Aposel 2:4-38

⁴Kis Gun nimei dana ono bilein eu dewenegana cunug ihoc len. Age cunug beilamaga falicdocob je filfil madecnu Kis Gun ihoc cesuladen eu odi madein.

⁵Odocob saen euna Juda dana leih Jerusalem ono bilein. Age cuha fecnu dana ititom hatu filfilnadec cegulein.

⁶Saen age hutan eu dah mimeig dana am ben cegulein. Age osolosol je madec gug filfil mamadegin dah madeinnu age cunug dadanein.

⁷Tumatumaeeig wawaga cacaden madein, “Dana je madegina i age cunug Galilidec.

⁸Euqa ege cunug egena je gul mamadegin egedodoc ihoc dah madoqona eu adi?

⁹Ege Patiadec, Midiadec, Ilamdecca. Ege Mesopotemiadec, Judiadec, Kapadosiadecca. Ege Pontasdec, Esiadecca.

¹⁰Frisiadec Pamfiliadecca, Isipdec, Libia hatuna Sairini cemenugca. Ege leih Romdec dana.

¹¹Ege leih eu Juda dana bahic, ege leih eu Juda dana ibuldom. Ege Krit nuidec Arebiadecca. Euqa ege cunug egena je gulna Anutna gagadic odocnu dah moqona!” ein.

¹²Odocob age cunug wawaga cacaden dadanecca sisildocobsisildocobein, “I eu cel gugnu?” ein.

¹³Euqa leih age dana wawaga meleec eundecnu lelanec je madein, “Dana i age ceu tinca jecebil dalul aqeia!” ein.

¹⁴Oodonqa Pita uqa aposel 11-pela gami caji tawimeig seeci dana am ben ninijen maaden, “Cotiel, Juda dana age, cunug Jerusalem bilegina ageca cehna ija dah mimitebil i cel gugnu ceteh i calena eu maadigen.

¹⁵Age dana i age eu dalul aqeia ec cisdogina. Euqa qila i 9 kilok qasil himec. Eunu dana i age eu dalul qee aqel.

¹⁶Euqa ceteh i caleia eunu je hahun madec dana, Joel, wele maden:

¹⁷‘Anut madena, “Deel cit qocna ija ijana Kis dana cajaca cunugna basecdocomin nugian. Age melemegail atagailca je hahun madec danawe ijana me je madoqagan. Agena dana haunhaun eu age majaudocnu foqagan. Agena dana toiatoia age bebelecna foqagan.

¹⁸Mele, ijana cabi dana cajaca ha ijana Kis deel eunu agena basecdocomin neceb age je hahun madec danawe ijana me je madoqagan.

¹⁹Ija gaga odoc sao ohisnaca, kobolkobol odoc mahanaca odigen. Saen euna golacca, jaca, ja casuc benca caloqagan

²⁰Tibudna deel ben eu camasac migiannu dodoldodob casac cam eu tu ibuldugian. Odocob jagel eu golacwe golca ibuldugian.

²¹Odocob saen euna dana oso uqa Tibud ijanna utadocobfi Tibud uqa dana eu cahahadugian,” ena,’ en,” aden.

²²“Isrel dana, je i dah meigale! Jisas Nasaretdec, Anut uqa dana i nesili ehuden, uqana gadac eu odi. Age gemo uqa gagadic odoc mati odon, uqa kobolkobol odoc ha mati odon, uqa gaga odoc mati ihacaden. Eu Anut uqa Jisas ebenna age gemo odi odon agedodoc dogina.

²³Age Jisas i uqa dana age Mosesna loo je bisalu qee bilegina eu ebenegana mudecebil age na babalecna tuitu qocobil cal men eunu Anut uqa wele don, Anut uqa wele eunu cois maden.

²⁴Euqa cal mec uqa gihacdocwe qee. Cal mec uqana gagadic odoc qee mudimei haun ehuden. Eunu Anut cal mecnadec haun tulidocob cajen.

²⁵Euha Dewid uqa Jisasnu maden: ‘Ija dugina, Tibud uqa ijaca gaid bilina. Uqa ija ebeni meulana isec bilina eunu culumen oso ijaca hocobfi ija qee qeleligaun, qee cucuiigaun.

²⁶Eunu ija wawi celeboen. Ija conina ceelec je madem. Anut hina ija doloni cal mecna qee culdugaun. Hinana cabi dana gun eu hina culdocom uqa deweg qee huluoiaun. Eunu ija cal mec dana qa ija jaen mudecnu gaid wawi madena odi.

²⁸Hina cebac coboc jic wele ihactem. Odocob saen hina ijaca bilimeg ija wawi celeboecnu itegan,’ en,” aden.

²⁹“Cotiel, age du cuhadocnu ija saluqi u maadigen. Egena sihul gugnadec dana, King Dewid, wele bilen uqa cal meceb heel cisein, euqa uqana qalqal eu ene egeca deel ina bilia.

³⁰Uqa Anutna je hahun madec dana, odocob uqa Anut je cagoc oso madon, ‘Ija dana hinana sihulnadec hibna caligian hinana king cudunna mudigen,’ don eu don.

³¹Eunu Dewid uqa Anut hibnanu ceteh oso odocob caleceb fen. Odimei Anut uqana Krais eu cal mecnadec ceseli cajigiannu maden: ‘Anut cal mecna uqa qee culdol. Uqa deweg ganac ha heelna qee huluel,’ en,” aden.

³²“Anut uqa Jisas i cal mecnadec haun tulidocob cajen eunu ege cunug fimeb qasali maadoqona.

³³Uqa Jisas suli u sao ohis ehi ti eben meulana isec muden. Odimei Memige Anut uqa wele maden odi Kis Gun uten. Odocob Jisas Kis Gun basecdocob nen eu ceteh qila i fegina, dah megina.

³⁴Eu odi ha Dewid uqa Jisas sao jobonna ten odi qee tel qa uqa maden: ‘Anut Tibud uqa ijana Tibud odi madon, “Ijaca hu ebeni meulana isec bibilem

³⁵ija odocomin hinana cad cunug hu ninijebil hina jaimna lahacadegan,” don,’ ec maden,” aden.

³⁶“Eunu Isrel dana cunug age doiga, Jisas i age na babalecna tuitu qocobil cal men eu Anut uqa Tibud Kraisca mudeceb uqa ege Cahahagec calen bilia!” aden.

³⁷Dana age odi dah mimeig age wawaga qon. Odocob age Pita aposel leihca maadein, “Cotigeil, ege qila adi odocnu?” adein.

³⁸Odocob Pita maaden, “Age osolosol agena silailnu tului falicdumeig Jisas Krais ijanna wa joc ocobil Anut agena silail cagasiadigian. Odocob Anut uqa Kis Gun bagolwe adigian.