Aposel 4:23-36

²³Mo Pita Ion nata waaubamono nomone antone sosou mampo wimone dima uduudu pirisi debamau ita apana tontau diamoiena benemawanton.

²⁴Sumanai sosou mo gagalou etane mo insaisau deasane God mampe rauparintone waienase, “Tatamba, uduudu ipa e atoawo! E uba, tawo, ita owa dewamoana. Dima uba tampe ita tawo osowe ita do owa bedewe wineia e os dewamoatuwan.

²⁵E Aleu kakaiwa bedewe nolaa dewalala no atanosimba Dawid moawe gagaloitene wanase, ‘Uwa daitada apanawa dima baiwa nuau kadikadileidio rasantoi ita nitu ipasia kadiwa inseie dewasai?

²⁶Tawo warereu uduudu ona baiwa imaantoie waimoi, ita tawo onionialala insaisau deasai Tatamba God ita me Kerisowa sonabalala nata onau enapua baiwa.’

²⁷No bolamba ema bedewe Erod ita Pontias Pailat, ita bola daitada apanawa ita Israelwa uduudu auwenatue insaisau deasane e nolaa dewalala kakaiwa Iesu sonabeana onawa enane bosaiena. Sa ipa dima Dawid mapo wana tauma no bedembo segaleno ewatana.

²⁸Dima bautaido e mukaa mampe insaisawaitene ituana segalepona mo tauma dewasaiena.

²⁹Tatamba, mo badowa dianeiena nolamba ema eta, naita dia mo no kadinepu. Mo dima waiena insee e nolaa dewalala saunee muka nenawo mai sa ba mala do badowa enate e aiaa amonantata.

³⁰Mako, e nolaa dewala kakaiwa Iesu ebowe nolantontaa mampe e mukaa sabamosae apana kerolala inamoa. Ita do menanedia no nolamba bedewe e Iesu ebowe ginasa pokawaau dewamoa.”

³¹Mo raupari diasaieno aupeaupe mo naepe auwene waimoia bolawa uwauwalen, etaetawa abo wanatata debama segalepona. Epe segaleidio bedewe mo uduudu osouwo Aleu kakaiwa iene nopemono mai sa ba mala do badowa enane God aiawa amonantone anton.

³²Tane sumanailala uduudu nuau ita insaisau deaida waimoie. Mo bedeuwo mai sou dea da nituwa da anatepona, dia, tane dima uduudu mo mampoa sosou do eda amonantoie.

³³Ita aposel mukau debama mampe Tatamba Iesu bo bedewe enenwisena benemawantoiena. Mo epe nolantoio God amonawa euda mo uduudu wanamodio dauwa eteie.

³⁴Ita mo nuau dea waimoia bedeuwo sosou isiwa mida dogou waiwa ba du mampo winamoia gimaramone manewa wadane wimone aposel wau bumpe teamoiena. Ita mane sa mo mida abolawantoie menamodia rua wanamoiena. Sa baiwa mo uduudu rua os waimoie, mo bedeuwo mai dea da nitu da abolawalepona, dia.

³⁶Tane Saipirus apanawa Iosep, me Iuswa, Liwai damba bedewe mulena, dogowa waiwa dea gimaralene manewa wadene aposel wanamon. Tane aposel me ebowa da waia Banabas. Ebo ema ipawaida ipa wadodomana apanawa.