Apanll Kamachtamarini 19:27-35

²⁷Mishat, mucheetsis tatsamooru iripich ktireerintspa. Suseetstamtis yuwaa tsparatu anoo kturintspa

²⁸Mishat, maachiritis tsipaku, mangis mantsakus, nutseetsis chawarintspa. Mishat, nutsimunis maacheetsi urutamari kataru anumashpa yandarintspa. Watam nuw Apanlli Taarashipani siyaam tinaranginawa.

²⁹Mishat, ipareetsish kizaa yutaritam wayayarus, mshipaneem ínarintspa. Sheeruni, kurikee zapan putapani átus shirintspa. Amb ashkus mantsir ashiksa. Ashkachinaareesa, kizpur mantsir taatssa piyartach tputs tamakanaya siysat ashtachtamsa.

³⁰Mishat, yuwaa nuw zar sápatoo kanusissheem wayarangi anush zar siysat kanusangtamtsa. Mishat, nuwash pangi kuskachus, mangiptis napangtsa, nuw siyaa atashina, watam nuw Apanlli Taarashipanawa.

³¹Mishat, wázuririp siy pshtukinaareesa, Nuwaa mangi natstanda, tárintspa. ¿Mayaamaja yashingoo chinachich? Apanlleemsha itsachtakpaz ashtachiya. Ashkachu, nuwsha siyaa tsachichina. Watam nuw Apanlli siyaam taakinawa.

³²Wachinash tputs napkinaareesa, siysat wachinaam kutakus istangtsa. Amb ashkus, saanaatsi wanasir nuwaa Apanlleetsi tuyamandaksa. Watam nuw Apanlli Taarashipanawa.

³³Mishat, arapich tputs tunar siyash taakinaariya, siysa wanasir napangtsa; kiyung yacharintspa.

³⁴Saanpata chinakis ambtam shingtsa. Tatsamooru chinangtsa, watam tputstamtawa. Sirútama, siy Ijipto tsap arapchitamtis taarangsa. Ijiptoshuch tputs siyaa kiyung yacharangana, siysat ambtam tputsee arapcheewaa shirintspa, nuw siyaa atashina. Waatatana nuw Taarashipani siy Apanllirisa.

³⁵Mishat, tupaxanxakus, nda shuchimaam tatsamooru táchintsa. Táchshisheem ningat metoroo mantsir wayarintspa. Baransaatssha kiloo táchimaam kayxukus, tatsamooritam tácheerus kayxungtsa. Aratash maacheetsi wayungunoo tatsamaru táchingtsa, nda yanuru shuchimaama.