Aposel 28:3-10

³Pol ale atubwa ma atukum ndro-o jih rayah, ta edeu i jih. Jih nyarahani mwak ari udu bolo iri ndro-o jih nane doh, ma iy seselek eme len, ma ini mine Pol.

⁴Iri lau badu busu doh anyolom mwak sukik udu mine Pol, ma mani iri atur laleyah, ma iri asehek i tiri ari, ari anya, “Sebwe iy ndramak kede-eh ta idi lau nadeh, eme ma mwak ini iy doh! Iy bamak bado ndra bolo ndras bwe, arile kindrei nane ta edeu maha-an i ta lau ta amekes kandriyen ndra-in badeh, bwalen iy ndramak kodo-oh ta udu kon munyak dah nadeh.”

⁵Arile, Pol toboroyani mwak nane sukik udu minen taku i jih ma minen bisi bwe, ma se ndra batekeu bwe.

⁶Iri lau marakon ado atondrok ta minen kase, ano iy kataku ma kimek. Arile, iri atondrok luluwen labai ma iri banyolom ari lakou basahan tan bwe, iri ame tubuni budon tiri ma asehek budon tiri anya, “Iy kede-eh ari kindrei!”

⁷Munyak nane ahi are aliy badeh, ere mirihik ta munyak ta ndreh kabin ta busu doh, nyaran Publiyus. Iy ndreh kabin doh andrei ahi ala asiu tan, ma iy tondrokei ahi udu mwasin labai winiya len taloh.

⁸Tama Publiyus badeh, ibo sik in andri, badan nyarahan, ma walou ere tan. Pol eme ili bolo asiu hawen, iy asolom iy, iy atehei minen i bwele-en ma nyumuri iy amwenen ja.

⁹Pol amekes i buku doh, ma iri lau badu busu nane doh ame le hawen, ma iy nyumuri iri amwenen ale.

¹⁰Iri lau badu busu doh adeu tahi lakou buku ndramas badeh, solo-an labai, ma ahi anya ka-au badeh, iri adeu nahi lakou buku nyamon ta atondrok ahi are ndron.