Abosel 1:8-24

⁸Ina otane Ne Gode Hobe dabai tenea ibo bekebe bianea e titilo omkayebea ibo moniba Yelusalem bib sel isa Yudia betano bib mak bib mak sel isa eka Samelia bib sel isa eka bib mak betan mako blib isa alukum ne wengo omkayemomabiobo ge baabenea

⁹deibe ulanea abilim unang genea bebea atemebiba utnea isak ye une monea ayungo ge waisanoa i mo atemim blim kesiobe.

¹⁰E inanea unea e okok dlasanin nakai abilim uto sma ye teme monsiba abiseli youm namao dlusaibbuei asuke teniba Yesuse okok dlasanin nakai isu ye tlaniba baabeniba

¹¹Galili naka ibo mo mabianibta abilim uto tememibe! Yesus ele unea atemibo sinanomo tlang game osa makob memale unea atemib inamin ye tlea imin atemomabiobo ge baabesiba

¹²i amgolime Olibe golim ut blibo deiboniba moniba Yelusalem bib onsiobe. Amgolim ele meb Yelusalem bibo kikib ye malane biotabe.

¹³I inaniba moniba Yelusalem bib ye unaniba utniba biino asal uto aala binabibo tem ut onsiobe. Biin olo temo ut onsibi i niniino elitabe. Fita esa Yon esa Yems esa Endlu esa Filib esa Tomas esa Batolomyu esa Matyu esa Yemse niniin aseke Alfiase miin esa Saimone Lom seli kimanin kukubo mo gobe binabeba naka esa Yemse afete miine Yudase niniin asek esa itabe. I inaniba minabiba

¹⁴Maliao Yesuse biem osa eka unang mak isa eka Yesuse ningwal isa i tetemnaniba mibianiba Gode amitie nganha binibbiobe.

¹⁵Am olo dim ota bainobo galini nakaia unangai 120 ese mak miniba Fitae hana manea baabenea

¹⁶Nekwal ibo wentine! Yudase ni sinwalo Yesuse dlakanebua nitem Yudas etem nabioba Yesuse okoko ni aleyebea klabob otane Yudase monea Yesuse komokwali baabenea teniba Yesuse afu debeb moniba klabutam unibbiobe. Sinanggwano Gode Hobe nib fanine Debite weng olo omalea e naka ele weng sango Gode buk temo dolanebuo weng sang olo bain inanoa tam tlobe.

¹⁸Yudase inanea kukub misiam olo nanea Yesuse ananomabib nakai monio olaliba oleb monea dabale walonea monsanea ablabu daak blelanea ananoa ale gobiaba tlea kaanebiobe.

¹⁹E inanea kaanea Yelusalem bib seli weng sango wenteniba dabal ye niniino Akeldama ge nganhabiobe. Niniin olo mitmakamo dabal ele ilem dimobe.

²⁰Sinanggwano nib fanine Debite anso buko Samo temo dolanea baanea E amo besa noko! Nakai o temo mo nimibe gena bianea eka ans mako tem osa dola baanea Naka mak eta e alango dokoneko genanebio kesoa

²¹nibo memalo nakai e alango mo dofanomo! Nibo inanoba dofanom gaobo bibilib ile mo dlanomobe! Sino Yone aa fuayemin nakae okoko okok kebe dimo ni Yesus etem nabioba nakai ni bekebe haabianiba inamin namin okoko Yesuse nabeo watemebiba kaanea ula abilim une naka ita mo dofanoba e tena bianoba Yesuse kaanea imin hana uneo wengo omkeimameko gesea

²³i nakai asu dlakasiobe. Naka eli dlakasibi make niniino asumatnabe. Mako Yoseb eka mak ole Basabas Yastas etabe. E dofa nabianiba eka mak ele Mataiase dofa nasiobe.

²⁴I inaniba dlakaniba Gode baabaniba Sum kobo naka eli bobol temo alukum tekein kebeb kesoa kobo funaneba Nakae yeta dofaine gabeb mole alebeneba