1As kat aqꞌax umaꞌl u aa sve uvaꞌ echeꞌ bꞌaara. As alpu umaꞌl u yol sve ech ileꞌ: —Kuxh echa u tuul u tostiixheꞌ tukꞌ u nachbꞌal Tiixheꞌ. As la eesa tachul unqꞌa uxhchileꞌ uveꞌ ni nachon in tzitziꞌ.
2Pet ech koj u vatz iqꞌanal u tostiixheꞌ, tan yeꞌxhkam la eecha, tan tetz veꞌt unqꞌa tenameꞌ uvaꞌ yeꞌ ni niman in. As tu kaꞌvaꞌl toxkꞌal (42) ichꞌ uvaꞌ la ibꞌan veꞌt unqꞌa tenameꞌ kam uvaꞌ ni tal taama tiꞌ u tenameꞌ uvaꞌ Jerusalén uvaꞌ txaael veꞌt svaꞌn.
3As la unchaj bꞌen kaꞌvaꞌl unqꞌa alol tetz vunyoleꞌ uvaꞌ atoꞌk qichkin oksaꞌm staꞌn, kꞌuchbꞌal tetz uvaꞌ vaꞌl itxumuneꞌ tiꞌ u tiila yoleꞌ uvaꞌ ni taleꞌ. As tu umaꞌl mil tukꞌ oxlaval kꞌalal (1,260) qꞌii la tal chajaak vunyoleꞌ xoꞌl unqꞌa tenameꞌ uvaꞌ yeꞌ ni niman in.
4As ech tatin kaꞌvaꞌl unqꞌa alol tetz vunyoleꞌ echeꞌ kaꞌvaꞌl unqꞌa tzeꞌeꞌ uvaꞌ olivo as tukꞌ kaꞌvaꞌt unqꞌa tatinbꞌal kanteela uveꞌ at sunvatz bꞌenameen, in uvaꞌ in iBꞌooqꞌol u vatz txꞌavaꞌeꞌ skajayil.
5Asoj abꞌil la xeꞌt tiꞌ kaꞌvaꞌl u alol tetz vunyoleꞌ, as la el veꞌt chꞌuꞌl xamal titziꞌ tiꞌ itzꞌeꞌsat unqꞌa uxhchileꞌ uvaꞌ la xeꞌt stiꞌ. As la kam u uxhchileꞌ uveꞌ la xeꞌt tiꞌ kaꞌvaꞌl u alol tetz vunyoleꞌ.
6As aqꞌel veꞌt te kaꞌvaꞌl u najeꞌ svaꞌn tiꞌ imajat ivatz u almikaꞌeꞌ tiꞌ uvaꞌ yeꞌl u jabꞌaleꞌ la ul veꞌteꞌ tu unqꞌa qꞌiieꞌ tul uvaꞌ ni tal veꞌt vunyoleꞌ te unqꞌa tenameꞌ. As aqꞌel veꞌt ste unpajte uvaꞌ jatpajul kuxh la tal taama tiꞌ ibꞌensat veꞌt u aꞌeꞌ skajil, as tiꞌ iyansat veꞌt u vatz txꞌavaꞌeꞌ taꞌn unqꞌa kꞌaxkꞌoeꞌ.
7As tul maꞌt talat veꞌt kaꞌvaꞌl u alol tetz vunyoleꞌ u yoleꞌ xoꞌl unqꞌa tenameꞌ, as la jeꞌ veꞌt chꞌuꞌl umaꞌl u txoo tu u nimla tokkin juleꞌ. As la xeꞌt veꞌt txoo stiꞌ. As la olebꞌ veꞌt txoo tiꞌ iyatzꞌpeꞌ.
8As tul maꞌt iyatzꞌpu veꞌt kaꞌvaꞌl u alol tetz vunyoleꞌ, as la kuxh kaa veꞌt vichiꞌoleꞌ tu bꞌeyeꞌ tu nimla tenameꞌ uvaꞌ «Sodoma» tukꞌ uvaꞌ «Egipto» tiꞌ u vaꞌlexheꞌ uveꞌ nibꞌan u nimla tenameꞌ, tan tu u tenameꞌ uvaꞌ kat yatzꞌpukat viBꞌooqꞌol Kubꞌaal Jesús chajnajeꞌ vatz u kuruseꞌ.
9As la kuxh isaji veꞌt unqꞌa tenameꞌ vichiꞌol unqꞌa alol tetz vunyoleꞌ tu oxvaꞌl u qꞌiieꞌ tukꞌ unchaqꞌal qꞌiiul, tan yeꞌ la saꞌp veꞌteꞌ uvaꞌ la bꞌen mujloj veꞌt vichiꞌoleꞌ. As kam kuxh tenamil, kam kuxh yolbꞌalil unqꞌa tenameꞌ vatz u txꞌavaꞌeꞌ la ilon veꞌteꞌ.
10As la chiibꞌ veꞌt unqꞌa tenameꞌ uveꞌ yeꞌ ni niman in tiꞌ uveꞌ kat kam kaꞌvaꞌl unqꞌa qꞌasan tetz vunyoleꞌ. As kam kuxh la toya veꞌt tibꞌ svatzaj taꞌn chiibꞌichil, tan tiꞌ uvaꞌ maꞌtik ixaansat veꞌt kaꞌvaꞌl u alol tetz vunyoleꞌ taama unqꞌa tenameꞌ,— tiꞌk u yoleꞌ uvaꞌ alpu veꞌt sve.
11As tul kat pal veꞌt oxvaꞌl u qꞌiieꞌ tukꞌ chaqꞌaal qꞌiiul, as kat tulsa veꞌt u Tiixheꞌ taama kaꞌvaꞌl u alol tetz viyoleꞌ. As tul kat txakebꞌ veꞌteꞌ, as mamaꞌla xoꞌvichil kat ok xeꞌ taama unqꞌa tenameꞌ skajayil uvaꞌ kat ilon itxakpeꞌ.
12As kat tabꞌi veꞌt kaꞌvaꞌl u alol tetz viyol u Tiixheꞌ ivulun umaꞌl u tuul viꞌ tu almikaꞌ uvaꞌ ech nik tal ileꞌ: «¡Jeꞌojtaj chꞌuꞌl ex tzitzaꞌ!» tiꞌk u yoleꞌ tal te chajnaj. As jeꞌ veꞌt unqꞌa alol tetz viyol u Tiixheꞌ tu almikaꞌ tu umaꞌl u suutzꞌ. As unqꞌa tenameꞌ uvaꞌ nik ichꞌoꞌn taama tiꞌ chajaak, as til veꞌt ijeꞌ chajaak.
13As yak kuxh ul veꞌt umaꞌl u nimla kabꞌlaano. As jununil kabꞌal eꞌp veꞌt xoꞌl laval. As vujvaꞌl mil unqꞌa uxhchileꞌ kat kami taꞌn u kabꞌlaanoeꞌ. As unqꞌa uxhchileꞌ uvaꞌ yeꞌ kat kami, as kat toksa veꞌt iqꞌii u Tiixheꞌ tu almikaꞌ taꞌn u xoꞌvichileꞌ.
14As ech ipal veꞌt vikaꞌv u kꞌaxkꞌoeꞌ kat pali. As il veꞌt vitoxvu u kꞌaxkꞌoeꞌ tul veꞌteꞌ.
15As kat toqꞌsa veꞌt vivujpu u ángel u trompeta. As mamaꞌla tuul viꞌ kat uch tu almikaꞌ uvaꞌ ech nik tal ileꞌ: Kajayil unqꞌa tenameꞌ uvaꞌ nik til unqꞌa ijlenaaleꞌ isuuchil vatz u txꞌavaꞌeꞌ, as aꞌ veꞌt u Kubꞌaal Tiixheꞌ ni ilon isuuchil scheel tukꞌ u Kubꞌaal Jesucristo. As yeꞌl veꞌt iyaꞌtebꞌal u tijleꞌm Aakeꞌ tiꞌ u tenameꞌ uvaꞌ at jaqꞌ u tijleꞌm u Tiixheꞌ, tiꞌk unqꞌa tuul viꞌeꞌ.
16As vinaj kajvaꞌl unqꞌa qꞌesla aamaeꞌ uvaꞌ xonlik veꞌt tu vixonlebꞌaleꞌ vatz u Tiixheꞌ, as kuꞌ veꞌt qaaloj vatz Aak techal oon ipala vatz txꞌavaꞌ tiꞌ toksat veꞌt iqꞌii Aak.
17As ech tal veꞌt ileꞌ: Kubꞌaal Tiixh uvaꞌ nim aalcheꞌ tiꞌ unqꞌa veeꞌ skajayil, taꞌntiixh see, axheꞌ uvaꞌ atik chit axh; as axheꞌ uveꞌ at axh cheel; as axheꞌ uveꞌ tuk uloj veꞌt axh. As ni qaqꞌ taꞌntiixh see, tan kat atxakonsal veꞌt u eejleꞌmeꞌ. As kat oksal veꞌt unqꞌa tenameꞌ skajayil jaqꞌ u eejleꞌmeꞌ.
18As kat ul veꞌt iviꞌ unqꞌa tenameꞌ seeꞌ tiꞌ teesal aqꞌii. As kat oonyu veꞌt iqꞌiil vatxꞌiꞌtziꞌleꞌ tiꞌ abꞌanat isuuchil unqꞌa kamnajeꞌ, as tiꞌ aaqꞌat veꞌt vitxꞌajaꞌm unqꞌa akꞌameꞌ uveꞌ kat qꞌajsan vayoleꞌ, tukꞌ vatenameꞌ uvaꞌ ni oksan aqꞌii, kꞌuxh nim talcheꞌ moj yeꞌle. As aꞌeꞌ u qꞌiieꞌ uvaꞌ tuk asotzsa veꞌt ivatz unqꞌa uxhchileꞌ uveꞌ ni yansan u vatz txꞌavaꞌeꞌ, tiꞌk vinaj kajvaꞌl unqꞌa qꞌesla aamaeꞌ.
19As kat jajpu veꞌt u tostiixheꞌ uvaꞌ at tu almikaꞌ. As kat ilax veꞌt u kaaxhaeꞌ uveꞌ kolikkat unqꞌa yoleꞌ uvaꞌ ijej kan u Tiixheꞌ sqiꞌ, oꞌ vitenam Aakeꞌ. As vaꞌlik chit ilitzꞌkabꞌan u kayampaꞌleꞌ uvaꞌ kat vila. As kat vabꞌi ivulun mamaꞌla tuul viꞌeꞌ tukꞌ u qꞌankooeꞌ uvaꞌ vaꞌlik chit itzetkabꞌaneꞌ. As kat ul veꞌt umaꞌl u kabꞌlaano tukꞌ mam sajbꞌatz.
