Aposel 10:15-26

¹⁵Ago tag awan an fon ibol, “Mel dugon Anut ikokan ibol ak, oŋ waliŋ ganep, nun ta ubol na wa.”

¹⁶Mel naon kisaek an mi ilasa utol gug, fon melmel an yamel anda imul keit lo yau a.

¹⁷Pita malan ŋutun ile amaiak san fun kankan an igane dugo, Konilias tamol idinaig diau an Pita ab lo imado dan duloŋ tag dupalug ab awan te dutur a.

¹⁸Ab muroun duwagiŋ go dubol, “Tamol ta etna yaŋan Saimon Pita imado di?”

¹⁹Pita malan ŋutun amaiak kankan an iganed imado dugo Urgun irupei, “Uloŋ, tamol utol oŋ abaŋa diabi da.

²⁰An lo udup, dida au. Ilo weiwei umoi. Man dugo, ŋaiseg ŋidinaig, oŋsa na dupalu ya.”

²¹Ago tag Pita idug irupidai, “Tamol abaŋale dan ŋai nek en. Aŋ ata wo apalu yak i?”

²²Ago tag ru naon durupei, “Yu gurman tubun ak Konilias idinamag mupalu ya. Iŋ tamol itaot mok, Anut yaŋan lo ubou ile da. Juda tamolpein dam tamol an yaŋan disini da. Anut san eŋel gun ak ta ipalug oŋ igiop iŋsan ab lo waup ŋiŋe dop iloŋ o ago eŋel an irupei a.”

²³Ago tag Pita tamol utol an igiaig diladug atna dida dien a. Tidom lom mi, Jopa na ilo rumok adi aenta Pita luan disag, tamol utol an dida diau a.

²⁴Tidom kisaek dal na dien gug Sisaria na dilasa ya. Konilias iŋanen samun, turan muroun dam igiaig dupalu yan fidian Pita malan diganed dumado se ya.

²⁵Pita ab lo iladu wo dugo Konilias yaug Pita naon na tubud igo woŋ turun isaluwi pani a.

²⁶Gug Pita banin idug yabisag irupei, “Masa, ŋai man tamol nek oŋ igo ya.”