Apocalipsis 7

1

2

3

4

5

6

7

8

9

10

11

12

13

14

15

16

17

18

19

20

21

22

¹Ya chiꞌchiyi bwaꞌhahn loh tahpa xaanjla Dxiohs nin zuu gadaapa xchihn guidxyiyuh, cagacweꞌza raꞌ aanjla raꞌ chi loh gadaapa xnehza bwih xteenn guidxyiyuh tin ayi xi bwih suu loh guidxyiyuh cun loh ñihsadoꞌ, nee nin tuhbi za loh raꞌ yahga,

²ya bwaꞌhahn stuhbi xaanjla Dxiohs nin biinloh nez lahdu rtahn gubihdxyi, ya caꞌha aanjla chi sehyu xteenn Yuꞌbi Dxiohs nin ba nabahan par tuꞌpazi, ya guñiꞌ aanjla riiꞌ jweersi rooꞌ duxa loh gadaapa raꞌ aanjla nin gucaꞌha guelrnabwaꞌ tin guunn raꞌ ba guelnah loh guidxyiyuh cun loh ñihsadoꞌ;

³Squiiꞌ rahbi aanjla chi: ―Gulcwehza ziꞌca gacaꞌhbwaꞌ xgah nuꞌh garaa raꞌ bwiinn raꞌ nin naa xpwiinn Dxiohs; yaque guyaꞌloh gucaꞌh raꞌ ba bwaꞌ chiꞌchiyi zahca guunn tu guelnah loh yuh cun loh ñihsadoꞌ, cun loh yahga raꞌ.

⁴Ya chiꞌchi bihn dxiaagahn paaldaa naa raꞌ bwiinn raꞌ nin guyuuꞌ sehn lohcah raꞌ ñiꞌh, bazaaꞌ raꞌ bwiinn chi ziga tuhbi gaywaꞌh chywaꞌh bitapa mihyi bwiinn raꞌ nin bibwiꞌhi loh raꞌ bwiinn Israel.

⁵Loh raꞌ xpwiinn guehtu Judah bibwiꞌhi tsiꞌh bichiohpa mihyi raꞌ ba; loh raꞌ xpwiinn guehtu Rubehn bibwiꞌhi tsiꞌh bichiohpa mihyi raꞌ ba; loh raꞌ xpwiinn guehtu Gad bibwiꞌhi tsiꞌh bichiohpa mihyi raꞌ ba;

⁶loh raꞌ xpwiinn guehtu Aser bibwiꞌhi tsiꞌh bichiohpa mihyi raꞌ ba; loh raꞌ xpwiinn guehtu Neftalih bibwiꞌhi tsiꞌh bichiohpa mihyi raꞌ ba;

⁷loh raꞌ xpwiinn guehtu Simeohn bibwiꞌhi tsiꞌh bichiohpa mihyi raꞌ ba; loh raꞌ xpwiinn guehtu Manasehs bibwiꞌhi tsiꞌh bichiohpa mihyi raꞌ ba; loh raꞌ xpwiinn guehtu Levih bibwiꞌhi tsiꞌh bichiohpa mihyi raꞌ ba; loh raꞌ xpwiinn guehtu Isacar bibwiꞌhi tsiꞌh bichiohpa mihyi raꞌ ba;

⁸loh raꞌ xpwiinn guehtu Zabulohn bibwiꞌhi tsiꞌh bichiohpa mihyi raꞌ ba; cun neezaa loh raꞌ xpwiinn guehtu Joseh bibwiꞌhi tsiꞌh bichiohpa mihyi raꞌ ba; cun neezaa loh raꞌ xpwiinn guehtu Benjamihn bibwiꞌhi tsiꞌh bichiohpa mihyi raꞌ ba.

⁹Ya chin guyaꞌloh deeꞌ raꞌ chiꞌchi bwaꞌhahn loh ziahan duxa raꞌ bwiinn nin ayi chyu guunn gahn gulaaba laꞌh raꞌ ba, naa raꞌ ba bwiinn garaatiiꞌ lahdxyi raꞌ bwiinn, nin naa raꞌ bwiinn guriin-guriin lahta raꞌ xteenn loh guidxyiyuh, bwiinn guriin-guriin dxiꞌzah raꞌ; zuu raꞌ ba nez delanta hasta zohba yahgaxiiyi rooꞌ nez dxibaaꞌ nee cun nez loh za Xiꞌhyi Dxiohs, nahcu raꞌ ba lahdxi labweh nee nuu lliiꞌdzi zihn naa raꞌ ba,

¹⁰ya jweersi rooꞌ cañiꞌ raꞌ ba squiiꞌ: Dxiohs nin zohba loh yahgaxiiyi rooꞌ nez llaaꞌndxibaaꞌ cun nin naa Xiꞌhyi Ñiꞌh, caꞌha guelrnabwaꞌ tin bataꞌh Ñiꞌh laꞌh raꞌ nu loh xtuhlda nu.

¹¹Ya garaa raꞌ aanjla nin nuu dxibaaꞌ rii gadiidxitiiꞌ xagaxiiyi Dxiohs cun gadiidxi za raꞌ gadaapa raꞌ maan nin rii hasta zuu xagaxiiyi Dxiohs dxibaaꞌ, chiꞌchi bazuꞌnllihbi raꞌ ba cun basiaaba loh raꞌ ba nez loh Dxiohs

¹²Ya rahbi raꞌ ba: Ziꞌchi gaca pwihsi; loh Dxiohs si nuꞌh gulgahbi lasahca duxa Ñiꞌh, nee gulguiꞌhnn lasahca lah Ñiꞌh; laꞌh si Ñiꞌh nahpa guelnaann; loh si Ñiꞌh gulgadiꞌhi guelzuxchiilli Dxiohs; laꞌh si Ñiꞌh gulgaann, gulgazuꞌnllihbi loh Ñiꞌh; laꞌh si Ñiꞌh nahpa Ñiꞌh guelrnabwaꞌ neezaa guelnadaꞌn. Ziꞌchi gaca, pwihsi, par tuꞌpazi.

¹³Chiꞌchi guñiꞌ tuhbi raꞌ bwiinn guuhla chi loon nah ba: ―¿Chyu naa raꞌ nin nahcu lahdxi labweh raꞌ riiꞌ, nee canehza zeꞌ raꞌ ba?

¹⁴Ya chiꞌchi raꞌpihn loh ba: ―Daada, banaann yuꞌbiluꞌh. Chiꞌchi nah ba loon: ―Bwiinn raꞌ riiꞌ nin batiꞌdxiloh trabahjw duxa, ya gudxiꞌbi xahba raꞌ ba tin biaaraꞌn cun llarihn Jesucristu nin naa Xiꞌhyi Dxiohs.

¹⁵Niꞌchin nin zuu raꞌ ba hasta zuu xahgaxiiyi Dxiohs, ya riiyuhnn raꞌ ba xtsiꞌn Ñiꞌh dxyih-nagueꞌla; niꞌchin Daada nin nahpa guelrnabwaꞌ nin zohba loh yahgaxiiyi rooꞌ zahcanee Ñiꞌh laꞌh garaa raꞌ bwiinn nin rii nez loh Ñiꞌh.

¹⁶Ayi ru sacazii raꞌ ba loh guelrchiaꞌhan, cun ayi ru za cwidxahga raꞌ ba ñihsa, nee nin ayi za gudxuꞌyi ru guelnaldaꞌh xteenn gubihdxyi laꞌh raꞌ ba,

¹⁷laasii laꞌh Xiꞌhyi Dxiohs nin zohba galaayillee loh yahgaxiiyi rooꞌ nin naa tronu nez dxibaaꞌ gaapa laꞌh raꞌ ba ziga zi lliꞌhyi raꞌ, ya chenee Ñiꞌh laꞌh raꞌ ba hasta nuu ñihsa nin naa guelnabahan; ya Dxiohs gucwiꞌdzi rwaꞌhaloh raꞌ ba cun ñihsabwii raꞌ nin ruꞌn raꞌ ba.