Acts 10:11-38

¹¹Ranem altyerr arek. Ra itnywenek, panty ilkwa atnwenth ingwerek-ingwer-akert, thip ingwerek-ingwer-then, ahernel alheyel-rnem-then alker-they atwarrerl-alhenty.

¹³Ra awek, renharl ilek, “Peter-ay, aker atwemel arlkway!”

¹⁴“Ingkartay, atha nthakenh aker apmwa yanh-rnem arlkwey-angenh!”

¹⁵Ranem awelhek arrpemarl, renharl ilek, “Akngey angkek mwerr ntwa alhewer arlkwetyek, aker ilek-ilek ntwa alhewer arlkwetyek. Nhepenh apmwel-areth angkey-angenh. Akngeyel menty anthek, ntwa arlkwetyek.”

¹⁶Irrpety-inger Akngeyel alakenh ilek. Ikwer-penhan Angel ra panty renh atnwenth ilek-ilek-akert alker-warl-anem akngeynek.

¹⁷Peter ywarn-antey iterrek altyerr arek-penh. Artwa akngerr ingwer-rnem Cornelius-elarl thwenek, rernem arriw-ampenyel rtnek. Rernem nthwek Simon ikwer.

¹⁸Rernem ingwer-rnem ayernenh Simon ikwer.

¹⁹Peter ywarn iterrek, ra arek-penh. Itnweng Rlwartel-anem renh ilek, “Aray, artwa irrpety ingwer-rnem ngkweng nthwerl-apeyel.

²⁰Akemirra anamerl alhant ikwerenh-rnem-angkwarr! Atha renh-rnem ngkweng-warl thwenek.”

²¹Peter-el renh-rnem ilek, “Ilekek atyeng arrantherr nthwerl-apeyel? Nhanyemap ayengan. Ilekek arrantherr apetyekan?”

²²Artwa rernem renh ilek, “Cornelius artwa irlkenty-akert atyetyartel anwenhantherr thwenek. Jew-rnem ingkerrenh akalty ra artwa arraty-angkwarr mwerr innga aneyel. Rantey arrpemarl Akngey renh iterl-areyel. Apmwerrkel Akngey-kenh angel apetyek ngkweng yangkelhetyek, ngenh awetyek.”

²³Peter-el renh-rnem ilek, “Ingwa anyentel arrantherr ayntetyek.” Ingwepenh-anem rernem anperl-alhek, Joppa-areny-rnem-then.

²⁴Arlta ingwerelan rernem Caesarea tawen-warl irrey-alhek. Cornelius ra kel mpwelhek ikwerenh-rnem-akert.

²⁵Peter ra Cornelius-kenh warl-warl aylpenhek. Cornelius ra kwenirremel ikwer-itwek, ikwer inkwerelhek.

²⁶Peter-el renh ilek, “Atyeng inkwerelhey-angenh rtnerl-alha! Ayengan ahern-areny arwarl.”

²⁷Ratherr angkerrenhel, ra warl kwen-warl aylpek. Rap akngerr arek.

²⁸Ra renh-rnem ilek, “Arrantherr kel akalty. Artwa Jew-rnem artwa Jew-weny-rnem-kety arlkarirreyel. Akngey atyeng angkek, Jew-weny-rnemek irrpelthirrey-angenh anetyek.

²⁹Ayeng ikwer awelhek. Alakenh-anyem ayeng apetyek, Cornelius atyeng yangelhek-warl. Ayenh ilay, ilekek nga atyeng yangelhek?”

³⁰Cornelius-el renh ilek, “Apmwerrkel 3 o’clock-el-antey, artwa arnkwa arlter inngakert-anem atyeng-warl aremirrek.

³¹Ra ayenh ilek, ‘Cornelius-ay, Akngeyel ngenh awek, ntwarl ikwer-warl angkek. Akngeyel ngenh arek, ngarl ikwer angkenh, ntwarl man-weny-rnem arntarnt-arenh.

³²Ntwanem thwena Simon Joppa tawen-warl, itnan ingweran ikweran Peter. Ra lyertan yenp mpwarey-angker-itwel aneyel, Simon ingwer-kenhan warl artelhenh kwaty impalth-itwek.’

³³Athanem angkakert thwenek, ngkweng yangkelhek. Anwantherr ngkweng inkwerelhem, ngarl anwekantherr-warl apetyek. Anwantherr-anem akarrirrek, Akngeyek arraty inkwerelhemel awelhetyek. Ingkart-kenh angkek, rarl thwenek renh iletyek.”

³⁴Peter-anem angkek, “Ayeng akalty Akngeyan Jew-rnemekant inkwerelhey-angenh. Ra ingkerrenhek inkwerelhem.

³⁵Rernem ikwer arraty awelhenty, ra ikwer-rnem inkwerelhem.

³⁶Arrantherr akalty, Jesus Christ-angkwarr Israel-kenh ingkerrenh anyentirremarl. Jesus ra Ingkart ingkerrenhek aneyel.

³⁷Arrantherr akalty Judea-itwek John-el renh-rnem ilek, rernem baptise inetyek Galilee-itwek, Judea-itwek.

³⁸Arrantherr akalty arrpemarl Akngeyel Itnweng Rlwart renh Jesus Nazareth-areny-warl thwenek, renh rlterrkilek.