1Na erutai Keasi kaꞌene na oja mahujihunaꞌe veju.
2Vwea nuna na oja mahiꞌine na oni siporua ꞌojuraꞌomo uneunecha mapoka ja puꞌúmo marasahe ꞌee a hami hihuna areri oni oji vaji marana jaꞌinaꞌe rehuna.
3Vwehu núpo roe ara ꞌunama kaꞌene nimaiji ꞌurahe onuji ꞌwarivume hejujaho na teamanimana.
4ꞌEjuꞌukamareꞌe sesahu núpo ꞌunama mamaiji ojuji na hejujaho na nihoꞌo teamanima paraniu.
5Vwea nuna kaꞌene oja mahiꞌiniji ara vwehu núpunaꞌi vene ꞌee apiora kaꞌene vwea vwina vene niꞌajihujaho mavarasaꞌina venu.
6Pu sosi vaji ara oja kaꞌene mihuji rone ꞌwaruvu jihunaꞌe a pu irechamie vaꞌavajaho hami ꞌunama kaꞌene Godi teamahuni jaꞌinaꞌe veꞌamana.
7Pu Huni Ihijihuni hahi usema vaꞌajihunaꞌe pu Jenitaru puna unenua ꞌahoꞌa paꞌekara.
8Ijihunaꞌe nú ꞌuꞌo ea ijaꞌinijija niꞌajihuna. ꞌEjakame nú pu puꞌúmo ahume nimaijihuni kaukara vejiꞌinaꞌe rehuna.
9Na sosi huni vuꞌa ꞌahoꞌa na heha ꞌahi nivejuta. ꞌEnakaivo Tiatiripisi hu nihoꞌo niꞌimaꞌura reꞌiro vwihaꞌi kaivo núra raka kaꞌene ꞌwaravajaho hu rarenana.
10Ijihuni hahi nara roujaho hura uneunecha kaꞌene sisei venajaho ꞌeka ro najahuna. Hu núnunaꞌi ira sisea ꞌwarume ꞌee namuhuna. Hu vwehu núna kaꞌene apiorijija paaherame ꞌee ea ꞌahoꞌa tanuꞌurihuꞌe pu ꞌuꞌo ijaꞌina vejura. ꞌEne ea ꞌahopo apiora ꞌekaꞌujaho hu pu tanuꞌurihuꞌe sosia paroꞌi kaivo samai hijura.
11Vwea nuna kaꞌene na oja mahukera a pakaꞌeje sisei jihuni ꞌunamijaho matesaraꞌamana kaivo mamai jihuni ꞌunamijiru matesaraꞌamana. Ea irara mamaaru venujaho hu Godi ona ꞌee ea irara sisearu venujaho hu Godi pakamuna.
12Ea mapoka Timitiriasi taꞌarohe hina ꞌwavura. Nú Timitiriasira raka kaꞌene venuji nú kama hejuji ꞌuꞌo ꞌwaravura. ꞌEjuꞌukame ja niheju núra raka kaꞌene ꞌwaravujija nimaa nimaa.
13Na nihoꞌo mapoka mapoka ꞌwaraꞌi ꞌahiu kaivo na heha ꞌahi ijà vehuna ura pareniu.
14Na vuꞌe a kahuna ni samatuꞌu renu. ꞌEne nú noꞌo urania kakaraviꞌi ahuma ꞌwama hehuna. Matauviꞌinijaho a huꞌúmuna ꞌee napuhuana kaꞌene iki hijujipo a ꞌajoravu. ꞌEne napuhu nuna ihi ꞌurihiꞌi ꞌajoraꞌamana.
