Acts 15:12-27

¹²Barnabas Paul-atherr angkenharl tyaty-arenyel-rnem renh-atherr akatemel awenh. Ratherr renh-rnem ilek Akngeyelarl renh-atherr rlterrkilek, ilek-ilek mpwaretyek, arntety-rnem mwerriletyek, Jew-weny-rnem-itwek.

¹³James-el-anem ilek, “Atyenh-rnem, atyeng-anem awelhenherr-arey!

¹⁴Simon-el ayenh ilek, ‘Akngeyel renh-rnem arrwekel rlwanek, rernem ikwer-areny-rnem-anem anetyek.’

¹⁵Akngey-kenh angkakert arrwekeleny-rnemel ilerl-apenh, alakenh arrpemarl. Akngey-kenh angka arrwekeleny alakenh-anyem aynteyel.

¹⁶Ingkart ra angkek, ‘Ingwer-ingeran ayeng apey-alpeyenh, atha David-kenh-rnem akngerriletyek, rernemarl irrpetyapant aneyel-kety.

¹⁷Ikwer-penhan Jew-weny ingwer-rnem Ingkart-warl-anem angkepirreyenh, Ingkartel renh-rnem arrwekel rlwanek-angkwarr.’

¹⁸Ingkart ra awank-antey alakenh angkek.

¹⁹Alakenh-anyem anwantherr arrkngert angkey-angenh, rernem menty Akngey-warl angkepirretyek.

²⁰Anwantherr ikwer-rnem ingkwernetyek pip ikwer-rnem-warl thwenetyek, rernem angka arraty iterl-aretyek. Anwantherr mwerrant-arey anayntetyek, Moses-kenh angka arrwekeleny aynteyel-angkwarr, rernem irrtywerremel altyerr-arrpantey-rnem-itwek tyenkerr amern-then aker-then arlkwey-angenh anayntetyek, rernem ingwer-kenh anew ikngwey-angenh anayntetyek, rernem aker arrkngangketyarr arlkwey-angenh anayntetyek, arrknga antywey-angenh anayntetyek.

²¹Aray, awank-they apmer arrpanenh-itwek Moses-kenh angkangkwarr akalty-anthenh. Rernem arlta Saturday arrpanenhel anyentel-anyentel reytirrek Jew-rnem-kenh tyaty akely-rnem-itwek.”

²²Ikwer-penh angkakert-rnem-then arntarnt-arey-angker-rnem-then tyaty-areny ingkerrenh rernem artwernem-anem rlwanek, Paul Barnabas-atherr-angkwarr Antioch tawen-warl alhetyek. Judas itna ingwer Barsabbas-an. Artwa ingweran Silas.

²³Kel rernem pip ingkwernek thwenetyek ikwer-atherr-angkwarr. Rernem alakenh ingkwernek pip-warl, Antioch tyaty-areny-rnemek, “Atyenh-rnem, Jesus-arl apenteyel-rnem akngerr, angkakert-rnem-then tyaty-areny atyetyart-rnem-then! Arrantherrarl Jew-weny-rnem, arrantherr Antioch tawen-itwek aneyel apmer Syria-el apmer Cilicia-el-then.

²⁴Anwantherr awek ingwer-rnemarl arrekantherr irrpelthirreyel. Anwantherr awek artwa tyaty-areny irrpety arrekantherr-warl alhek, rernem-anem arrenhantherr ilpertiley-alhek. Anwernantherran renh-rnem thweney-angenharl, anwernantherr arlarl.

²⁵Anwernantherr angkerrenh, Barnabas-atherr Paul-atherr ingwer-rnem-then arrekantherr-warl thwenetyek. Anwernantherr Barnabas Paul ikwer-atherr inkwerelhemel.

²⁶Ingwer-rnem ikwer-atherr irrpelthirrenh, irrwampenh anthenh, ratherrarl Jesus Christ-kenh angka ilerl-apenhek.

²⁷Anwernantherr-anem Judas-atherr Silas-atherr ikwer-atherr-angkwarr thwenem. Rernem pip ikwer-penh angka anayntilem, angka anyent renhey-antey.