1Hidi kon auk nikit silang nga lam, suknahkitum auk ngat net Lae-blai Ana ka dil se leten ana mes dapa, ngala leten Sion. Un dil leo-leo nol atuli at 144.000. Se totoang atuil nas hmangin nas dul Lae-blai Ana na nol Un Ama ka ngalan nas.
2Hidim auk ming fala mes deng apan nua. Un lin na muun banansila el ui in baa nahi ka, nol dukun na el lelat ulan na. Mo fala na lin leok isi, banansila el atuli hut mamo in diuk sasanu ka.
3Kon nam, auk ngat net atuil at 144.000 nas dil saol Ama Lamtua Allah, nol hmukit aat muun isi man dil pukiu Ama Lamtua del in prenta ka ngas, nol tulu 24 tas. Atuil hut mamo nas tao dain balu mesa. Suma oen siis man taan dain na, mo atuil didang ngam tanan lo. Ta oen niam man babanan nol Ama Lamtua son, undeng Ama Lamtua nini Un Ana ka dala ka son, le baen nutus oen in kula-sala ngas.
4Oen nuli ka niu, banansila el atuil usin man len-langan net nol bihaat lo bii ka. Oen mudi-muid Lae-blai Ana na le laok elol tukun, lole Ama Lamtua baen nutus oen son, nini Un Ana ka dala ka, le halin nam oen daid Un nenans. Undeng na le, oen niam banansila el sa-saa isin hmunan, man atuli nui-nolen deng klapa la, le kil nolan laok bel Ama Lamtua nol Lae-blai Ana ka.
5Oen kon aa nole-lilung taan lo, undeng oen dalen nas niu.
6Hidim auk ngat net Ama Lamtua Allah ima-ii mes pait deng sorga. Un hong lapa-lapa se apan nua, le tek deng Ama Lamtua Dehet Dais Banan man hidi nutus taan lo ka. Un hong pukiu le tek totoang atuil in se apan-kloma ki ngias, totoang bangsa las, ngala-ngala las, dasi-dasi las, nol totoang nusa ngas.
7Un haman mumuun le tek noan, “Mi musti todan se Ama Lamtua Allah! Mi musti nikit Un ngala man muun isi ka lapa-lapa! Undeng un oras sa maa lius son, le Ama Lamtua keket-ketan totoang atuli li in dake-mana ngas. Naka Una! Nikit Un ngala ka lapa-lapa! Undeng Un man daek apan-dapa ku nol apan-kloma kia. Nol Un man prenta le tasi ka nol ui matang ngas totoang dadis.”
8Aa hidi ela kon, auk net ima-ii mes didang pait deng sorga, hong muid una. Un tek noan, “Dudus son! Dudus son! Kota Babel man muun isi ka dudus son! Kota man in daat isi ka, lea nini tatai nol dale ka son. Hmunan nu kota na el bihaat hmama ka, man dising totoang bangsa in se apan-kloma ki ngias niun mahus, le mudi-muid un in tao dadahut daat ta. Mo halas ni, kota na haup Ama Lamtua in komali ka son!”
9Hidim auk ngat net ima-ii didang pait deng sorga, man maa muid ima-ii nomer dua la. Un ahan mumuun le tek noan, “Doha lo! Totoang atuil man hui se hmukit in tao tele dadahut na nol bangat ta ngas, hidim sium un hmarat ta se oen hmangin nas tamlom oen iman na ngas, mam oen kon haup Ama Lamtua in komali ka!
10Mam Ama Lamtua esa man boho Un in komali ka bel one, banansila el Un ninung oen anggor tulu maliꞌ ka. Mam Un pasang soleng oen lakos ai blirang man kaloe hidi taan lo ka. Un ima-ii in deng sorga ngas, nol Lae-blai Ana ka kon ngat netas.”
11Totoang atuil man hui se hmukit na, nol un bangat ta, tamlom in sium nal un hmarat ta ngas, mam haup in susa-daat muun hidi nutus taan lo. Nus deng ai man tao oen le in haup susa ka, puit maa lelo-duman hidi taan lo.
12Tiata deng nas totoang un nahin na, Ama Lamtua atulin nas musti hii babanan se Un prenta las, parsai napiut se Yesus, nol musti hoen lo. Hidim auk ming fala mes deng apan-dapa ku tek auk noan, “Yuhanis! Ku musti dul elia: Ninin deng halas nia, eta atuil in parsai se Lamtua Yesus sas mates sam, oen haup ontong.” Kon Ama Lamtua Allah Koo Niu ka siut noan, “Baktebes! Mam oen ontong baktebes! Ta oen haup susa-daat se apan-kloma ki son, mo oen tahang le muid napiut se Ama Lamtua. Tiata mam Ama Lamtua balas oen in kae ka, nol oen kon nuil susa-daat se sorga pait lo ka.”
14Hidi na kon, auk botas silang nga. Kon suknahkitum, auk ngat net nopen mes muti kaloeꞌ, nol muik atuli mes daad se nopen na dapa. Atuling na, banansila el Atuling Baktetebes sa. Un lotong hlotong in nala deng lil-mea nol kil sabit nakan mesa.
15Hidim auk net ima-ii mes didang pait deng sorga, puti maa deng Ama Lamtua Um in Kohe-kanas sa. Un haman mumuun le tek atuling in se nopen na ka noan, “Nini sabit ta le nui-noel tia! Ta oras in kat nakbuan apan-kloma ki isin na ka, maa lius son.”
16Kon nam Atuling in daad se nopen na ka, lalen Un sabit ta le nui-nole, nol tao nakbua apan-kloma ki isin nas.
17Kon muik ima-ii mes didang pait, puti deng Um in Kohe-kanas se sorga ka. Un kil sabit nakan mesa, le noan nui-noel sa-saa isin nas.
18Hidim, muik ima-ii mes didang pait puit maa deng maan in tuun kai bui bingis uin, se Um in Kohe-kanas man ne sorga ka. Ima-ii ni osa la doh ai in ne, maan in tuun kai bui bingis uin na ka. Un haman tek le lok ima-ii in kil sabit ta noan, “Nini ku sabit ta, le laok nui sa-saa isin in ne apan-kloma ku nguas tia! Ta se nua lam, anggor isin nas latus totoang son.”
19Kon nam ima-ii na lalen un sabit ta maa se apan-kloma kia, le dit nal anggor isin nas. Hidim un tamang anggor isin nas lakos se bak in lee ka. Kon oen kida-kida le kat nal un uin na. Kida-kida anggor isin se bak in lee ka, na Ama Lamtua in komali ka.
20Bak in lee na ne kota likun. Dedeng oen kida anggor isin na uin nas sa, dala mamo baa puti. Dala la in baa ka el palun mesa, un blatas sa kilu 300, nol un lihu ka meter mes tailuang.
