1Gosegwao gete ꞌigu leta ꞌeluwena ꞌemiya, ta ꞌigu leta nidi ꞌeluwa ꞌediyega yatootoo be yagie nuwaꞌiꞌisimi be wada nuwanuwa ꞌaiꞌaila,
2ta Yaubada ꞌina palopitao ꞌidi onao nuganuganidi wada nuwaꞌiꞌisidi, ta wate ꞌida ꞌInapwana, nate ꞌada Toꞌetoseyana, ꞌina loina ꞌana tosimanao loina nidi siꞌebwaꞌemiya wate wada nuwaꞌiꞌisidi.
3Ta ꞌebweu yage wada gimimwalatoni ꞌaene tuta ꞌana ꞌebe losalowa ꞌenaya ꞌaina totuyeya sida apwesa, be ꞌInapwana ꞌina ꞌeda manuna sida onaona besobeso, ta situyetuyeya, be taudi ꞌidi nuwanuwa toꞌumalidi simuliyedi,
4be sigwae, “To tuta sana ꞌimi ꞌinapwana nina ꞌiilaila limanama? ꞌAa, geyaꞌabo saꞌi! Lowaenei baleꞌu ꞌana mweluluwaꞌunu ꞌenega ga batuwa nigeya ꞌebweu wate yage ꞌida esaꞌugelasa. Lowa tubudao mwawamwawasidi ꞌidi tutega ga ꞌilagamaya, yage maiboꞌana ꞌadi ꞌita nina tuga. Nigeya sida esaꞌugelasa.”
5Taudi geya nuwadi sinuwaꞌiꞌisi ꞌaene lowaenei Yaubada ꞌina onega galewa ꞌiapwesa, ta bwasi solanega baleꞌu ꞌimweluluina bwasiyega,
6ga muliyega bwasiyega baleꞌu maiboꞌana ꞌigie toꞌumaliyena.
7Ta Yaubada ꞌina onega galewa be baleꞌu niꞌatu ꞌisaꞌububudi, ga siyamwayamwa be ꞌasiyata loina ꞌenaya ꞌigabu yauledi, ta totoꞌumalidi ꞌiloesawalidi.
8Gosegwao, ꞌebweu wate yage wada nuwaꞌiꞌisi, ꞌaene ꞌInapwana ꞌenaya ꞌasiyata ꞌebweuna ꞌatuwa yakwala tausani ꞌedaya, ta yakwala tausani ꞌenaya ꞌatuwa ꞌasiyata ꞌebweuna.
9ꞌAina tomota ꞌidi nuwanuwa ꞌaene Yaubada geyaꞌabo ꞌiguiguinuwedi yage nidi lowa ꞌiona upaupaediya. Ta ꞌomi geyaꞌabo Yaubada ꞌina guinuwa soꞌisoꞌi manudi wanuwanuwa, ta saꞌi ma ina eꞌalamaꞌiꞌita ꞌiyamwayamwami be maiboꞌami wada nuwaꞌebuni, ta geya nuwana be ꞌebweu yaita ꞌiloseye.
10Ta ꞌInapwana ꞌina bwaꞌomatana ꞌana ꞌasiyata maꞌetamo ꞌina mai ꞌatuwa toꞌipwala be ꞌiloesalutunidamo, be galewa ꞌisasawala ma ꞌina ꞌalapwasi sinabwana, ta yage maiboꞌadi galewaya ꞌawe ꞌalaꞌalasina ꞌenega ꞌiꞌala esawalidi, ta wate baleꞌu be yage maiboꞌadi ꞌenaya simiyami ꞌiꞌala esawalidi.
11Ta ꞌabo yage nidi maiboꞌana maꞌetamo sisasawala, ꞌilobwenena be ma imi bubuna ꞌesasena ta ma imi ꞌamayaba Yaubada ꞌenaya wada guinuwa.
12Ta wada yamwayamwa ma imi nuwayaina ꞌInapwana ꞌina ꞌasiyata ꞌina mai manini manuna, be tuta nina ꞌenaya Yaubada gimigalewa be gimibaleꞌu ꞌiloesawalidi ꞌawe ꞌalaꞌalasina ꞌenega,
13ta ꞌaboꞌada tayamwayamwa be galewa ta baleꞌu auwaudi taꞌitadi, nadigega Yaubada lowa ꞌionaupaupa, ta sena nina ꞌenaya bubuna palupaluna namo ꞌimiyami.
14Gosegwao, ꞌimi yamwana ꞌana tutaya watoo waiwai be ꞌeguma ꞌimamai, ꞌilobami ma imi bubuna palupaluna maiboꞌana, ta nuwa siwalowega wamiyami.
15Ta wanuwaꞌiꞌisi ꞌaene ꞌida ꞌInapwana ꞌina eꞌalamaꞌiꞌita ꞌalena ꞌaene nuwanuwana be ꞌada ꞌetoseyana tada loba. Yage gete manuna gosiya ꞌaiꞌailida Paulo niꞌatu ꞌemiya ꞌiꞌetoladiwa. Ta ꞌina mwalatoi Yaubada ꞌenega ꞌimai.
16Ga yage gete manuna ꞌisimana ꞌina ꞌetoladiyao maiboꞌadi ꞌediya. Ta ꞌaina yage ꞌina letao soladiya ꞌadi mwalatoi mwauna, ꞌenega toemwagemwageyao be tonenetao yage nidi sigibunidi, ta Buki Tabu ꞌina ꞌetoladiyao wate sigibunidi ga ꞌediyega taudimo sigie toꞌumaliyedi.
17Gosegwao, yage getedi niꞌatu ꞌomi wamwalatonidi, ꞌenega wada ꞌitaꞌiꞌisimi be geyaꞌabo totoꞌumalidi sianugana gesiyemi be wabeꞌubeꞌu.
18Ta esi ꞌida ꞌInapwana, tauna ꞌada Toꞌetoseyana Yesu Keliso, ꞌana mwalatoi be ꞌina oboboma ꞌemiya ꞌida sinabwa, ta tauna tada tupu atae. Eimeni. ꞌAboꞌagu Saimoni Pita
