Aposerɨhiya 13:27-40

²⁷Napihɨhandɨ kandɨ isɨhiya Jerusaremɨhandaahiyaunɨ Autaahaatɨhomɨ aŋɨ awaindɨhandamɨ mɨtɨhiyaunɨ wɨndɨ baiwɨ Jisaasihopɨ nyangi japɨhɨ nanyamaitandɨhoe tɨwɨ gɨmunyaahopo. Aiwɨ kiya Autaahaatɨhomɨ pɨwɨha jɨhura ausaahohiyɨhiyaamɨ pɨwɨha jɨpatɨpiyohɨha kiyaamɨ Sapaatɨhandɨ nahatewetɨ awɨtohɨhaapɨ wɨndɨ baiwɨ gɨmunyaahopo, owetise. Aiwɨ kiya Jisaasihopɨ napone tɨwɨ katauhɨ Jisaasihoai tiwauhɨ napotaise. Aiwɨ kiya sandɨ kiyawaawɨ Autaahaatɨhomɨ pɨwɨha atiwɨ nepɨ ausaahohiyɨhiyaamɨ pɨwɨha Jisaasihopɨ yaawatɨ naaŋɨhandɨ naitaise tɨwɨ katohɨmumwaaŋɨ kamwaaŋɨ tɨtɨhɨ kiyahaayo tɨwɨ wɨndɨ baiwɨ gɨmunyaahopo, owetise.

²⁸Aihɨ Jerusaremɨhandaahiyaunɨ aŋɨ awaindɨhandamɨ mɨtɨhiyaunɨ Jisaasihoai tiwɨtaatɨwɨ komɨ maipɨhandɨ kaindɨhandɨ wɨndɨ monɨhopo. Wɨndɨ monawaahandɨ kandɨ Pairotɨho Jisaasihoai nehɨhandɨ kiyatɨ tiwɨtotɨwɨ kaundawaatopo.

²⁹Iyataatɨ jɨhura Autaahaatɨhomɨ pɨwɨha atiwɨ nepɨ ausaahohiyɨhiya pɨwɨha katɨwɨ jɨpatɨpiyohɨmumwaaŋɨ kamwaaŋɨ kaiwɨ aimɨ owetihɨ Jisaasihoai ipɨ tɨtɨhɨ atawɨhatetapɨ nepɨ jomaahɨpatɨ wɨtɨ isɨhiya kaiwɨhataatɨhɨ ahiyawaayopo.

³⁰Ahiyauhɨhandɨ kandɨ Autaahaatɨho ahowimasɨhɨ Jisaasiho japɨhɨ nepataise.

³¹Nepasi yamɨhapataatɨhapɨ wɨndɨ tɨtɨhɨ ketɨ namaise. Namaayatɨ bimihɨ isɨhiya Garirihanda namasi Jerusaremɨhanda jɨhura daayawaasohiyɨhiya komɨ otɨpɨpatɨhiya Jisaasihoai asisɨha pɨhɨtɨwɨhaiwetɨ usonawaayopo. Aihɨ isɨhiya siya Jisaasihoai usonɨhohiyɨhiya komɨ kaiwaiwaapɨ ausaapɨ Judaahiyai taawɨ kaundawaatopo.

³²Aihɨ yɨhoaaŋɨ Autaahaatɨhomɨ pɨwɨha isɨhiya maaritɨtaatɨwɨha ausaaha kasatahaato. Pɨwɨha isɨhiya maaritɨtaatɨwɨha siyahaare, Autaahaatɨho Jisaasihoai japɨhɨ ahowimatɨ numwaataise. Iyataatɨ sandɨ jɨhura nyamɨ asoyai akɨtɨnɨhɨ kaitandɨ pɨwɨha kaundisɨha wanɨ nyangisaapɨhɨ akɨtɨhandɨ kiyataise. Iyataatɨ Daawitɨhomɨ pɨwɨha Aunɨhɨhɨramɨ utɨpɨhandɨ kasɨnɨhandaatɨhɨ Jisaasiho japɨhɨ nepaitandɨhandapɨ katatɨ ahaisɨha satahaare: “Nɨnɨ gi ahohimatɨ japɨhɨ nangɨmaahonɨhɨ kɨnyɨ noaipapɨ nisɨ maasɨhɨhoŋɨ akohoŋɨtinɨhɨ nɨnɨ noaipatɨ gapɨhonɨnimatataayo,” tatɨ Autaahaatɨho katihɨ Daawitɨho jɨpatɨpiyatɨ ahaisɨhaare.

³⁴Jisaasiho wɨndɨ namaapwɨtandɨ Autaahaatɨho japɨhɨ koai ahowimatɨ numwaataise. Aihɨ sandapɨ Autaahaatɨho Jisaasihoai kaundɨtandɨhandapɨ Aisaiyaahoai Autaahaatɨho netɨ gɨwunyaasɨhɨ Aisaiyaaho sata ahaisɨhaare: “Nɨnɨ gaahaiwa nɨwahonisɨhaiwa jinjapɨhɨ ahotɨtandɨhaiwaapɨ Daawitɨhoai kaundohɨwaiwa gisunɨ isɨhiya kinyapɨ gɨhunyaasaihɨhiyaisunɨ nasamɨto,” tatɨ Autaahaatɨho Aisaiyaahoai netɨ gɨwunyaasɨhɨ ahaisɨhaare.

³⁵Iyataatɨ Aunɨhɨhɨrɨ Samɨhandɨ wɨndaatɨhɨ Daawitɨho Autaahaatɨhoai sata kaundatɨ ahaisɨhaare: “Kɨnyɨ kinyɨ otɨpɨpatɨho pɨwɨha atingisatɨ kaisɨhomɨ ambɨpatɨ kiyatɨ namasaatɨtandɨ wɨndɨ namaamaitaise,” undatɨ ahaisɨhaare.

³⁶Sa pɨwɨma sata ahaisɨma Daawitɨhopɨhaamaahe. Daawitɨho Autaahaatɨhomɨ maaritirɨhɨrɨ kɨretɨ japepihɨra isɨhiyai andɨtɨwiwatɨ kiyataise. Kiyatɨ bimainjatɨ ipotɨhura napwihɨ satoyai ahiyohɨpɨpɨhɨ ahiyauhɨ namasaatataise.

³⁷Iyataatɨ wanɨ Autaahaatɨho jomaahɨpataatɨhapɨ ahowimatɨ japɨhɨ numwaasɨhɨ so wɨndɨ komɨ ambɨpatɨ namaamasaatise.

³⁸Aisɨ naisɨhiyaate, Jisaasiho so napotatɨ japɨhɨ nepasɨtɨndaahɨ Autaahaatɨho samɨ maipɨhaiwa nesamaitandɨhandapɨha pɨwɨha yɨhoaaŋɨ ausaaha kasatahaato. Aisɨ sahɨ sandapɨ baiwɨ gwɨnyaapɨse.

³⁹Iyataatɨ isɨhiya Mosesihomɨ wɨnɨhapɨpa japepihɨrohiyɨhiyaamɨ maipɨhaiwa Autaahaatɨho wɨndɨ nemwaamaitaise. Iyataatɨ amɨ Autaahaatɨhoaisangi kiyai wɨndɨ isɨhiyaatɨ tɨtɨhɨ ainahiyɨhiyaate mundɨtaise. Iyataatɨ Jisaasiso sopɨ isɨhiya nahatiya gɨwunyaahohiyɨhiyaamɨ maipɨhaiwa Autaahaatɨho nemwaitaise. Nemwatosatɨ Autaahaatɨho kiyaisɨ, “Sahɨ tɨtɨhɨ ainahiyɨhiyaate,” undɨtaise.

⁴⁰Iyataatɨ Autaahaatɨhomɨ pɨwɨha atiwɨ nepɨ ausaahohiyɨhiyai Autaahaatɨho netɨ gɨwunyaasɨhɨ kiya pɨwɨha wa satɨwɨ jɨpatɨpiyohɨhaare, “Nisapɨ sisɨpɨtohiyɨhiyaate, sahɨ atiwɨse, sahɨ bimisaihɨ nɨnɨ kaitandiyohɨtɨhandɨ kaito. Kaisanɨhɨ isɨhiya usa sandapɨ ausaapɨ baiwɨ kasatisaihaahɨ sahɨ wɨndɨ gɨmunyaitaapo. Aiwɨ sahɨ sandapɨ napinde tɨwɨ baiwɨ gɨmunyaawaawɨ napwɨtaapo,” tatɨ Autaahaatɨho kiyai netɨ gɨwunyaasɨhɨ kiya ahiyohɨhaare. Ahiyohɨhaasɨ sahɨ jaawo. Wiwa Jisaasiho kaiwaiwaapɨ wɨndɨ baiwɨ gɨmunyaapɨpano. Jɨhura Autaahaatɨhomɨ pɨwɨha atiwɨ nepɨ ausaahohiyɨhiya katohɨwɨmaiwa wiwa sangisaapɨhɨ napɨtaiso,” undatɨ Porɨho kaundataase.