Acts 19:3-21

³Puth nil Paul.an thaw thant, “Niiy kan waaꞌān ngathara, than wiyangan kootra kuungkin niiyangan-a, an aak want-wanttak niiyant wun e?” Than puth thawin, “An keꞌ anman nil John.angan kootran ngakangan kuungk-kuungk thanang yimanangana.”

⁴Paul.an thaw thant, “Nil John.angan kootra kuungk-kuungk thanangan-a, an thananiya weentin ngul way thanttam anpalana thanan yump-yumpin woyan min aakanakan weentinwey. Aꞌ John.an thaw thant pam wanchantan, ‘Niiy ngangkangam piꞌ-piꞌān nunang pam anan nila mangk ngatharangan wampowa, nil pam anana Jesusa.’”

⁵Aꞌ than wik inangan ngeeyin nungantam Paul.antaman-a, thanan thawin nungant kootra kuungkow thanang an yipam meenathow thant wiyantan than kan-ngul ngangkangan piꞌ-piꞌantan nunang Jesus.ana.

⁶Aꞌ nil Paul.angana maꞌ nungantaman kootrang thanttamang wunpa aꞌ Ngeen-Wiy Min God.antamana yaam keꞌanam paththam wamp thanta than puth thaaꞌnganth wiy-wiyam ngul thaw-thawin Ngeen-Wiy Min alantamana aꞌ than ngulana kan-ngul waaꞌ-waaꞌin wik min God.antamana thant wiyantan.

⁷Ngeen-Wiy Minan yimanangan wamp thant pam twelve il-ilantana, pam twelve inanganiy-a, aak Ephesus punchana.

⁸Aꞌ kep koꞌalamakana Paul.an iiy-iiy church Jews.antamaka aakanakan, aꞌ waaꞌ-waaꞌ thant pam wanch al-alantan wik min God.antamana. Nil ngangk thayanam thaw-thaw thant. Nil maꞌ-yotaman thaw-thaw thantaniya than yipam ngangkangam piꞌ-piꞌayn nunang God.ana nil puth kan-kanam paththam moom piꞌan ngampar, nil min anman iiy-iiyan ngampar umyompanamantana.

⁹Puth than Jews wiy anangan yaꞌ way-wayamin, kuchek thayan weemin, puth than kaangk keꞌ paththam ngangkangaman piꞌ-piꞌayn wik Paul.antam anangana. Puth thananiya wik minana way waaꞌ-waaꞌin meeꞌ yotantangan. Puth nanpalana, Paul-a, puth Christians wiy anangan than koyam keꞌ-ngul iiyin church Jews.antamakan yaꞌ-ngul. Than ngaaꞌ thon-thonana aak thonang yalmathwin, aak wik thawanakan Tyrannus.antaman, aak angmanan-a, than wik God.antaman waaꞌ-waaꞌin aꞌ thaaꞌ-aath-aathin.

¹⁰Nil Paul.ang thaaꞌ-aath-aath thanang aak angmaniya kaap kuchamaka puth nanpalana than yotam anangana Jews aꞌ puth Greeks anangan aak angan wun-wunin aak Asia.angan-a, than kan ngeeyin wik min Lord.antamana.

¹¹Nil God.angana thayanam paththam yump nunang Paul.an nil yipam work piꞌan anangan yump-yumpow thant.

¹²Than pam wanchangan ngook anangan uwin nungantam Paul.antam nil kaꞌathaman piꞌ-piꞌ workakan, aꞌ than ngookan kalin pam wanch alpan al-alantan. Than alpan al-alangan ngookan maminan-a, than miyal erkam paththam wunina puth oony way al-alangan thampa wantin thanang ngula.

¹³Than pam Jews wiy anangana than pal-puy iiy-iiyina, aak thon-thonak. Than kenth-kenthin oony way anangan ngangk thanttam anpalan. Aꞌ kinch thonamangana than ngaantam-ngeeyin namp nungantang Jesus.antang wichayn. Aꞌ than thawin oony way alantan puth wantow nunang pam thonam anana, than inangan wik thawin, “Ngan inan puth thawanan namp Jesus.antanga, pam inman nil Paul.angan waaꞌ-waaꞌan nunanga, nint pam inana wantān nunang.”

¹⁴Pam than wik inangan thawinan-a, an than pam seven anangan nhengk nungantam pam namp Sceva alantamana, pam nil moom piꞌan thanttam priestsantam, aꞌ puth nil Jewa.

¹⁵Aꞌ oony wayan paththam thaw thant pam al-alantan aꞌ wik inangan thaw, “Ngay kan meeꞌmiy nunang Jesus.ana. Aꞌ putha ngay meeꞌmiy nunang Paul.an thampa. Puth niiy inangan weeꞌ-weeꞌanangweya?”

¹⁶Nil pam anman oony wayan ngangkangan piꞌ-piꞌa, erkam paththam chang pey thanttang pam seven al-alantangan aꞌ piik-piik thananga. Aꞌ nil kan-kanam piik-piik thanang aꞌ than kamp moꞌ-moꞌin yoon aawuchamana puth maꞌlipa ngook keꞌanang moꞌ-moꞌin aꞌ kemp thanttamana chaapar ukanang moꞌ-moꞌin.

¹⁷Than Jews maꞌmangkamanga puth Jews yaꞌ al-alangan angan wun-wuntan aak Ephesus.angana than puth kan wik thooꞌ ngeeyin ngeenan wamp thantana, aꞌ than maꞌmangkam anangan pam wancha winynyang ngul moꞌ-moꞌin. Aꞌ anpalana than pam wanchangan kan min-min ngul ngaantam-ngeeyin nil Lord Jesus.an pam wuut piꞌan paththam aꞌ thaaꞌ-kuumpin nunang aꞌ thawin ngul nil kan-kanam paththam pam piꞌana putha pam min paththam.

¹⁸Than pam wanch yot anangan thanan ngangkangan piꞌ-piꞌin nunang Jesus.an-a, thanana um thanttang thanin pam wanch yot al-alantakaman aꞌ waaꞌ-waaꞌin thanttakamana than wayan aak keenkaman yump-yumpin.

¹⁹Aꞌ than wiy anangan kaꞌathaman wayanangan iiyin maꞌ-kunch thakan-a, thanana wampin aꞌ lat wayanang maꞌmangkam thanttam anangana thumang kiingkin angman meeꞌ thanttang yotantangana. Than puth meeꞌmiy wukal ngeen-ngeenan theeꞌ-theeꞌin kaꞌathamana lat al-alantakana wukal piꞌan puth theeꞌin, one hundred thousand dollarsweya.

²⁰Than pam wanch thaaꞌ-wantanamang keꞌ-ngoongkam ngul ngangkangan piꞌ-piꞌin nunang Lord Jesus.ana puth than kan thathin thanang pam wanch anangan weentin Christ.antan puth than woyan way kan-ngul wantin ngula.

²¹Ngul-ngulana nil Paul.angan ngaantam-ngeey nil kaangk iiyow aakanak kaaw aak Jerusalem.aka, puth kaꞌathangamaniya nil ngaantam-ngeey mal kuuwam iiyow Macedonia wakana aꞌ putha aak Greece wakana. Nil Paul.an puth wik inangan thaw nungantakamana, “Ngay aak Jerusalem.akan kanan iiyāng-a, ngaya kuuwam ngul iiyāng aak Rome.ak thampanga.”