Acts 7:27-37

²⁷Artwa retangkwel ahelirrek-penhel renh ayernek, ‘Angwenhel-anem ngenh arrernek, nga atetyart anwekantherr anetyek, anwenhantherr ayern-ayntetyek?

²⁸Nga ilkelheyel ntwa ayenh ipmek atwetyek, ntwarl artwa Egypt-areny apmwerrkel atwek-apeny.’

²⁹Moses ra awek-penh ra aterel apmer Midian-warl anterrek, ikwerel aney-alpek. Awey-atherr-anem ikwerenh Midian-el anek.

³⁰Ra aherrety 40-ek-atwety Midian-el anenh. Ikwer-penhan angel anyent-anem ikwer aremirrek, apmer arlpawel, apwert Sinai-itwek. Angel ranem arwerl ampekarl-itwek aremirrek.

³¹Moses-el arwerl ampekarl renh arek, ranem ywarn iterrek. Ra arrer irremel-anem arwerl-anem arek. Ingkart-anem ikwer-warl angkek,

³²‘Ayeng Akngey ngkweng anem, Abraham-kenh Isaac-kenh, Jacob-kenh Akngey anem.’ Moses-anem aterel arrewek. Ranem akapwert kwenirrek, arwerl renh arekerr.

³³Ingkartel-anem renh ilek, ‘Ngarl yanh rtneyel amek-amek-itwel! Pwet ngkwenh ingkety-they lhelha!

³⁴Atha arek Egypt-arenyel-rnemarl atyenh-rnem irrwampenty mpwareyel. Ayeng apetyek, renh-rnem itethiletyek. Atha ngenh apmer Egypt-warl thwenem.’

³⁵Moses Egypt-warl alpek. Ikwerenh-rnem ikwerety arlkarirrenh. Rernem renh ilek, ‘Angwenhel ngenh rnkernek, anwekantherr atyetyart anetyek, anwenhantherr ayernetyek?’ Akngey rant Moses renh arrernek, ikwerenh-rnemek Atyetyart anetyek, renh-rnem itethiletyek. Akngey Moses-ek angkek angel ikwerenh-angkwarr angel rarl Moses-warl aremirrek arwerl ampekarl-itwek.

³⁶Moses-el aherrety 40-ek-atwety renh-rnem arntarnt-arek. Akngeyel renh rlterrkilek, Moses-el ilek-ilek mpwarenh, Egypt-itwel, alay Apenng-angketyarr-itwel, aherrety arlpaw-itwek-anem. Ingkerrenhel Akngey renh iterl-arek, rarl rlterrk inngan.

³⁷Moses rey-antey Israel-rnemek ilelhek, ‘Ingwer-inger Akngeyel angkakert arrekantherr-warl thweneyenh, ra ayeng-apenyarl aneyenh. Ra artwa Israel-kenh arrpemarl aneyenh.’