Acts 28:3-21

³Paul-el-anem ngkwelty akwetyemel rwewarl iwek. Rtnwem-anem ikwer-they tyerrelhey-ayntek, iltyanem renh tnhwek.

⁴Apmer-areny-rnemel arek, rernem alakenh angkerrenh, “Artwa nhenhan artwa ahelengkwarl. Ra nthakenh iteth aney-angenh, lyert ilwem.”

⁵Paul-el-anem rtnwem renh rwewarl iwemel arrtyek, Paul ra arntetyirrey-angenh.

⁶Apmer-areny-rnemel renh artewentyel arenh. Rernem arenh, ra wangketyek-arrpantey, rtnwemel tnhwem-penh, ra ilwetyek-arrpantey. Rernem renh aleth-antey arenh. Ra mwerr aleth anenh. Rernem alakenh-anyem angkerrenh, “Artwa nhenh altyerr!”

⁷Artwa Publius akwerlp ikwer atyetyart anenh. Ra anwekantherr inkwerelhek, warl ikwerenh-warl akngeynek. Anwantherr arlta irrpetyel ikwer-itwek anenh. Anwantherr awek Publius-kenh aynikw arntety ayntenh rwenpirrek, atnert-then akalthek.

⁸Ikwer-warl alhemel, Paul ranem Akngey-warl angkek. Ranem iltya ikwerenh ikwer-warl arrernek. Publius-kenh aynikw-anem mwerrirrek.

⁹Rernem awek-penhan, arntety-rnem Paul-warl apetyenh, Akngeyel-anem renh-rnem mwerriletyek.

¹⁰Rernem anwenhantherr tnakek, amern-akerr anthek, alethel alpetyek.

¹¹Malta ikwer-itwek rtnwa ingwer anek. Alherrp-kety arrwekel-antey apetyek. Rtnwa Alexandria tawen-they apetyek, rtnwa itnan ikwerenh Akngey Atyewenheng. Anantherr Malta ikwerel alkent irrpetyek-atwety anenh-penh anwantherr rtnwa ikwer-warl-anem nganek, kwatyel aleth alhek.

¹²Anantherr Syracuse tawen-warl artarnpenhek. Syracuse tawen ikwer-itwek arlta irrpety-inger anenh.

¹³Ikwer-penhan anwantherr Rhegium tawen-warl-anem anper-alhek. Arlta ingwerelan awerel-anem kel antekerr-they-anem pwek, anwantherr arlta atherr-penh Puteoli tawen-warl-anem alhek.

¹⁴Tawen ikwer-itwek anwantherr Jesus-arl apenteyel irrpety arek, rernem anwekantherr yangkelhek, anwantherr wik anyent anetyek.

¹⁵Jesus-arl apenteyel Rome-arenyel awek, anwantherrarl apetyek, rernem anwekantherr-warl-athek apetyek, ampep-warl, rlwatetyek. Appius tawen Three Taverns tawen-warl. Renh-rnem aremel, Paul Akngeyek inkwerelhek, rantey arrpemarl arnkatyirrek. Ikwer-penhan anwantherr Rome-warl-anem anperl-alhek.

¹⁶Rome-itwek-anem kapmentel Paul renh tyarlewek rarl warl-itwek anetyek. Rernem ahelengkw anyent thwenek renh atnyenetyek.

¹⁷Arlta irrpety-penh Paul atyetyart Jew-rnemek yangkelhek. Rernem kel anyentirrek. Ra renh-rnem ilek, “Atyenh-rnemay, atha anwekantherrenh-angkwarr akengenty mpwarey-angenh, ayeng arrwekeleny-rnem apmwangkwarr alhey-angenh. Jew-rnemel ayenh anterrkwemel thwenek, Rome-areny kapment-warl.

¹⁸Rernem ayenh ayernek. Rernem ayenh iterl-arek ayengarl artwa arla. Rernem-anem ilkelhek rernem ayenh ipmek atwey-angenh tyarlewetyek.

¹⁹Jew-rnem atyetyart-rnemel ayenh ayntarrp-ilek. Alakenh-anyem ayeng angkek, ‘Ayeng ilkelheyel Atyetyart ilkwa Caesar-elant ayenh court-itwek ayernetyek.’ Atha nthakenh anwekantherrenh-rnem ayntarrp-iley-angenh.

²⁰Arrenhantherr iletyek, ayeng arrekantherr yangkelhetyek. Ayeng lyert tyeyn-akert aneyel. Ilek-they? Atha Akngey-kenh Itethiley-angker tnakeyel. Itethiley-angker renh Akngeyelarl alhelek, Israel-kenh-rnem-warl thwenetyek.”

²¹Jew-rnem atyetyart-rnemel Paul renh ilek, “Aray, apmer Judea-areny-rnemel pip anwekantherr-warl thweney-angenh-antey ngkweng-they. Artwa rernem apetyey-angenh-antey, ngenh ayntarrp-iletyek.