1Navufgama erisaga huzampintira mago'zana e'noruanagi, Ramo oku'ame'nea zane avanagnaza naveri hu'neazanku navufga erisagahu kea hugahue.
2Nagra antahi'noe, 14ni'a kafu evunefina Kraisi ene hagerafi'nea ne'mo, nampa 3 monafinka (mareri agatere kumate) marerineana amega avufgarero, avamupino manineno mreri'neo nagra ontahi'noe, Anumzamoke antahine.
3Ana nera nagra ontahi'noe, amega avufgarero avamupino, nagra ontahi'noe, Anumzamoke antahine.
4Hianagi Monafi (Paradise) avreno marerigeno, agra vahe'mo huama osuga'za ome antahine.
5E'i anazama naveri hu'nea ne'mofonku hu'na navufga ra hugahue, hianagi nagra'agura navufga ra osugahue, hagi hanaveniama omanenesiazanku navufga ra hugahue.
6Nagra navufga rama hanuana neginagi vahekna osugahue. Na'ankure nagra tamage nanekege'za hugahue. Hianagi nagrira antahi ra huonantesazanki keniare'ene navunava zaniare kesazegu mago'zana nosue.
7Na'ankure oku'ma me'nea knarezantafama Anumzamo naveri higena ke'noe. Hianagi e'inazante negena ra nagi erizankura, nekzagna zamo navufgafi nenreana, e'i Sata eriza vahe'mo nata nenamino, nazeri haviza nehiankina navufga ra osnugu anara nehie.
8Ama ana natama negriazana Ramo eritrenantesegu, 3'a zupa kazigazi hu'na antahige'noe.
9Hianagi Ramo'a amanage huno nasmine, Nagri nasunkuzamo'a knare kagrira hugantene. Na'ankure hanave ka'a omanesirera, Nagri hanavemo'a knare hugantegahie. E'ina hu'negu, Ramofo hankavemo'a knarezantfa huno refite nantegahiankina hanaveni'a omanesifina muse nehuna navufga ra hugahue.
10E'ina hu'negu, kema nasazano, nazeri haviza hanazo, knaza fore hanio, amuho erisua knafina rama'a muse nehuna, narimpa fru hu'na hanavenia omnea knafina nemanue. Na'ankure Kraisinku hu'na hanaveni'a omanea knafina, hanavenia e'nerue.
11Tamagra nagrira knare hu'ne hutma nazeri ante'ama hugaragi, netreta nagrira nazeri neginagi vahekna nehaza zankura, nagra navufga ra nehue. Na'ankure nagra amneza mani'noanagi, ugota aposol vahepina henkarfana omani'noe.
12Tamage aposol vahe'mofo avame'za tamagri amunompi hunoazama kesazana, avame'zama, kagu'vazama hanavenentike eri'za erino kazigazi huno vanimo'e.
13Na'ankure mago'zahu navunava ana miko mono nagapina nehuanagi, magoke'zama nagrama huoramante'noana tamagrama kva hunantesazeguma knama orami'nozamo'e. E'i kefozama hu'nesuana nasunku huanki kefozania atrenanteho.
14Hanki antahiho, ko tare zupa ome tamage'noe, meni mago'ene ome tamageku nehuankina tamagrira kna ontamigahue. Na'ankure mofavremo'za nerera nefazana kva hunonteanki, Nererake nefake mofavre'amo eriniazana antenteno nevuno kegva hunente. Ana hunegu tamagripintira mago'zana e'origahuanki, tamagri tamagu tamemo so'e hanigu navenesigena nehue.
15Tamagri manizanku hu'na nagra navufgane, maka'zaniane neramue. Hagi rama'azampima navesineramantesugeta, tamagra osi'a tamavesinantegahazo?
16E'inahukna hu'negu tamage hu'na knazana noramue. Hianagi tamagrama antahizana krunage nehuno musufasenaku nehie hutma nagrikura neheze.
17Nagrama huzmantoge'zama tamagrima tamaza hinogu vu'naza mono vahepintira, mago'a nazahuzana reramatga hu'na enerufi? A'o nagra anara osu'noe.
18Nagrama, Taitusine mago nerafunema tutu hu'na huznantogene tamagritega vuna'ana Taitusi'a reramatga huno mago'a azahu zana erinefi? I'o tamagra antahi'naze, Taitusi'ene nagranena magoke avamuteti magozahu huta eriza e'neru'e.
19Tamagrama tamagesa antahizana, tagrikura zmagra'a ke erihanavetinaku nehaze hutma tamagesa nentahizafi? Tamage e'inahu tamagesa nentahizanagi, Anumzamofo avurera Kraisinku keaga nehuta tamagrima tamaza hanigeta hageta mrerisaza zanku tamavesi neramantona nerafugatagu nehune.
20Na'ankure nagri'ma namnomavaziana esua zupa nagrima naveosi nesiazama tamagripima eme nege'na tamave'osinesizama huzankure. Nagri'ma namnovaziana, tamagripima eme neramege'na, amunontamifi ke ha' huzama, kanive rezama, arimpa hezama, atanezama, havige ohunte ahunte huzama, ogenke agenke huzama, veganokno huzama, manifatgo osuno makaza erisavri hu avu'avazanku nehue.
21Nagra ete'na ome tamagesua zupa, Anumzamo tamagri tamavufima nazeri nagaze huzankura kore hue. Na'ankure hakaremotma korapa kumitami'a tamagu'a rukrehe osu'naze. Tamagra savri avu'avaza nehutma, monko avu'avaza nehutma, agazehu avu'avaza hu tamaga tevava nehiazankura nagrira zavite nagesa nehie.
