1Ego, hire sari na qua zinama vina betobeto. Mi varavara tokani gami, pude tuturei ta urahae la sa inavoso tanisa Baṉara, meke mani tava hinokara si asa, gua tugo sapu ele ta evaṉa koa gamu.
2Mi varavara tokani gami tugo, pude mani va sare gami sa Tamasa koari na tie kaleadi. Ura lopu ari doduru tie si va hinokaria sa Inavoso Leana.
3Ba ta ronuna sa Tamasa, meke kote va ṉiṉira gamu, na harupu va seu gamu Sa koe Setani, sapu sa ṉatina sa kinaleana.
4Meke raṉe valeania gami sa Baṉara, pude tokani gamu pude taveti kamahire sari doduru gua pu ele tozini gamu gami, meke lopu kaqu makudo tugo taveti gamu vugo na repere sapu gua arini.
5Mani turaṉi sa Baṉara sari bulomia, pude keha lulia sa tataru te Tamasa meke se Karisito pu turu va nabu pa korapa tinasuna.
6Kasa tasimami, tozini gamu gami pa korapa Pozana sa nada Baṉara Zisu Karisito, pude mi koa va seu koari na tie pu hakohako pa tinavete, meke lopu luli rini sari na vina tumatumae saripu ele ponini gamu gami.
7Ura gilana valeania mia mo telemia sapu gua pude keha luli gami. Lopu hakohako pa tinavete si gami sipu koa koa gamu.
8Lopu ta poni moka pa tie si gami, ba tavetavete rane na boṉi si gami pude lopu va tasuna gamu pa tinepa ginani na poata.
9Garo tugo pude tepa tinokae si gami koa gamu, pude ta tokae mami, ba vekoa gami sa kineha hie koa gamu pude mi tavete lulia.
10Ura totoso korapa koa koa gamu si gami, si ele hoke tozini gamu tu gami sapu guahe: “Be hakohako tavetavete si keke tie, si mani lopu henahena tugo,” gua.
11Na avoso nia gami sapu kaiqa tie koa gamu si hakohako sisigiti, ba voriti ni mo rini sari na tinoa tana votiki tie.
12Koarini pu gugua asa, si tozi ni gami pa korapa Pozana sa Baṉara Zisu Karisito, pude di koa noso. Madi tavetavete, pude madi va gavori teledia sari ginani pu kote henai rini.
13Ba gamu kasa na tasimami, si mi lopu mabo nia sa tinavete leana.
14Be koa nana keke tie sapu korona va tabea sa mami zinama pa leta hie, si mi va nonoga vekoa sa tie sana, mamu lopu somana baere koasa, pude mani kurekure pule nia.
15Mi lopu kukiti gunia na mia kana, ba mi nore gunia mo na tasimia si asa.
16Meke telena sa Baṉara tana binule, si mani ponini gamu sa binule doduru totoso, pa doduru ginugua. Mani koa koa gamu doduru sa Baṉara.
17Arau Paula si kuberia sa zinama tataru hie pa limaqu soti. Sa qua tataru arau Paula koa gamu. Meke gua tugo hie sa qua vina gilagila kinubekubere koari doduru qua leta.
18Mani koa koa gamu doduru sa tataru lopu ta ṉana kamona tanisa nada Baṉara Zisu Karisito.
