2 Piɛɛ 2 - Bibeli Luayãtaalá

2 Piɛɛ 2

Click on verse(s) to share them!

¹Ãnabi ɛgɛnaↄ bↄ̀ yãa Isailiↄ guu. Beewa waasokɛn ɛgɛnaↄ bↄ á guu lↄ, aai ɛɛ pↄ́ ì to wà kaalɛ ká Lua yãdanɛu, aai lelekpa Dii pↄ́ ń bózi, aai ńzĩa kaalɛ kã́ndo.

²Wa tɛ́ńzi dasi an wisaiyãkɛa guu, wi sĩana zɛ́ bɛ̃̀ɛbo an yã́i.

³An bĩikɛa guu aa á ble ń ɛɛ pↄ́ aaì blewào. Yã́kpalɛ zↄ̃̀lɛmá à gɛ̃̀gɛ̃, i lí na ń Kàalɛna wɛ́uo.

⁴Asa Lua i malaika pↄ́ duunakɛ̀ↄ too, à ń ká gbã́o sia pↄ́ kú zĩ́lɛzĩlɛ guu, àↄ ń kũa e yã́kpalɛkɛgↄↄzĩɛ.

⁵I dṹnia zi ń a yãdansai pↄ́ kú a guuↄ too, a tò í dàńla. Ãma à Nↄee pↄ́ ì maakɛa waasokɛ bↄ̀ ń a gbɛ̃́ gbɛ̃ↄn soplaↄ.

⁶À yãdà Sↄdↄũ ń Gↄmↄↄola, à ń kaalɛ aa gↄ̃̀ túfu ũ yã́ pↄ́ a luayãdansaiↄ le seela ũ.

⁷Ãma à Lↄtu bↄ̀. A dɛ gbɛ̃maa ũ, aà nↄ̀sɛ ↄ̃̀ↄkpà ikoyãdansaipiↄ wisaiyãkɛa yã́i.

⁸Gbɛ̃maapi kú ń guuɛ, yãvãi pↄ́ àlɛ e àlɛ ma lá gu lɛ́ dↄ aà wã̀wã aà nↄ̀sɛmaa yã́i.

⁹Màa Dii gbɛ̃́ pↄ́ naawa bↄa yↄ̃a guu dↄ̃, mɛ́ a gbɛ̃vãi kũa dↄ̃ e àↄ gɛ́ ĩadaiwà yã́kpalɛkɛgↄↄzĩ.

¹⁰Atɛ̃sa gbɛ̃́ pↄ́ aaì saka ikoyãu, an mɛ̀ dↄ́ɛ'ĩiↄ ì dↄaanɛ́ gbãsĩkɛa guuↄ. Waasokɛn ɛgɛnapiↄá sↄ̃gbãade kàamaideↄnɛ. Dↄ́ɛa ń malaika gawideↄ lí ń vĩakũo.

¹¹Malaika pↄ́ an gbãa ń ń ikoo dɛ waasokɛnapiↄlaↄ aali we ń tↄbɛ̃ɛsì aa gɛ̀ ń ń káalao Dii aɛo.

¹²Gbɛ̃́piↄ ì yã́ pↄ́ wa a gbadↄ̃o bɛ̃̀ɛboɛ. Gbɛ̃nazĩn báa mɛ́ dańla, aa làasoo vĩo. Wà ń í kɛ́ wà ń kṹ wà ń dɛ yã́iɛ. Aa kaalɛ lán nↄ̀bↄↄwaɛ,

¹³wi vãi pↄ́ aa kɛ̀ fĩabonɛ́. Dↄ́ɛ'ĩikɛa fãanɛ ì kɛnɛ́ yãna ũɛ. Gↄↄ pↄ́ aalɛ blɛbleánↄ, aaì pↄnakɛ ń ń kↄ̃nikɛanɛ́oɛ. An kua á guuá sãaɛ mɛ́ gbãsĩɛ.

¹⁴An wɛ́ ìↄ pɛa nↄɛ dↄ́ɛ'ĩideↄwa, duuna lí mↄ́máo. Aaì kↄ̃nikɛ gbɛ̃́ pↄ́ Lua yã́ i zɛdↄ ń guuoↄnɛ. Bĩi ń sↄ̃ pà. Lua lɛkɛ̀nɛ́ɛ.

¹⁵Aa sã̀sã, aa kɛ̃̀ zɛ́ súsuwa, aa zɛ́ doũ sɛ̀ ń Bɛↄↄ nɛ́ Balaaũ pↄ́ ye ↄbɛ̃ɛio.

¹⁶Zàa'ĩna a pↄ́lɛbũu'ia à yã'òɛ̀ lán gbɛ̃nazĩnawa, à aà gbà laai aà vãikɛa musu, à gìɛ̀ ń aà mìsaiyãkɛao.

¹⁷Gbɛ̃́ beeↄ dɛ lán nibↄna pↄ́ a í bàwaɛ, lán lousisia pↄ́ gɛ̃̀zɛa ń ĩ́anaowa. Gusia níinii ↄ̃ Lua dìlɛnɛ́ yàae ũ.

¹⁸Aaì ĩ́an gii zↄ̃ↄ dã, aaì kↄ̃nikɛ gbɛ̃́ pↄ́ aa bↄ̀ sã́sãzɛu dafuↄnɛ ń dↄ́ɛ'ĩio ń wisaiyão.

¹⁹Yã́ pↄ́ ì ń ↄ̃̀ↄkpa zↄↄn ń ũ, ↄ̃ aaì gↄ̃a wɛ̃́ɛↄ ũ lɛgbɛ̃nɛ́. Asa gbɛ̃́pii dɛ yã́ pↄ́ a sↄ̃ blè zↄ ũɛ.

²⁰Tó aa bↄ̀ dṹnia gbãsĩkɛau wá Dii wá Suabana Yesu Kilisi dↄ̃a sabai, mɛ́ aa tò yã́pi ɛ̀a yèelɛmá à ń sↄ̃ blè, an kua gbɛzã vãi ìↄ dɛ a káaua.

²¹Tó aai zɛ́ súsu dↄ̃ yãao, bee maańnↄ dɛ kɛ́ aa dↄ̃̀ aa gbàsa bↄ̀ Lua yã́ pↄ́ wa dànɛ́ kpɛla.

²²Yáasi pↄ́ wa kɛ̀ɛ beeↄ sĩana sùmá: Gbɛ̃ ì ɛa pↄ́ pↄ́ a pìsi ble. Beewa lↄ: Sàwakusana pↄ́ wà a zu'ò ì ɛa málɛ pɛ̀lɛau.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

2 Piɛɛ 2123

2 Piɛɛ 2
1
2
3