Acts 26:4-18

⁴“Urngin piyu Israel ma yad manang rogog ni ug par ko ngiyal’ ni ku gub bitir ke mada’ ko chiney. Yad manang rogon ni ug par u lan e nam rog ngu lan yu Jerusalem ni ku gub bitir kug pi’ilal.

⁵Gubin ngiyal’ ma yad manang, ni fa’anra yad ba’adag ni ngar weliyed ni aram rogon, ni som’on i yib ke mada’ ko chiney e ug par ni gag reb i girdi’en fare raba’ i girdi’ ko ba’ romad e taliw, ni aram e Farise fithingrad, ni yad be par ni yad be fol u urngin e motochiyel.

⁶Ere chiney e kug sak’iy u roy ni ngan pufthinnigeg ni fan e be lagan’ug ko thin ni yog Got ngak pi chitamangidad ni bay rin’ —

⁷nre n’en ni ba’aram ni yog Got nra pi’ ngak piyu Israel ni ir e be sonnag fare ragag nge l’agruw i ganong rok e tirorad e girdi’, ir e be l’agan’rad ngay ni bayi pi’ Got ngorad, ma yad be par ni yad be meybil ma yad be liyor ngak Got ni rran nge neap’. Ere bochan e re Pagan’ ney, i gur pilung, ma aram fan nike togopluw piyu Israel ngog!

⁸Mang ni gimed be finey, piyu Israel ndabiyag ni nge mich u wun’med nra faseg Got e yam’?

⁹“I gag ma gu tafinaynag nthingar gu rin’ urngin e tin nrayag rog nib togopluw nga fithingan Jesus nu Nazareth.

¹⁰Ba’aray e n’en ni gu rin’ u lan yu Jerusalem. I pi’ e pi tolang ko pi prist mat’wug nggon’ bo’or e tirok’ Got e girdi’ nga kalbus; ma nap’an nturguy ni ngan thang e fan rorad, ma kug un i towaliy ni ngan rin’.

¹¹Bo’or yay ni gog ni ngan gechig nagrad u gubin lan tafen e mu’ulung, mu gguy rogon ni ngug gelnigeg ngorad ngrogned nde mich Jesus u wun’rad. Ug wan ko pi binaw i yan ni bay nga wuru’ yu Israel ni fan e ngug gafgow nagrad ni bochan e kar gu damumuw ngorad.

¹²“Ireray tapgin ni gu wan nga Damaskus, nike pi’ e pi tolang ko prist mat’wug ma karogned e tin ni nggu rin’.

¹³Pilung, gu bay u kanawo’ nike yan i misiw’ mu gguy ram’en ban’en ni kab gel ram’en nga ram’en e yal’ ni mat ram’en u lanelang nga dakenag nge pi pumo’on ni gamad be milekag.

¹⁴Gamad gubin ni gu thaygad riy nga but’, mu gu rung’ag ba lam ni be non ngog ni thin ni Hebrew ni be ga’ar, ‘Saul, Saul! Mangfan ni ga be gafgownigeg? I gur e ga ra maad’ad ngom ni fa’anra mu cheal ngam togopluw ngog, ni bod rogon ba garbaw ni falig nga ba ley i gek’iy nma fek e cha’ ni ir e fak fare garbaw.’

¹⁵Mu gu fith ni lungug, ‘Somol, i gur mini’?’ Me yog Somol ni ga’ar, ‘I gag Jesus, ni ir e ga be gafgownag.

¹⁶Machane mu suwon ngam sak’iy, ya kug m’ug ngom ni kug turguyem ni ngam mang reb e tapigpig rog; ma ngamog ngak yugu boch e girdi’ rogon ni kam guyeg e daba’, nge n’en ni bay gu dag ngom ba ngiyal’.

¹⁷Ma bay gu ayuwegnem rok piyu Israel nge pi’in gathi yad piyu Israel, ni yad e bay gu pi’em ngam man ngorad.

¹⁸Me gur e ngam pithig owcherad ngam pingegrad ngar pi’ed keru’rad ko lumor miyad sap ko tamilang, ma ga pingegrad ngar pi’ed keru’rad nga gelngin Satan miyad pigicheal ngak Got, yu daken e michan’ rorad ngog e bayi n’ag Got fan e denen rorad riy me yag ngorad tagil’rad u fithik’ e pi’in ke mel’egrad Got ni ngar manged girdi’en.’