Apocalipsis 7

1

2

3

4

5

6

7

8

9

10

11

12

13

14

15

16

17

18

19

20

21

22

¹Tsai' puiñu kayu bene katawayu, entsa tunu taapai anjeela main main kapash kapash uidena, taapai ishuwa jumulanu nukaba jui-eekaan jutyu washnatu, matyu naa tusha bain, naa lamaasha bain, naa chisha bain juikaakaren jutyu.

²Tsenmala kama anjee pajlanu pasha faaja' uwain chumu Dioschi muute chujtintsumi tana katawayu; tsejtu naa tusha bain, naa lamaasha bain, mushkenu uuden imu juntsa taapai anjeelanu daran patu entsandiwa:

³Diosa' chachillanu yala' llashkapanu Diosa' muutechi kayu tsu'kaindetyuya, tiba firu' kityudei, naa tunu bain, naa lamaanu bain, naa chi juulanu bain, tiwa.

⁴Tsenmin kumuinchibi Dioschi muute puu jumula nan dejuñuba tsa deeve ti' pañu meewayu. Tsejtu Israelnu sera' jimu paandelanu tene te'kalaraju kumuinchibi 144.000 chachi Dioschi muute jula.

⁵Judánu sera' jimu paandela 12.000 chachilla muute de-iwa, naa Rubénnu sera' jimu paandela bain, naa Gadnu sera' jimu paandela bain,

⁶naa Asernu sera' jimu paandela bain, naa Neftalínu sera' jimu paandela bain, naa Manasésnu sera' jimu paandela bain,

⁷naa Simeónnu sera' jimu paandela bain, naa Levínu sera' jimu paandela bain, naa Isacarnu sera' jimu paandela bain,

⁸naa Zabulónnu sera' jimu paandela bain, naa Josénu sera' jimu paandela bain, tsenmin Benjamínnu sera' jimu paandela bain 12.000 chachilla Dioschi muute jula.

⁹Entsaa puiñu kayu bene chachi pure' kataakiwayu, muba mi'nu jutyuu; juntsala vee vee ma uñichi uuden juu chumula bain, naa vee vee sera' jimu paandela bain, naa yai tene ma bululu i' chumula bain, naa vee vee palaachi pamu chachilla bain mantsa mantsa jumulaa tsa deewa. Kumuinchi juntsala rei' chuchudinu chunjuu ajuusha, tsenmin Llupu Kaa Uveja' ajuusha bain de-uinawa juyayaa fiba jali panaandene, tsenmin main main tinchi jaki taandene de-uinawa.

¹⁰Tsejtu kumuinchi daran palaachi patu entsa entsa detiwa: Reila' chuchudinu chunjuusha chumu lala' Dios, Llupu Kaa Uvejabaa livee inuu kikaamu deeve, tiidetiwa.

¹¹Tsenñu reila' chuchudinu chunjuu keesha bain, naa Diosa' chachilla' 24 bale rukula' keesha bain, naa taapai bibu chumula' keesha bain yatana uinamu anjeela, reila' chuchudinu chunjuu ajuusha deteedi', yala' llashkapa tusha tyuikangue dewaike' Diosnu aawa kure' keewaatu,

¹²entsa detiwa: ¡Uwain tsaasa! Naa ne tsamantsa ura rukuve tikayainuu juu bain, naa tsamantsaa keewara juu bain, naa aseeta juve tya' keewaanu juu bain, naa yuj urave ti' panu juu bain, naa balenguranuu juu bain, naa ti kikenuu juu bain, naa ti dera juula bain naa-uwanuba lala' Dioschi tene jusa. ¡Tsaasa! detiwa.

¹³Tsenñu juntsa uwanu Diosa' chachilla' ma bale ruku inu pake'meetu tsandiwa: ¿Juntsa juyayaa fiba jali pana deeshu juntsala muden, tsenmin nukaa chumu jatu de-in? tiwa.

¹⁴Tsenñu iya: Rukui, ñuya mive, tiwayu. Tsenñu entsandiwa: Entsalaa Diosa' mitya tsamantsa taaju i' puinu tinbuchi ika' puimula deju', Llupu Kaa Uveja' asachi yala' jali fibabaañuke manbitsaamula deeve.

¹⁵Tsa' mityaa Diosa' chuchudinu chunjuu ajuusha depuve, tsejtu naa-uwanuba mandala bain, kepe bain ya' pupunanu yasha depu' yanu aawa kure' keewaandetsuve. Tsenmala, reila' chuchudinu chunjuunu chumu rukuya yaiba chu' yalanu washkenu tsuve.

¹⁶Umaya panda bain yapen dejutyuve, naa pi bain yamuj jun dejutyuve, naa pajta bain yalanu maju'ken jutyuve, naa ne lujaa tya' bulla tyanu bain dejutyuve,

¹⁷matyu reila' chuchudinu chunjuu chunu ajuusha uinamu Llupu Kaa Uvejaa yalanu uvejabillaaba washken tsanguenu juñu' mitya. Tsenmin naa-uwanuba chuwaamu, tujuusha faamu nara ishpi pijulasha bain miya' jijiinu tsuve. Tsenmala Diosya yala' kapukanu kapi demanguijmu junu tsuve, tiwa.