A Kakailai I Lia 6:3-12

³Iau kai kaugu vakak, ma kaugu vakak ia kaugu; I tabar kana kikil na sip maravai ta ra umana vaigoara.

⁴Ea, kaugu vakak, u ti mariringian da Tirsa, Ma u vakak da Ierusalem, A magit na bunurut da ra loko na tarai na vinarubu ma ea vakilang na kamara.

⁵Una lingan irai kan iau, Tago a ura kiau na matam dir ga tar vaburut iau. Ra pepe na ulum i da ra kikil na me, Nina i va ta ra papar Gilead.

⁶Ra umana pal a ngiem dia da ra kikil na sip. Nina ba di ga puk vagomgom diat; Dia vanavana a ururua, ma pa ta tikai ta diat i iba.

⁷A ura pagupagu na ngiem, nina dir ki ta ra vavai kaum mal na tubatuba, Dir da ra pakana gamata.

⁸A laptikai na vinun diat ra umana vavina kai ra king, ma a lavutul na vinun na tultul na vavina, Ma ra umana inip na vavina nina pa di luk diat, dia ki.

⁹Kaugu nat na uka, kaugu viviliai, ia ra kavakake, A kopono vavina kai nana; A bul na vakak kai nina i ga lalau pa ia. Ra umana vavina dia ga gire, ma dia ga biti: I ti doan; Maikir, ra umana vavina kai ra king, ma ra lavur tultul na vavina, dia ga pite pa ia.

¹⁰Ia go i da ra kapa ai ra buabuarana, Ma i talapar da ra gai, Ma i pupua da ra keake, A magit na bunurut da ra loko na tarai na vinarubu ma ra vakilang na kamara?

¹¹Iau ga vana ur ta ra uma na galip, Upi ina gire ra lavur ginol ta ra male, Pi ina gire ra davai na vain ba i karakap boko, Ma ra gamata ba i pupu.

¹²Ba pa iau ga nununuk boko, kaugu mamainga i ga vako iau Ta ra kiki na vinavana kai kaugu vakak.