Aposel 7:32-60

³²‘Jo dah badeh, Kindrei ta tamam oro. Jo Kindrei ta Abraham, ta Aisik, ma ta Jekop.’ Eme Moses totoreh, ma inoh ma madan bala loken bwe.

³³“Ano Laban tiye i tan anya, ‘Ou tolowei ku-i katim ki-iu, kon ou ales areu aliy badeh, turuwen.

³⁴Jo badeh, ndranyolom sisi-in ndra-in labai tiri lau tek are Ijip. Jo badeh, ndranuhun ndrelen tiri, ya eme jo ndrame andri dah ta aseben iri kame len kado mwasin. Abo, ou suri ou ya jo kasuni ou ala hamon ala Ijip ja.’

³⁵“Iy Moses dah le mene adeh iri badeh, asehek na boho iri anya ‘Are lau atehei ou atondrok ahi ma asehek sahou nyarahan eme tahi?’ Iy le badeh, Kindrei suni iy ili atondrok iri, ma ta akohok iri ame len na seben ta angelo mene asahan hawen udu bolo jih.

³⁶Iy badeh, kuhi iri ame len ta Ijip ma iy amekes kalem tinan tinan udu Ijip, udu gwa ndras aloh Retsi, ma iy sariye iri ado kon lomale an, jaha ma hanoh (40).

³⁷Iy Moses le doh mene adeh tiye i tiri lau badu Isra-el anya, ‘Kindrei kameh suni propet ari ewek taha i le buku jo badu bolo ado amwenen.’

³⁸Iy le badeh, mene udu ndrokowa iri lau badu Isra-el ado kon lomale an udu hawe tama taha iri. Ma iy udu hawe angelo mene asehek sahou i tan udu mandrei Sainai, ma iy akohok sahou awas ta asehek nyala taha.

³⁹“Arile, tubu taha iri badeh, baseken iy bwe, ma iri tikahei iy ma udu ndrine iri badeh, iri lomondra ili hamon ja ili Ijip.

⁴⁰Ya eme iri ame tiye Aron anya, ‘Ou amekes rayah kindrei ya iri ka-en bwena ta to ja. Iy lau Moses ta sariye to ame dah badeh, to bala tanan sasah ndrasahan tan udu mandrei Sainai kodo-oh bwe!’

⁴¹Na len doh badeh, iri mesekei sukumada lakou ari asahan i buku nadu bulumakau. Eme iri atiye lakou i nyara salom eme ta asun i tan, ma iri amekes tine nyamon ta atudun lakou iri amekes na mine iri doh.

⁴²Arile, Kindrei atehei konan i tiri ma mesekei iri ala atudun iri lakou badu bada kandrah. Idoh amwenen le ta sahou mene torowenei udu bolo tarou tiri propet i buku doh: ‘Aha Isra-el, na len aha mene ado kon lomale an udu bolo jaha ma hanoh (40), aha atiye lakou i nyara salom eme tek deh bwe?

⁴³Bwe handru! Asiu balei mene aha bwese, tek bwe, ta kindrei ta wasai Molek le, ma sukumada kei i buku ndrau ta kindrei taha ta wasai aloh Repan; oro sukumada kei doh ado asah, ta aha atudun iri. Ya eme idah kameh, jo kameh tikahei aha au a len ala kon munyak tinan Babilon.’

⁴⁴“Iri tubu taha iri badeh, mene kuhi asiu balei ta Kindrei ma sahou handru tan udu bolon mirihik tiri, udu kon lomale an. Amekes doh mene in hamon ta boho Kindrei tiye i ta Moses, amekes in hamon ta malawin Moses ndranyolom.

⁴⁵Ano udu hamon badeh, tubu taha iri bwese-ei udu mine tama iri, ma an hamon ta Josuwa, ma akohok iri kon munyak tinan mene Kindrei takahei iri au. Eme asiu balei doh udu gwek, eme taku len ta Debit asahan.

⁴⁶Eme iy aluwi budon ta Kindrei badeh, aseken iy ma ndremenyani Kindrei i buku none iy kaseken, badeh, iy katahi ra-em asiu ki asumwe Kindrei ta Jekop.

⁴⁷Arile bwe, idoh badeh Solomon labai tahi asiu i asumwe Kindrei.

⁴⁸“Arile bwe, Kindrei udu bwele-e kindrei mari badeh, bamanyah bado asiu ala lau amekes na mine iri bwe. I buku none propet ari asehek i buku doh,

⁴⁹‘Kandrah badeh, ndrahu manyah tek labai, ma munyak badeh, ndrahu katik. Ma Laban anya, saba asiu handru ado anya kamekes keme asumwek? Ya ndrahu amunyau tek kameh kudu heh bah?

⁵⁰Sebwe, jo bamekes lakou mari bwe, nadeh?’

⁵¹“Aha badeh, ta tebelese handru en! Ma ndrine aha badeh, ndradah na kindrei ta wasai i buku iri lau tana iri Kindrei handru bwe, ma ndranye aha ndralun ma aha winiyan banuhun sahou handru ta Kindrei, bwe! Aha badeh, i le buku none tama aha oro mene. Aha banuhun sahou ta Malawin Ndrabun bwe!

⁵²Are propet asahan bwena mene, ya tama aha oro mene badai iy bwe? Oro mene adai iri propet mene asehek ta nyala ndramak mwasin handru kameh barasahan. Ya eme na dah, iy ndrame, arile aha badeh, atehei sa-oh ma adai iy imek.

⁵³Aha mene andrei batanau malen udu mine iri angelo, arile aha ba-en hamon ta aliy bwe.”

⁵⁴Eme na len iri anuhun sahou doh badeh, iri abolosen handru ma lihi iri asenyer i tan.

⁵⁵Arile Stiben badeh, idih handru na Malawin Ndrabun, ya eme iy suri madan ili bolo kandrah, ma iy anyolom lomadan ta Kindrei, ma anyolom Jises ales udu loboho lim salin ta Kindrei.

⁵⁶Eme iy anya, “Ado kanyolom! Jo anyolom bolo kandrah asak ma jo anyolom Nadu Ndramak Awas ales udu lim salin ta Kindrei.”

⁵⁷Eme iri arah ma sokei ndranye iri na lime iri, ma iri sakaliye ala hawen ma tawi iy,

⁵⁸ma aluwi iy eme len ta kon tinan, ma orou iy na bek. Ya iri lau nane amekes sahou wendreya, ta adeu Stiben i ta sahou, badeh, talou awin tiri iu, ya iri akahei ili udu kati iy ndramak loweu ari, nyaran Sol.

⁵⁹Iri badeh, abo gok le ta orou Stiben na bek ai, ta adi iy kimek. Iy eme asolom bohon i tinan ili ta Laban i buku doh, “Laban Jises, ou andrei malawik ai.”

⁶⁰Ano badeh, iy atehei bwili ndru-un udu andri, ma iy aloh i tinan i ta Kindrei i buku doh, “Laban, balem kamani kandriyen ndra-in toro nane amekes eme tek doh.” Iy asehek sahou doh ano le badeh, ma iy imek.