voh e ne pa pënton a soe peꞌ, pare heꞌ tonun in poë ko iu nö hah voh e ne Isip.

⁴⁰Ee to soe ke voh e Aron pan, ‘Eën se nës ka möm ta ma sosoenën tah nöꞌnës, kee se vovoh ka no möm. Emöm to hikta nat nem pe Mosës vëh to me këh voh a maꞌ möm a Isip, eꞌ teꞌ non nih.’

⁴¹Manih po poen pamëh a napan to nës ee pa tah nöꞌnës va pa purmakaöꞌ, pare ës a ma tah vamanih po heꞌ pee manih pa tanöꞌ nës. A napan to vaënëën vaeö suk a ma tah nee to nok pa koreere.

⁴²Ivëh, ke Sosoenën heꞌ tonun en pee, pan ee se hinhin ne a ma vesun varih pa akis vamanih pa ö no teꞌ vanënën soe to kiun vavoh komön o Puk Vapenpen, pareꞌ soe pan, ‘Eöm a napan va Israël, eꞌ hikta teꞌ voh non pan, eöꞌ ivëh, nöm to heꞌheꞌ voh nem a ma heꞌ peöm pa ö nöm to ësës nem a ma purmakaöꞌ me o sipsip, pa ö nöm to teꞌ nem pa moeh upin po 40 kirismas.

⁴³Eöm to vavaateꞌ vah voh nem a topa vasioꞌ teꞌteꞌ vah pe sosoenën Molëk, me a tah nöꞌnës va pa vesun, nee to pokaꞌ Refan e ne, eꞌ a ma tah nöm to nok tariuk voh, eöm to kë nem raoe vamanih pa ma sosoenën peöm. Ivëh, köꞌ se vanö a neöm, köm teꞌ varo nem maꞌ paan a matop pa Babiron.’”

⁴⁴E Stivin to vavaato avoeꞌ e non, pareꞌ soe pan, “Moaan voh a kën sipuura to teꞌ voh ne pa moeh upin, manih po poen pamëh ee to eok voh a topa vasioꞌ teꞌteꞌ vah pe Sosoenën. Ee to eok rakah vamanih pa ö ne Sosoenën to vataare vavoh in e Mosës.

⁴⁵A kën sipuura to öt taneꞌ pa ma tamëëre a taateꞌ va pa eok a topa vasioꞌ teꞌteꞌ vah pe Sosoenën, pare nö vaꞌpeh me voh a iuun po poen ne Josuaꞌ to kon a muhin pa meh napan. E Sosoenën to veo a napan këh o oeh, kee vaneah varuꞌ e ne. O vu eok iuun pamëh to öök voh po poen ne Devit to teꞌ non.

⁴⁶E Devit to ep vamanin pa epep pe Sosoenën, ivëh, ke Devit hinhin non e Sosoenën a ö neꞌ se voh vaonöt ke poan a eok a Iuun Hinhin Apuh.

⁴⁷Ivëhkëk, e Solomon ivëh to eok voh pa Iuun Hinhin Apuh.

⁴⁸Ivëhkëk, e Sosoenën to teꞌ oah rakah e non, eꞌ to hikta teꞌ non koman a iuun eok po teꞌ vamanih pa ö no teꞌ vanënën soe to soe vavoh,

⁴⁹“E Sosoenën to soe pan, ‘Vöön va kin eꞌ a ö ihoꞌ peöꞌ, ko oeh eꞌ a ö vavakom, a iuun taeah nöm se eok ka neoꞌ? Eꞌ heh a ö ihihoꞌ nöꞌ se ihoꞌ ko vanot?