5 Tau ta do oi sisiba henia neganai, iena vairana dekenai do oi gwauraia hedinarai. Namo lasi unai tau do ia laloa, oi ese ia dekenai oi laloa lasi momokani.
6 Bema oiemu turana ese oi ia hahisia neganai, unai be oi do ia hanamoa totona. To bema oi ia dagedage henia tauna ese, oi ia kisi henia neganai, koikoi be unai.
7 Bema oi boga kunu neganai, hani do oi ura henia lasi momokani, to bema oi hitolo neganai, mamina dika momokani aniani danu do oi ania.
8 Iena noho ruma ia rakatania tauna be, manu ta, iena noho ruma, dekena amo ia heautania bamona.
9 Dehoro bona bonana namo muramura ese, taunimanima edia kudouna idia hamoalea noho. Unai bamona danu tau ta ena hereva namona ese, iena turana ia hamoalea noho.
10 Oiemu turana, bona oiemu tamana ena turana, be do oi laloaboio lasi. To bema oi dekenai hisihisi ia vara neganai, oiemu tadikakana ena ruma dekenai do oi lao lasi. Badina oiemu badibadinai noho tauna be ia noho kahirakahira, unai dainai ia ese oi do ia durua haraga diba, to oiemu varavara idia noho daudau.
11 Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.
12 Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.
13 Bema tau ta ese, idau tauna ena abiatorehai totona, gwauhamata ia karaia neganai, unai tau ena kouti be, gwauhamata toana totona do oi abia. Bona bema ia ese idau bese tauna totona, unai bamona gwauhamata ia karaia neganai, unai tau ena gau namona ta, be do oi dogoatao momokani.
14 Bema daba maragi neganai, oiemu turana oi hanamoa mai boiboi bada danu, unai be oi ese, ia dekenai hadikaia hereva oi gwauraia bamona.
15 Tau ta ena hahine ese ia hepapahuahu henia noho, be ranu ia diho noho sisina sisina nega ibounai, doko lasi bamona.
16 Unai hahine ena hereva momo, be edena bamona do oi koua diba? Oi ese lai oi hadokoa diba, a? Oi ese olive dehoro oiemu imana dekenai oi dogoatao diba, a?
17 Tau ta ese ma tau ta dekena amo, diba ia davaria noho, auri ta ese ma auri ta ia segea noho bamona.
18 Fig auna do oi naria, vadaeni fig huahua do oi ania, bona hesiai tauna ese, iena biaguna do ia naria namonamo neganai, davana namona do ia davaria.
19 Ranu ese tau ta ena vairana ena laulau ia hedinaraia noho, ma unai bamona danu tau ta ena kudouna ese, sibona ena lalona ia hedinaraia noho.
