Aagam ke baat 15

1

2

3

4

5

6

7

8

9

10

11

12

13

14

15

16

17

18

19

20

21

22

¹Tab ham oeppar baadar me phieno ek atjambho tjienha dekhlie. Oe bahoet biesaal waala raha! Hoewa par saatgo Parmeswar ke parie tajaar raha saatgo aakhrie waala moesiebat dewe ke. Ie sab Parmeswar ke antiem sadja rahiega, tab okar goessa pataai djaaiga.

²Ham koetjh dekhlie djaise kaatj ke samoendar aur oman aagie barat raha. Aur samoendar ke kienaare manai log thara raha. Oesab kharaab djanaawar aur okar moertie ke djiet leis raha. Oelog to okar naam ke tjienha aur nambar na leis raha. Parmeswar oelogke ek ekgo wienaaw dewaais raha badjaawe khaatien.

³Aur oesabhan Parmeswar ke goelaam Mosas ke aur bhera ke Battja ke gaana gaawat raha kie: Sab se maahaan Prabhoe Parmeswar, aapke kaam bahoet biesaal aur atjambho hai! He sab djaatie ke Raadja, aapke rasta ekdam siedha aur sattja hai!

⁴He Prabhoe, aapke sab iensaan barka maaniega. Aur har ek aapke naam ke aadar kariega. Khaalie aap pawietr baato. Ab aapke faisala ke kaam sagaro djanaawal gail hai. Sab doenia ke djaatie log aaike aapan gaathie par gierke aapke poedjiega.

⁵Ekare baad ham dekhlie kie Parmeswar ke swarag ke mahal khoele hai.

⁶Tab saato parie djaun saatgo moesiebat deiga, oesab bahare aail. Oelog ekdam safa sapet oeddjar malmal kapra pahienies raha aur oelogke tjhaatie par sona ke tjamotie raha.

⁷Tab tjaaro djienda swarag waalan me se ekgo oesabke ek ek sona ke kobba deis. Oe kobba Parmeswar ke goessa se bharal raha. Aur Parmeswar to hardam khaatien rahiega.

⁸Tab okar mahal dhoewa se bhar gail dekhaawe khaat kie oe ketana maahaan hai aur oke ketana biesaal saktie hai. Aur koi okar mahal ke bhiettar na djaai sakat raha djab talak parie log aapan saato moesiebat na poera kariega.