1Gebii doen menge otaw migpelingo-lingo te telekeliwat dan te kagi te Timanem, aw doen heman menge otaw megtoladà songkani megpelingo-lingo te lekat te Timanem se ipegtoladà dan. Meneng kebolalaw se itoladà dan, aw yan se mekedaet te pegsalig niyo diyà te Timanem. Eked dan keibeg aw lomowan kandan se Pengolo tadon migtansò kandan, aw yan egpedetengen dan se kededàtan te eked kenamay.
2Medita se otaw egpemenal meboyo meg-inang te medaet iling kandan, aw yan se doun te silahen heman se kebenalan egtekingan tadon.
3Tandà te ibeg dan mengewarta, megtoladà dan kenyo te kebolalaw amon mengabat dan te kwarta niyo. Nenamay den doen pelumun impetagad kandan, aw agpet den dan ipelumun te Timanem.
4Gebii doen menge anghil mig-inang te salà, meneng wedà din dan keidowi, so impeibing din dan doton te kilot. Impegapos din dan doton te kengitngitan lamig domateng se aldaw te peg-okom.
5Gebii te aldaw i Noe te peg-inang te kedita te otaw te salà, wedà din dan heman keidowi, so lininep din se tanà te wayeg aw nelemes se kedita dan wedà taking kandin. Olò din pinolò si Noe migtoladà te keilangan meg-inang dan te metòlid, aw sipat te doma pito sakop te pamilya din.
6Gebii, impelumun heman te Timanem se tege Sodoma aw tege Gomora tandà te medaet ininang dan. Tigkan din dan sinonog sipat lonsod inogpaan dan amon metaga-taga se kedita te otaw aw eden se detengan te otaw egpekesalà.
7Meneng si Lot olò se impelowà din, so metòlid se eg-inangen din. Ontò nepuluk se pedowan din so wedad yàyà te menge otaw kidoen mig-inang te medaet.
8Dalem te peg-ogpà i Lot doma kandan, kinità din aw dinineg din se medaet eg-inangen dan te kelikit te aldaw. Ontò nepuluk se pedowan din tepad kenyan, so metòlid se eg-inangen din.
9Pineokit kenyan, netegahan tadon te biyasa se Timanem megtabang te otaw egpenimanem amon eked dan peg-inang te salà. Biyasa heman sikandin domaeg te otaw eg-inang te medaet, aw ipetagad din dan lamig te aldaw te pegpelumun din kandan.
10Ontò medaet se pelumun din te kedita te otaw egtaking te medaet ibeg te lawa dan aw eked tolò te Timanem. Iling heman kenyan se menge otaw egpelingo-lingo te lekat te Timanem se ipegtoladà dan. Mebolot dan, aw kandan ibeg se egtekingan dan. Kenà dan egsagman te doen kelangkaw doton te langit, meneng egtompuyus dan kandan.
11Pengkey labi pa melangkaw se menge anghil diyà te menenoladà sìyan, meneng kenà dan egtompuyus kandan diyà te Timanem.
12Meneng se menenoladà sìyan egtoladà te kebolalaw, pengkey eden se ibeg te pedowan dan, yan se inangen dan. Iling dan te menge menenanap te kebenesan wedad aneng-aneng aw wedad detengan dan meneng olò dekepen aw iyawen. Egtompuyus dan te kedita wedà dan ketegahi, meneng ipelumun dan te wedad temanan tandà te eg-inangen dan medaet.
13Medaet se detengan dan so medaet se ininang dan. Pengkey aldaw, wedad yàyà dan egtaking te medaet ibeg te pedowan dan. Yan egsilahen kaw te menge doma otaw, so aw komaen kaw, makop se menge menenoladà sìyan diyà kenyo. Meneng kenà mèpiya se tod dan, so ibeg dan meg-akal kenyo.
14Aw komità dan te bayi, ibeg dan leyokan dan. Eked lengà se ibeg dan meg-inang te salà. Biyasa dan egboyo te menge otaw egdowa-dowa tepad te pegtaking dan te Timanem. Nelegeb se pedowan dan te peg-ingà. Eked dan pekelowà lekat te pelumun te Timanem.
15Neinang dan iling te otaw migketading, so simoway dan lekat te dalan pesalo doton te Timanem. Se eg-inangen dan, yan se iling te medaet ininang te telekeliwat te kagi te Timanem gebii si Balaam batà i Bosor. Tandà te ibeg din te kwarta ibegay diyà kandin, timandù sikandin meg-inang te medaet.
16Meneng migsagda se Timanem kandin. Impeikagi te Timanem se kodà iningedanan asno sinekayan din iling te kagi te otaw, aw yan nebelebagan se tod din medaet.
17Se menge menenoladà sìyan egtoladà te kebolalaw, wedad ontong niyo kandan, so iling dan te selep neeti. Iling dan te labon wedad odan eg-ibingen te kelamag. Impetagad te Timanem se ogpeanan dan kidoen te kengitngitan doton te kilot.
18Iling te medalem se ipegtoladà dan, meneng wedad kebenalan niyan. Pineokit te medaet ibeg te lawa, egboyowen dan se menge otaw kaling timanan te menge doma dan eg-inang te medaet.
19Egtoladà dan te doen kelowaan te kedita te otaw tomaking kandan so mepakay dan meg-inang te pengkey eden se ibeg dan. Meneng sikandan se neallang te kededàtan, so pengkey eden se egbayà-bayà te otaw, yan se mekeallang kandin.
20Aw egketaga-taga se menge otaw tepad te Pengolo tadon si Jesu Cristo migpelowà kenitadon, timanan dan te medaet keogpà te otaw dini te keneyonan. Meneng aw meboyo dan, aw todà dan dàgen te kededàtan, ontò medaet se keogpà dan labi pa medaet diyà te keogpà dan te wedà dan pa ketaga-taga tepad ki Cristo.
21Pengkey medaet aw eked palos ketaga-taga se otaw te doen peokit ininang te Timanem amon meg-aneng-aneng sikandin te metòlid kidon, meneng labi pa medaet aw metaga-taga se otaw kenyan aw penga niyan tominàyog dan kenyan aw eked dan tolò te kagi te Timanem intoladà diyà kandan.
22Pineokit kandan, netegahan tadon te benal se eg-ikegiyen seini, “Gayed eglikò se toyang egpengaen te indelowak din.” Benal heman se doma eg-ikegiyen, “Pengkey digosen se osa, meneng todà tomonà doton te pasak.”
