1Aamai akimai Kristiano papiaumi, lai oi agoinimi faumaisai fomegamega, ega koa Lopia fouga fepea feafiakoa, ke oi faagamiai emia koa iꞌopoga, papiau maꞌoai egaꞌina iifaga fekepalopiania aoma.
2Ke faumaisai fomegamega, ega koa Deo lai papiau apalaꞌi, laomai apalaꞌi kekapaꞌi auꞌi eeꞌiai fepapealaimai, gome papiau maꞌoai mo pakoꞌa papiauꞌi laaꞌi.
3Kai Lopia auga kapaꞌina eifania agekapa eoma auga agekapa paisa. Ke isa oi kapula agepenimi, ke laomai apala ikapa auga eegai agepakaisapuimi.
4Ke lai Lopia eegai kapula aafia kainai alogo, oi maamiai kapaꞌina aifaniꞌi auꞌi okapaꞌi, ke agokapaꞌi afaefuafua.
5Lai Lopia amegamega penia, ega koa isa Deo oi animi eani alogaina auga fepaopolanimi, ke Kristo ekiekie ganinagai ega kiekie maꞌoai eafiapiꞌi mo auga isafa fepaopolanimi aoma.
6Aamai akimai Kristiano aumi, lai Lopia Iesu Kristo akagai aifa kapula penimi. Oi epomiai papiau kapaꞌi keꞌapolo, ke pamalele lai apeniimi auga kainai akeagu koa aisama, oi egaꞌina papiauꞌi maꞌoai fomuniꞌi.
7Gome lai afai oi eemiai aagu aisama, alaꞌapolo, ke oi ifomi lai munimaisai ala fopea oma auga ologo.
8Ke lai aufalao agaꞌo ega foꞌama aaniia aisama, alaani aagenia mo kai, afa aogeisa kai aaniia. Ke lai gapi gani apinauga, meau aafiiꞌi aafipugu alogaina, ke egaꞌina mo akapaisa aefuafua, ega koa lai oi meau falapenimi aoma.
9Lai egaꞌina akapaisa auga, oi eemiai pipalagai falaafia alaoma puo alakapaisa kai, oi lai ifomai kapaꞌina akapa auga foisa fokapa aoma puo, ega akapa oma.
10Gome lai oi eemiai aagu aisama, iꞌina iifaga isafa apeniimi: “Au kapa afaepinauga koa aisama, afaeaniani,” aoma.
11Lai ega aifa oma, gome papiau isaꞌi oi epomiai keꞌapolo auga fouꞌi alogo. Isa pinauga agaꞌo akekapa kai, papiau isaꞌi eꞌi laomai auga kelao kekaisapua.
12Lai Lopia Iesu Kristo akagai egaꞌina papiauꞌi aifa kapula peniꞌi, ke ainaꞌi apalogo, ega koa isa fakelao fakemai aage mo kai, fekeagukipo fekepinauga, ega koa kapaꞌina anina keani auga eꞌi pinaugai fekeafia aoma.
13Ke aamai akimai Kristiano papiaumi, oi auga kapaꞌina felo okapa auga eegai foloafipugu foloapakipo kai, fokapa faefua.
14Ke oi epomiai aufalao agaꞌo kapaꞌina iꞌina malelegai apapua efai auga kaiꞌiai afaepea koa aisama, oi isa foagouka felo alogaina. Ke fou fololao folomai ega koa femeagai.
15Kai oi isa emi ou auga folopamia kai, aami akimi koa iꞌopoga kapaꞌina apala ekapa auga eegai aina fopalogo.
16Ke pau auga, lau lamegamega ega koa Lopia gagao inagome auga, ifo aufa kina mo gagao fepenimi laoma. Ke kapaꞌina agokapa alogai ganinagai, ega gagao fepenimi foagu felo laoma. Ke lamegamega Lopia oi maꞌomiai mo eemiai gaagu laoma.
17Lau Paulo iꞌina pamegoga ifou imauai lapapua. Ke lau eꞌu malele maꞌoai ega lapapua omaꞌi, ke eꞌu malele ipapua ega koa.
18Lau lamegamega ega koa iꞌa aꞌa Lopia Iesu Kristo ega gafegafe akaikiꞌa eemiai feka laoma.
