Apocalipsis 7

1

2

3

4

5

6

7

8

9

10

11

12

13

14

15

16

17

18

19

20

21

22

¹Tegin te-cholbal an takchado, angelmal-walabake iti-nap tikal-tikalgin kwigwismal. Tenal angelmal chogbake purwa abingegwismal, melle napkin kolgal, melle termalgin yolegal, tegin chapimalgin melle yolegalbal.

²Tegin an angel-pid-takchabal, tad-nakwedbal tani, tenal Pab-Tummad-tuladgad-sello annik tani. Tegin angel-tad-nakwedzhik-nonikid, angel-nap-tegin-termal-izhomaloedzhe sapejul kote, chogal:

³“Pe melle nap izhogo, tegin pe melle termal izhogo, tegin pe melle chapimal o-ibalo, anmal Pab-Tummad-e-mosmal-pebegin sello nazhikedzhe.”

⁴Tegin an itosbal, Israel-tulemal-144,000 sello kin nazhilesmal, tenal Israel-tulemal chog-ilbal:

⁵Judágad, miliambe-kakabog; Rubéngad, miliambe-kakabog; Gadgad, miliambe-kakabog;

⁶Asergad, miliambe-kakabog; Neftalígad, miliambe-kakabog; Manasésgad, miliambe-kakabog;

⁷Simeóngad, miliambe-kakabog; Levígad, miliambe-kakabog; Isacargad, miliambe-kakabog;

⁸Zabulóngad, miliambe-kakabog; Joségad, miliambe-kakabog; tegin Benjamíngad, miliambe-kakabogmo.

⁹Tegin te-cholbal an taktegu, an takal, Pab-ol-kangin-chiid-assapin tegin Oveja-chapini-assapin, tulemal-ichéjul kwigwismal, tule pel unni kwen epised-chul. Tenal we tulemal-pukmalad napa-nanimalad-ilbal, tule-chog-ilbal, tule-akal-akal-tamalad-ilbal, tegin tule-akal-akal-chunmaked-ilbal tanimal. Tenal we tulemal mol-chibugan yoyo-nadmal, tegin chunkalgin uga-ka annik-nemalbal.

¹⁰Tegin tulemal-ol-kan-nabal-pukmalad sapejul kotemal, chogalmal: Imi tule-abonoged anmal-Pab-Tummad-ol-kangin-chiid-akar taniye, tegin Oveja-chapini-akar tanibalye.

¹¹Tegin angelmal-pel-kwapa tegin chelegan-tummagan tegin immal-tulgan-walbakegwad Pab-ol-kan-ebiris-pukwamalad, Pab-ol-kangin-chiid-assapin napche-tullu-imasmal Pab-otummoalmal, chogalmal:

¹²¡Nued pe chogzhamaldo! Pabye, imi pe ilagwen-nadgu otummoledi-kuelen, nabirinye, tegin pe-nug-okannoledi-kuelen, nabirinye, tegin pe-pinzheed-nikalen, nabirinye, tegin tule pega tog-nuedi chogdi-kuelen, nabirinye, tegin tule pegin atagelen, nabirinye, tegin pe kal-nikalen, nabirinye, tegin pe kannaleged nikalen, nabirbalinye. ¡Pitogua!

¹³Tegin chelegan-tummagan-walgwen anche ekichial: “¿Ibi-tulemal-wede, mol-chibugan-yoyowiddé? ¿Pia tanimal-wede?”

¹⁴Tegin antin tule-chered-tummadga chogal: “Tummad, ante wichí toa-tulemal. Tenal pedin nued wiis, ibi-tulemal.” Tegin we tummad anka chogalzhun: “We tulemal-mol-chibugan-yoyo-pe-takeddin, peyedzhe wilesmalad-akar tanimal, tegin Oveja-chapini-e-abegin aga mol enusmalbal, al chipú pesmal.

¹⁵Al we tulemal Pab-ol-kangin-chiid-assapin pukwamal, mutik-ibgin Pab-maidgin Pab-pentamalgal. Tenal Pab-ol-kangin-chiid aga-e-negginedyob, tule-mol-chibu-yoyomalad-akwemalo.

¹⁶Tenal Oveja-chapini Pab-ol-kan-nabal-unid, aga oveja-takedyob, tulemal-mol-chibu-yoyomalad-tako. Tenal Oveja-chapini aga e-tulemal-iktudo ti-nuedgin aga okobgal. Tegin Pab Tummad tule-mol-chibugan-yoyomaladga imialis elio, melle pukib pal itomalgal.

¹⁷Al tulemal-mol-chibugan-yoyomalad ukul pal kwen itogojulmal, tegin tad pal kwen kugojulmal, tegin neg-ued pal kwen itogojulmalbal.”