APOSEL 13:27-46

²⁷Kale Jerusalam kasel so imi kamogimal so iyo atamipta e, Yesus beyo nulumi dong dogobe numi fengmin umi kupkan kebela waalanan-temup tinum ita tala kalaa agesaalip kale minte, alugum God imi ifin am daanamu uyo, sugayok umi God imi profet ko age weng kem baga-emin tinum imi weng dola kosip uyo suun kup tiki-bilipta, tinangkan-nuubip kuta, bomi magam uyo tele utamsaalip kale, bogobe-nilip e, ‘Yesus iyo angkolip kaanak o,’ agelipta, kanube sugayok weng dola kosip boyo tol kup mitam ti-suu ko.

²⁸Kale bilip iyo dogobeta atamipta e, bemi fengmin umaak albu kalaa ageta felepmuta, angkolip kaanan-tema kalaa agesaalip kuta, di Pailat imi bogobe-nilip e, ‘Kapmi waasi dinin iyo bogobelapta, Yesus iyo angkolip kaanak o,’ agelip e bole,

²⁹alugum kanumin kanumin sugayok God imi profet ko age weng kem baga-emin tinum tebe Yesus imi sang dola kosip uyo tol kup mitam tulu bilip iyo kanubelipta, kaana kale, kota tinum migik iyo tal at diim dup-diibip uyo, talaa daa dep no tuum tem kutam kal dubalip kuta,

³⁰God tebe dufolata, fen tigi mo-nala e,

³¹siin Provins Galili kasel tebe iso met abiip Jerusalam un-silip imi finang tal tama ataman-bii, am kwiin tagang ke-silip kale, kamaa kagal atam-silip bilip iyo bemi sang uyo Israel unang tinum imi baga-em tiinan tebesip ko.

³²“Kale nuyo weng tambal koyo kwep tal ipmi baga-e-bulup kale, sugayok God tebe numi afalik Abraham ulimal imi bogobe-nala, ‘Ipmi man ilop iyo kanubelan-temi o,’ agesa uyo

³³kota God iyo ilami weng kwep daasa uta waafu-nalata, Yesus iyo dufola fen tigi mo-se kale, bomi tem kwek tele God iyo bilip imi mulup tan nuyo dong daga-em-nuuba kale, boyo aseng alop diim dolasip kwek uyo bogo-nilip e, ‘God iyo bogo-nala e, “Kabo nimi man kale, kamano koyo kamdep unang tinum imi kafalepmita, katamipta e, bemi man kalaa kagelip o,” age God iyo kam agesa o,’ age-nilipta, dola kosip kale minte,

³⁴God tebe dufola fen tigi mo-nala e, maak so kaan-nalata, sang daalan-temaala kale, boyo God iyo kam age bogo-nala e, ‘Niyo sugayok Devit imi bogobe-nili, “Kapso kapmi mulup tan so ulimal ibo ulaa imdu-nilita, kuguup tambal uyo kupka-eman-temi o,” agesi boyo atin tol kup ipmi kupka-eman-temi o,’ age-nala e minte,

³⁵aseng migik umi weng uyo Devit iyo tebe God imi bogobe-nala e, ‘Kabo kapmi ulaa dusap tinum iyo dupkalapta, kaanta sang daalan-temaala o,’ agesa ko.

³⁶Kuta weng boyo Devit iyo ilami sang uyo bogosaala kale, Devit iyo God imi weng uyo tinangka-bom-nalata, unang tinum am ko daanu bii-silip iyo dong daga-e-bii kupka-nala e, kaanata, dep no ilami olal imi begel ilet tem kutam kal dubalipta, sang daasa kale minte,

³⁷tinum God tebe dufola fen tigi mo-se Yesus beta sang daasaala kuba.

³⁸Kale weng kufo-nulupta, baga-e-bulup kale, di nugumal ipkil utamin. Moses imi ulo uyo tebe ipmi fengmin uyo takan kebe-nuluta, ‘Ibo tambaliim kelip o,’ agelan-temaalu kale, Yesus ita unang tinum imi fengmin uyo takan ke-emin kale, alugum waantap ita bemi ilak uyo dolip umdii, Yesus iyo bilip imi fengmin uyo takan kebe-nalata, ‘Ibo tambaliim kelip o,’ agelan-tema ko.

⁴⁰Kale sugayok uyo God imi profet ko age weng kem baga-emin tinum bilip iyo bogo-nilip e, ‘Titul weng bagamin tinum ibaa. Ipmi albip kota, niyo kuguup ugulumi migik maak telela kolan-temi kale, tinum iyo maak tebe bomi sang uyo ipmi bogobela umdii, ibo, “Beyo bisop bagan-be o,” agelan-temip kuta, boyo tebe ibo ifak daalu kaanan-temip kale, ipkil utam-nilipta, aget yamyam uyo fugun-bom-nilipta o,’ agesip kale, mungkup boyo tebe ipmi diim abe ifak daalan-temu kale, utama-bom-nilipta o,” age-nalata, Fol iyo baga-ema ko.

⁴²Kale Fol so Banabas so alop iyo, ulotu am uyo kupkaa tam abiip iinum o age abe-bom-nilip e, tinum bilip iyo alop imi bogobe-nilip e, “Yak maak umi God imi ifin am daanan-temu kota, alop ibo tal weng boyo maak so baga-emin o,” age-nilip e bole,

⁴³ulotu am uyo kupkaa tam abiip tam abe una tala ke-bom-nilip e, Juda kasel so asit kek kek tinum Juda kasel imi kuguup waafusip isino kwiin tagang iyo alop imi daang begebelip abe-bom-nilip e, bogobe-nilip e, “God iyo ibo kuguup tambal kobe dong daga-e-be kale, ipkil ilami diim kup feba-bilipta o,” age-nilipta, alop iyo baga-emip ko.

⁴⁴Kale yak maak umi God imi ifin am daanu kota, abiip afalik bomi unang tinum iyo, Bisel God imi weng uyo tinangkulum o age-nilipta, mep so alugum iyo ulotu am uyo tala tala kelip kuta,

⁴⁵Juda kasel iyo itamipta e, unang tinum kwiin tagang iyo tala tala kelip kalaa age-nilipta, titin-bom-nilipta, unang tinum imi bogobe-nilip e, “Fol imi weng boyo fen baganbaala o,” agan-bom-nilip e minte, titul weng baga-e-bom no ke-bilip e minte,

⁴⁶Fol so Banabas so alop isiik finanin binim bogobe-nilip e, “Nuyo felepmuta, God imi weng uyo kamaki uyo Juda kasel ipsiik bogobelup kuta, ipmi aget fugunin uyo, ‘Nuyo alop imi weng bogo-nilip, “Ibo suun nin unang tinum kelin o,” agan-bilip bomi waafulan-temup boyo felepman-temaalu o,’ age-nilipta, alop numi weng bomi baga-e-bulup boyo umik ugobelip kale, kanubelip bole, kota alop nuyo ibo imka-nulupta, asit kek kek kagal albip imi finang uyo yang God imi weng baga-eman-temup ko.