Aposel 15:23-41

²³Ka minin ganin iru bile tongure, yal sui i ongwa. “Aposel kobe te ka main goma yongwa yal kobe, na yal kobe i enin kobe milebinwa. Yuda milekungwa ibal enin kobe Antioko ai te Siria gariba te Silisia gariba milinga, aya maya, di tere ka minin ganin bile tobinwa.

²⁴Na ibalan kobe taw i milinga gul ongure, ka dungwa i nigi de pire nomanin sutan sinwa. Na ibalin kobi kaman tekere, nusi erekibinwa.

²⁵Ibalin kobi ka dungwa pirebinga ena na yal kobe u ku bilere yal taw kobe paale suna ere irere, nusi ere i milinga gul erala dire, nomanin taran sibinwa. Yal taw kobi na ye nega yal sui Banabas te Pol bole namua.

²⁶Yal sui konagi ere Yesu Kirisito Singaba tongwa, ibal si gulala dimba, kuril pirekire konagi ere milungwa.

²⁷Yal taw kobe nangwa iwe, Yudas te Sailas yal sui nusi erebingire, na ka minin ganin bile tobinga mere, yal sui ka i di i tenamua.

²⁸God Kegemama Iban te na ibal kobe bole nomanin taran iru sibinwa. Konagi nega wen di ta ere tekerabinba, kaman iru di i tobinga,

²⁹‘Kobile galbale kabe si ki tongwa, nekio. Kabe mayan ta nekio. Kabe naan aa di dire si gulungwa para nekio. Gi te abal kunibe ikio.’ I kal iru mun kal waa tere ta erekinanga, wai wen milanwa. Para we.”

³⁰Bilere pare nusi erungure, pirere Antioko ai u bawa dire ka main ibal taminin di ku bilere ka minin ganin bilungwa tongwa.

³¹Tongure kere wai pire ka iru bilungwa wai pire gun yongwa.

³²Ena Yudas te Sailas God ka kebe yal milungwa, ka binanbile kaman tongure, ibal kobe pire gi dungwa pi nima ongwa.

³³Yal sui kaun taw mile kwi sinaa di ere nama dire, ibal para “Ere po,” dungure ibal kobe nusi erungure kwi ere ain ongwa.

³⁴Omba Sailas Antioko ai milala di pirungwa.

³⁵Pol te Banabas te ibal binanbile bole Antioko milere, Yesu Singaba ka main kere di tere nil si tongwa.

³⁶Ena kaun taw mile pare, Pol iru di Banabas tongwa, “Goma na yasu Yesu Singaba ka main bolin kule ibal kobe tere ogu ai para muru, ka main ibal taminin milungwa mere kanabina, nabina wo.”

³⁷Dungure Banabas yal ta kaan Yon Maka awli nala di pirungwa.

³⁸Pirimba goma ka main konagi erere yalini Pambilia ai sinaa dire ere ain pire bole para pekungwa, Pol iru nomanin si pire dungwa, “Yalini na bole nangwa, kuunin paikimua.”

³⁹Dungure yal sui bolebilin dire girin di milungwa, guman inin inin dungwa. Banabas Maka awli ire ere sipe ali pire, nil minimina Saipiras gariba gul ongwa.

⁴⁰Pol Sailas paale suna ere irere, Yesu Singaba aa te wai ere yalsu tenama dire, ka main enin kobe ana di God tongure ere ongwa.

⁴¹Pirere Siria gariba suna pire, Silisia gariba suna pire, ka main ibal taminin yobilaan bile tongwa.