Aposel 17:13-29

¹³Eme na len iri Juwis badu Tesalonaika anuhun Pol atiye sahou ta nyala Kindrei udu Beriya badeh, eme iri ala doh ale amekes ndrine iri lau atukum doh towodau.

¹⁴Eme na le liliy nadu tine Pol oro ame badeh, suni iy ili mada ndras. Arile, Sailas uru Timoti are Beriya are gwek.

¹⁵Eme oro lau ala hawe Pol badeh, tiyani iy ili isos Atens, ano oro ame hamon ma tuwi sahou ta tiye i ta Sailas uru Timoti, ta uru kame hawen, suwi suwi.

¹⁶Na len Pol udu Atens abe-en Sailas uru Timoti, ndrinen isi handru ta kon tinan doh idih na iri sukumada kei, iri amekes solo-an labai.

¹⁷Ya eme Pol ili bolo asiu ta atukum andres hawe oro Juwis ma hawe iri lau badu Grik ala atudun Kindrei. Ma hawe udu mada lau mari na len mari udu ndrahu tukum ta lau.

¹⁸Eme oro lau rayah aloh oro Epikuriya ma hawe oro lau aloh oro Stowik ame andres hawe Pol. Oro rayah asehek anya, “Iy ndramak doh ta amou gwa laleyah, anya kasehek nyala sasah kede-eh?” Ya oro rayah anya, “Iy kede-eh asehek nyala iri kindrei rayah badu leheleh nadeh?” Oro asehek i buku doh, tasah Pol nane asehek sahou mwasin ta nyala Jises ndramak ta amak ta imek eme loken.

¹⁹Ya eme oro lau rayah tiye Pol ili atou oro lau ta atondrok kandriyen tiri ado kon ta ndrahu tukum aloh Areyapakus. Ma oro tiye i ta Pol i buku doh, “Aso anya kanuhun ma katanan ta tanan ha-un ou asehek badeh.

²⁰Ou badeh, atiye tanan rayah i randrah labai ta ndranye ahi ma ahi anya kanuhun moson ta aliy i buku sah handru.”

²¹(Eme iri lau mari badu kon Atens ma hawe lau badu leheleh manyah ado doh, na len mari badeh, bamekes se ari lahou bwe. Iri badeh, asehek nyala tanan doh ma anuhun tanan ha-un doh.)

²²Ano Pol ales udu loken ta ndrahu tukum tiri aloh Areyapakus doh, ma tiye anya, “Ado lau badu Atens! Jo anyolom ta bolo lahou tado mari, ado lau ta atudun iri kindrei solo-an.

²³Tasah, jo edek bolo kon tinan tado anyolom ndrahune aha ta atudun badeh, jo anyolom tarou ari udu bada koto-ok ta atudun, tiye i buku doh: ‘Ta Kindrei, Ahi Maliye Iy.’ Ya Kindrei ado maliye iy badeh, jo kameh asehek nyala ado na len dah.

²⁴“Iy Kindrei nane ta amekes munyak ma kandrah ma lakou mari udu bolon. Iy badeh, Laban ta atondrok munyak ma kandrah. Ya iy bamanyah bado bolo asiu ta atudun amekes na lim bwe.

²⁵Ma iy bandriliu ta se lakou badu mine lau katiye ki tan bwe. Tasah, iy le badeh, iy kati ndramak ta edeu koha taha, ma hawe sasah, sasah ja i ta lau mari.

²⁶Iy bwidi lau mari asahan badeh, in hamon ta ndramak ari le, ma iy weleyani iri lau mari manyah ado kon rakon rakon udu bolo kon munyak. Ma iy le amwenen sani len ta kon iri manyah ado aliy, ma iy atehei iri kobek ta aliy.

²⁷Kindrei amekes san doh badeh, ta lau kala katakaleh iy, i buku none bale iri kabwetenei. Tasah, iy badeh, udu le bakep hawe taha ari ari.

²⁸Ma, na iy le badeh, taha ado mulin ma adek ala doh, ala doh ma to asahan awas dah. I le buku none lau ta asehek kundruh tado ndrasehek ndra-au anya, ‘Taha badeh, nadun labai.’

²⁹“Ya eme i buku doh, taha badeh, nadu Kindrei ya eme taha satehei budon anya Kindrei kede-eh i buku none ari sukumada kei ndramak asehek na lim, deh, i buku bek nyikilikin gol deh, i buku none bek laleyah bwe.